Ces dames sans qui nous ne serions rien …

Ch’safran du Vimeu

Tertous connoait achteure l’Amiral Kerouak. Mais il o bieu avoèr des frégates, des cuirassiers, pi toute. Il seroait tout moneu sins sin safran. Marie, l’factrice du Vimeu, ch’est eune fème incroéyabe ed forche pi d’courage. Avuc sin grind fiu, ch’Nard, qui monte sin quad sur el tabe del tchuisine pour el réparer !  Avuc sin Amiral qui tchait dech guernier pasqu’il o oblié qu’il avoait ertiré l’montée ! Hérusemint, ale o sin fiu, Mario, affligé d’corps mais point d’tchoeur qui li foait grammint d’mamours…

Hayette Sororité

Eme mère ale o vu d’toute avuc mi, mais i feut qu’ale diche toudis sin mot. Ch’étoait eune cintrale atomique à ale tout seule durint dus jours. Feut dire qu’ale l’o vétchu pusse ed 30 ans ichi à moute chés vaques pi zé raforrer. Jasmine à acouter chés consèls d’Eric pour ch’torchis, Jasmine à atcheuillir chés gins avuc un café, Jasmine à ringer, lavurer pi coèr…

Mariodile, matante, ale étoait lo à débarrasser, à réchuer, à ringer. Sin métier, ch’est aiude ed ménage. Ale est toudis lo sins rien dire mais eune fème inforchée d’courage pi d’invie d’aidier.

Madame Saint Maurice

Y falloait qu’ale seuche lo ! Djano il o du ratourner à Anmiens pour aller l’quère. Aurélie, eune grinde gardineuse ed Sint Meurice, ale voloait vir el fameuse cinse à Tiodave. Ale étoait lo pour el série picarde.

 Nomdézeu !

Ralleumer le feu du picard

Un honneur harponvillois

Pour eune grinde journée d’euvrage à Harponville, ch’preume à m’atcheuillir, ch’étoait point ch’maire obin ch’tchuré de ch’village, mais un jonne in quad, un boin fiu d’Harponville qui m’foait l’honneur d’ête lo. Il avoait tchitté ses musiques hard-core pour vive avuc nous-eutes un grind momint picard.

Burin pi martieu

Défoaire ch’crépi à coeup d’burin pi d’martieu avuc Djano, Chico, Sam, Dimitri, Thomas.

Avuc l’arrivée de l’Amiral Kerouak, Marie pi leu fiu, ch’béton edvant ch’solin is nous o démuché des surprinses qu’os aiment point. Mais Eric, un espécialisse du torchis, est arrivé pour nous rassurer. Erfoaire ch’solin, canger l’seule pi ch’est rétampi pour 100 ans.

Des freumions

Ch’étoait eune freumière !

Adou qu’o met chés pannes ? – T’os eune soé ? – J’erfoai-ti du café ? – T’os eune bèrouète ?

Des milliasses de tchestions qui m’ont m’dmindé chés gins qui voloètent m’aidier.

Au mitant d’apreu-none, ch’étoait pusse ed tchinze gins qui étoètent lo dins l’cour del cinse.

No soérée picarde

Du pâté, del soupe, des cornichons, del bière, du vin, du chide pi des amisses avuc eune caleur à foaire invier d’jalousté ch’poêle qui voloait nous récauffer.

Des rires, des histoères pi des canchons espéciales pour mi…Des canchons in inglais pi évidemmint « Ch’est des boins fius » à canter tertous insanne.

Bet’Rave ed Chuque 2012

Dins eune ed chés canchons espéciales pour mi, is m’ont traité ed Poulidor ! A foait dus foés que j’sus esgond à chés Lafleurs de Chuque. Mais l’Ordre del Bet’Rave A Chuque (l’O’BRAC) is m’o distindjé d’un dipleume ed Bet’Rave A Chuque pi sin trophée, eune trouelle inbrenné d’torchis pi d’chaux.

Eune quemada picarde

Eune quemada, eune brulure in espagnol, ch’est eune cérémonie adou qu’os boét del goutte inflambée pour décaniller chés adjets pi avoèr leu aiude. Ch’preume coeup dins l’moéson, os ons prins des viux verres mais is ont clatché avec ch’fu qui avoait eddins pi l’goutte inflambée ale couloait dins ch’platieu in inox. Ch’tchoeur à Djano, il o foait qu’un tour : Os vons moérir ! Pi os ons prins ch’platieu, d’eutes verres pi os ons été au mitan del cour. Tertous in cherque avuc el coeudron d’goutte inflambée au mitan, Bran il o seurvi des verres ed goutte coeude à tertous. Ch’resse ed goutte inflambée il l’o répindu dins l’cour. A fsoait des bièles flammes bleuses.

Eune date proleptique dech futur calindrier picard !

Nomdézeu !

J’ai fait un nouveau rêve

Ch’pardouf  #3

Os intind grammint sons d’cloque avuc chés persidintielles à voter. Lo, ch’étoait du son, du pardouf d’achteure qu’os ons intindu à Moéson del Tchulture d’Anmiens el 21 d’avri 2012.

Chés élèves del classe d’alectrocaustique de ch’conservatoère is feusoètent leu festival avuc l’achuchon -19 db.

Eune gin fameuse, Léandre

Si os étoètes lo, os l’avoez vu 5 foés ! Léande avuc sin violoncelle, Léande à sin manicraque pi coèr, pi coèr…

Chés cabotans is étoètent étou lo. Katerini Antonakaki nous o foait un bieu gardin.

Qué bonheur d’intinde des cants roumains avuc Greta !

Du picard à la MCA d’Amiens !

O dit souvint qu’y o des reuves qui s’foètent janmoés… Mi, j'o foait un nouvieu reuve, min New Dream, je l’o vétchu hier. Sam à l’doudounette pi à l’muse à brassi, Tim à l’wywernn, Thomas pour chés danses. Ch’étoait un bieu momint ! Por vous dire, je n’étoais émotionné pi j’in ai brais. Sié Tiodave i brait à msure…

Nomdézeu !

ça bourdonne !

Eune catoère à Harponville

Quind os arrivoètes jusse apreu avoèr torner à l’Hayette, y avoait déjo eune pincarte: « El catoère qui dit sié, ch’est tout drot ! » Chés és is étoètent fin aimabes ed nous amoutrer ch’ecmin ! Os trécope ch’grébénote pi nous vlo in heut de ch’village. Vingt diapes, ch’parquinge del salle des fiètes il est plein pi l’cour del école étou ! On rinte dins l’salle pi lo quasimint conme eune rinconte ed cabale persidincièle, du monne, du monne !

Un moète-marqué à Harponville

Os avoez connu seurmint dins nos villages, ch’comminal qui passoait avuc sin barou pour raforer chés gins. Miu qu’eune AMAP qu’ale vind des lédjeumes, os eurez d’toute à l’catoère qui dit sié ! Des lédjeumes, du miel (ch’est eune catoère quind meume), des chuques, des jocquots, des poulets pi des canèrds dodutlés à tchuire dins vo four, des pichons, edz équerviches, du chide, del bière pi meume des conserves ! Un moète-marqué que j’vo dit !

Tchulmadjet  @ Harponville

Miu èque Tchulmadjet obin Guerlojerie, ch’est eune rinconte ed pusse ed 60 gins amiteuses, ed voésins, d’amisses pi d’accointanches. « A vo ti ? – Ch’tchot, il o grindi ! – Alors, t’os acaté eune neuvèle carette ? ». Un liu pour dviser, berdler, prinde des neuvèles pi rincontrer des gins in pusse d’acater des boènes coses à s’pourléquer vos lippes. Eune rassouvenanche ed chés martchés d’antan !

Vive chés mouques à mié qui dittent sié !

Nomdézeu !

Réglez vos sonotones !

Ch' pardouf picard #3

Si os n'povez pus incorser chés musiques pi chés canchons picardes traditionnelles, vlo eune ducasse qu'os allez aimer !

L'alectrocaustique, c'est l'musique d'achteure ! Avuc chés cartchulateurs pi chés manicraques d'innhui, o foait des sons pi du pardouf qu'o n'peut pon magineu ! Chés élèves de l'classe d'alectrocaustique dirigeu par André Dion àch Conservatoère d'Anmiens is in foètent à leu mode !

Ch'programme il est lo !

Mi, j'y sro pi d'avinche, j'o invie d'acouter pi d'vir =

- Le chant des particules , pièce visuelle et sonore de Francis Derussy et de Tristan Alexandre

- La danse des algues au rythme de la mer, pièce électroacoustique de Serge Bouc

- Live Son / Image, 2 pièces mixtes pour vidéo et violoncelle. Vidéo : Head Wood. Violoncelle : Léandre Vaucher

- Jardin, performance de théâtre sonore de Katerini Antonakaki

- Seb2, pièce électroacoustique de Sébastien Berneaux sur les onomatopées

Des instruments picards alectrocaustiques !

A sro à 6 eures d'ermontée obin à 10 eures du soèr mais ème tchuriosité a m'faro attinde.

Apreu pusse ed 30 énées ed silinche, y éro del musique picarde à l'Moéson del Tchulture d'Anmiens !!!!

AIRS PICARDS REVISITES avec Sam Corwynn (pipasso, muse à fou et muse à brassi), Tim Drelon (doudounette) et Thomas SG (danse)

 Nomdézeu !