Alambiqué

NENE = Ch’est fini ! J’y rtorne pus avint un an ! C’est del lavasse, leu café !

POPAUL = A quièche don ?

NENE = Mon Dussautoy!

POPAUL = Quoé qui s’passe ?

NENE = Fidjure-ti qu’Mandame Dussautoy ale o acaté, yo un moés, eune minute moderne pi alectronique. Pi vlo, ale est tcheu in cronque ! Sin mari, qu’il est in molé bricoleu, il o rbéyé à ch’manicraque. Pi conme il avoait foait un molé d’cours d’alectricité à ch’collège, il o vu qu’ch’étoait eune affoère ed volts ! Is ont acaté un voltmète pi is ont cminché à démazinguer leu minute pour vir adou chés volts is étoètent in cronque.

POPAUL = Pi is ont treuvé ?

NENE = Bé nan ! El minute ale est achteure dépiéchée dsur ch’buffet pi is ont rprins ch’viu alambic ed mémère Madelon pour foère du jus.

POPAUL = Pi l’warantie d’un an?

NENE = N’in parle pon ! Is n’ertruvent-té pus l’facture ! Dussautoy il o déjo posé 15 jors ed congés sins solde pour li démurailler avuc s’fème tout l’moéson pi l’ertruver ! Mon Dussautoy, ch’est lavasse pi dalache achteure pi l’pire est qu’a put durer coèr 11 moés, ch’timps del warantie !

Nomdézeu !

Débagager sins dminder rin, ch'est pon aisé...

Min téléfone pi min intarnet

Min casernemint à Anmiens il est vuide. Ch’débagagemint il est finite. Adon j’apèle el compagnie d’téléfone pour arter min abonnemint.

TIODAVE Allo, Itterfoère ? J’o débagagé pi j’vu freumer el line.

ITTEFOERE Bojour, mossieu Tiodave, os êtes eune vièle pratique à nous eutes pi os avez del canche ! El freumeture del line, ale sro gratuite !

O n’alloait pon poéyer si qu’on m’donner ch’nom pi ch’telefone de ch’preuchain locataire de vo casernemint.

TIODAVE Ben, je n’pu mie vo l’donner rapport à ch’que chés casernemints is vont ête raneuvis. I n’éro point d’locataire edvint dus ans.

ITTEFOERE Adon, alorsse os allez rchuvoèr eune facture ed 45 Uros por freumer el line pi os érez soin ed nous rinvoyer el boète intarnet dins un colis avuc chés timbes qui vont dsur ! Boène jornée, Mossieu Tiodave !

Min casernemint

Un coeup d’téléphone à l’offiche ed chés casernemints =

TIODAVE Bojour, ch’est Tiodave. J’voudroais rinde min casernemint.

ATCHEUIL Sié ! Ej vous mets avuc ch’serviche ed préavisse.

Ch’serviche ed préavisse =

TIODAVE Bojour, ch’est Tiodave. J’voudroais rinde min casernemint.

PREAVISSE Os sonmes au moé d’eut, avuc ch’préavisse, os allez rinde in déchimbe, énon ?

TIODAVE Bé non ! J’resse à l’Rue Massenet adou qu’is vont rétampir pi raneuvir chés immeubes.

PREAVISSE Ah ! Alorsse os allez ête erloger.

TIODAVE Bé non ! Je n’vu point ête erloger ! J’vu jusse rinde min casernemint !

PREAVISSE A n’est mie possibe, mossieu. Os devoez ête erloger ! J’vo mets avuc ch’serviche d’erlogemint !

Ch’serviche d’erlogemint =

TIODAVE Bojour, ch’est Tiodave. J’voudroais rinde min casernemint de l’rue Massenet.

ERLOGEMINT Ah sié ! Os allez habiter amon el moéson ed vo grind-mère, à El Ferme Grébénote !

Ben, os verrons verdi pour qu’os nous rindoètes chés clés.

Nomdézeu !

Ch’est aboli !

Ch’minisse qui s’mêle de l’sinté ed chés eutes

Méripavé Tourangelle ale vut abolire ch’toubac pi chés fumaquages dins chés abris d’bus, dsur chés bains d’mer pi itou dsur chés trottoèrs edvant chés escoles. Putôt qu’ed démépriser chés fumaqueux pi zzé abolir partoute, i feudroait quind meume s’edminder à coeuse ed quoé qui fumaquent ? Putôt que zzé agonir conme des malpropres….

Chés loés picardes

Y n’o des loés in France, pi tertous on put avoèr ses règues à li dins s’moéson.

A Grébénote, vlo chés abolicions =

- El croate est abolite. Point d’racisme, os n’avons rin conte chés Croates, mais conte chés imbléyeux (chés élis, chés erprésintants pi toute). Ch’est el seul vêtemint « frincés » obligatoère à l’Assimblée Nationale qu’is ont toudis point voté l’erconnoaissanche de ch’parlage picard. Adon à Grébénote, point d’lanke picarde erconnute, point d’croate !

- Il est aboli ed gasconner. O atuit chés gins à Grébénote sinan os allez vos foaire atuire !

Chés preuchaines abolicions à Grébénote ?

Vu que j’sus ch’governemint démocratiquemint éli par mi tout seul à Grébénote, j’vo suire l’avisse à Méripavé Tourangelle pi fumaquer s’ro aboli à Grébénote à moins d’1 mète d’heut. Eune aminde ed 10 uros pour ch’ti qui s’ro assis à terre in route à fumaquer.

Nomdézeu !

NB = El Ferme Grébénote est achteure un Cinte Tchulturel dins chés Gannes Pages !

Vive singlemint à l’moéson

Liberté ed cirtchuler abolite

J’sus fin fier d’avoèr ème carte d’identité ed 1992 signurée ed mi-meume. Chés cartes d’achteure, ales ont eune copie ed signure edsur. Eme grind-mère ale n’o jamoés erfoait èse carte d’idintité edpus chés énées 40 avuc sin Ausweiss pi ale o toudis vétchue trintchillemint dusqu’à s’mort. Achteure, avuc ème carte signurée pèr mi-meume, j’o pus l’droét d’seurtir ed France. Bon, j’sus quèquefos daller in Belgique vir mes amisses picards, mais y feut point l’dire !

Cangemint ed code postal

J’o passié du 80920 à 80560 in code postal. Cha n’est mie rien pour vous eutes mais pour mi, ch’étoait eune abomination. J’o min nom d’famille, min tchot nom, min village pi adon ème adrèche. Pi d’un coeup, vlo ti point qu’os cange min liméro d’code ! J’o invoyé gramint d’lettes avuc 80920 Harponville. Pi un jor, j’o du cangé min code ed poste sinan j’avoais pu ed carte bancaire !

Aboli d’achuchon pi d’jokage

Avuc une carte d’idintité ed 1992, j'sus aboli d’ête persidint d’achuchon à coeuse qui feut des papiers adlives pour el Préfecture pi ch’compte ed banque. Pi si j’doés erchuvoèr des pensions d’joquage, i feut itou eune carte d’idintité adlive !

J’o jusse invie ed vive singlemint ichi in Picardie !

Nomdézeu !

El preume du 21^ème sièque

Porche ouvert à Grébénote

Par indsous ch’porche Grébénote, un boutchet d’fleurs dsur l’boète às lettes, des pincartes in picard, des vièles cayèles, quèques bincs pi ch’drapieu picard, vlo chés guernitures de l’preume fiète ed la musique du 21^ème sièque à Harponville. 

Chés musiques

Barbara ed chés carolines ale nous o jué à coeup ed saquesofone « Tiotte Fleur » pi « El Vie in Rose ». Christian pi Yo, i sont vnus espécialemint ed l’Oèse pour nous foaire décoeuvrir des musiques del Ernaissanche. Tom, no permatchulteu, il o jué des canchons à l’djuitare. Pi Tim il o jué des musiques alectrocaustiques avuc Sam ch’Corbieu.

70 parsonnes dsur 168 habitants  (42%) qui sont vnus.  A Anmiens, à Albert, Dourlins obin Corbin, ch'est-ti miux?

Barbara au saxophone

Sam (percussion), Yolande (flûte), Christian (mandoline)

Thomas, le permaculteur, à la guitare

Ch’fu du 21 juin

El soltisse, ch’est ch’jor el pus lon ed l’énée. Un sapré jour pour Belenos, ch’diu gauloés.

Ch’est avuc un tiot fu dins l’cour ed l’cinse Grébénote qu’os o défini el fiète à musique pi à dinser mon Harponville.  

Hontabe à n’in dminder l’abolicion ed chés gins-lo de l’Nation Picarde, des gins estrémisses qu'is ont foait el fiète à Pinquigny por el soltisse ! Sint Drisse, soéyez à leu tchul !  

Nomdézeu !