Overblog Suivre ce blog
Editer l'article Administration Créer mon blog
14 septembre 2016 3 14 /09 /septembre /2016 14:12

Vlo ed pus d’un moés qu’a dure.
Un coeup au soèr, ch’est couvert-fu avuc ch’flim del série qui freume obin un coeup du matan, ch’est point moéyin d’avoèr des neuvèles pèr émile ou pèr intarnet. Eme boète TCHITTERFOAIRE, ale terluit orange. Cha n’est mie qu’ale vut canger ed marque mais ch’est qu’y o eune russe.

 

10 29, service pratique (Pratique, infin feut vir…)

 

- Allo, j’o pu intarnet ! Pus d’téléfone, pus d’wèpe….
- Sié, os allons vir insanne. Défiquez el prinse ed téléfone del boète intarnet.
- Je n’pus point à coeuse que j’sus mon min voésin pour vous appeler.
- Mais mossieu, os devoez ête edvint vo boète intarnet pour foaire chés manoeuves avuc vo téléfone portabe !
- A n’est mie possibe à coeuse qu’el moéson ale est in zone blanque.
- J’vo dminder à min chef…. (musique d’attinte)
- Mossieu, a n’est mie possibe. I feut qu’os soéyez edvint el boète avuc un portabe à vous eutes, d’un voésin ou d’un amisse. O put rin foère sinan… Adé !

 

Ebeudi pèr el réponse, j’ercminche ch’liméro 10 29, service pratique

 

- Allo, j’viens d’appeler. J’o pu intarnet ! Pus d’téléfone, pus d’wèpe pi point d’portabe….
- Sié, os allons vir insanne. Défiquez el prinse ed téléfone del boète intarnet.
- Je n’pus point à coeuse que j’ai point d’portabe pi j’sus mon min voésin pour vous appeler.
- Mais mossieu, os devoez ête edvint vo boète intarnet pour foaire chés manoeuves avuc vo téléfone portabe !
- A n’est mie possibe à coeuse qu’el moéson ale est in zone blanque.
- J’vo dminder à min chef…. (musique d’attinte)
- Mossieu, à vo moéson, os allez défiquer l’prinse ed téléfone pi apreu os défiquez ch’pitinton ganne. Os foaites risette pi après os ertirez el prinse ed courant. Os comptez dusqu’à 10 pi os rinfiquez l’prinse. Pi si a n’marche point, i feut nous rappeler.

 

J’foais tout ch’qu’i feut pi a n’marche point.
J’rappelle ch’service pratique.

 

- Allo, j’viens d’appeler. J’o pu intarnet ! Pus d’téléfone, pus d’wèpe pi point d’portabe….
- Sié, os allons vir insanne. Défiquez el prinse ed téléfone del boète intarnet.
- Je n’pus point à coeuse que j’ai point d’portabe pi j’sus mon min voésin pour vous appeler.
- Mossieu, à vo moéson, os allez défiquer l’prinse ed téléfone pi écarter chés aleumelles.
- Cmint ? Qués aleumelles qui feut écarter ?
- Ben cheulles dins l’prinse ed téléphone ed vo mur pi apreu os défiquez ch’pitinton ganne. Os foaites risette pi après os ertirez el prinse ed courant. Os comptez dusqu’à 10 pi os rinfiquez l’prinse. Pi si a n’marche point, i feut nous rappeler.

 

Em vlo avuc un coutieu à trifouiller chés aleumelles del prinse. Pi du brin, a n’marche toudis point.

 

- Allo, j’viens d’appeler. J’o pu intarnet ! Pus d’téléfone, pus d’wèpe pi point d’portabe….
J’o défiqué chés prinses, ch’pitinton ganne, écarter chés aleumelles. Toudis point d’intarnet pi d’téléfone !
- Sié, os allons vir insanne. O put vous invoéyer eune neuvèle boète internet TCHITTERFOAIRE évolution. Ch’facteur i passero dins 4 jors.
- A n’est mie possibe ! A foait 5 jors que j’sus in raque.
- Adon i feut daller à l’boutique ed Glisy pour in cacher eune neuvèle. Vlo ch’liméro ed téléfone. J’o mis dsur vos dossier intarnet el dminde por Glisy.

 

Eune heure apreu, j’téléfone à Glisy.

 

- Allo, j’sus in raque d’internet. Ch’service pratique, i m’o dit qu’os avoètes eune neuvèle boète pour mi.
- Attindez. J’erbée dsur vo dossier. Ah nan, os n’avons point d’edminde. Pi on n’avons point el boète TCHITTERFOAIRE évolution.

 

Ch’est à s’pinde avuc ch’fil ed téléfone qui n’sert pus à rien !

Chés rinseignemints ! Y o ti eune boutique TCHITTERFOAIRE d’eute pert ? Sié, rue des troés cailleux à Anmiens !

 

- Allo, j’viens d’appeler ch’service pratique. J’o pu intarnet ! Pus d’téléfone, pus d’wèpe pi point d’portabe….
J’o défiqué chés prinses, ch’pitinton ganne, écarter chés aleumelles. Toudis point d’intarnet pi d’téléfone ! Is ont voulu m’erdonner eune neuvèle boète que j’devoais aller l’cacher à Glisy mais is ont rien dsur min dossier pi is ont point d’boète TCHITTERFOAIRE évolution. J’pus-ti passier mon vous eutes pour in prinde eune ?

- Attindez, j’erbée. Sié, os avez eune deminde mon Glisy. J’vo l’défoaire pi j’vo prinde vo comminde. Os pouvez vnir.

 

Un coeup d’carette à Anmiens. El neuvèle boète in plache…. A n’marche point !
Os savez quièche èque j’o appelé ?!  Service pratique !

 

- Allo, j’o pu intarnet ! Pus d’téléfone, pus d’wèpe pi point d’portabe….
J’o défiqué chés prinses, ch’pitinton ganne, écarter chés aleumelles. Toudis point d’intarnet pi d’téléfone ! J’viens jusse ed canger ed boète internet èque j’o été cacher à Amiens. Pis a n’marche point.
- Sié, os allons vir insanne. Os allons vous invoéyer un technicien. Os pouvez-ti m’donner vo liméro ed portabe pour que ch’technicien i prinche rindez-vous.
- A n’est mie possibe ! J’o point ed portabe pi os sommes in zone blanque.
- Mossieu, i feut un liméro d’portabe pour ch’technicien ! Sinan o put rien foaire.

 

J’rahotche ch’téléphone pi nous vlo erparti à l’boutique TCHITTERFOAIRE Anmiens pour déteuper un rindez-vous.
Djuilleume, conselleu TCHITTERFOAIRE, il o été formidape pour prinde ch’rindez-vous. Lindi inter 9h pi 10h30.


- Bon, ch’rindez-vous il est prins. Mais porquoé qu’os avez pas dmindé no boète d’escours « wèpe vadrouilleu ».
- Bé, je n’savoais point. Mais cmint qu’a marche ?
- Bé, os mettez cho à l’plache ed vo boète internet pi a marche avuc ch’réseau.
- Qué réseau ?
- Ben ch’ réseau ed chés téléfones portables !
- Mais os n’avons point d’réseau dins eune zone blanque !
- Nomdézeu ! J’avos oblié ! Sié, adon i feut attinde ch’technicien.

 

Lindi, ch’technicien il arrive pi trifouille chés fils, el boète internet pi chés prinses.


- Nan, cha n’est mie vo branchemint internet. Ch’est el ligne ed téléfone qu’ale est berzillée. I feut appeler France Telecom. J’vo z’appeler.
- O n’pouvait mie ! Os sonmes in zone blanque !
- Cmint que j’pus foaire alors ?
- Faut aller à confesse à ch’timpe obin à l’église.

 

Vlo don no technicien assis à l’tabe ed pique-nique de ch’timpe à appeler ch’technicien Telecom.
Avuc bien du mau, il o ieu un tchot molé d’connexion pour prinde ch’rindez-vous.
Rindez-vous el lindmain.

Afficher l'image d'origine

A l’fin des fins, ch’était un méchant fil rouillé dins ch’raccroc inter ch’fil del rue pi ch’cabe del moéson avuc 10 jours sins avoèr des neuvèles de ch’Monne !

Il o ti canger seulmint, ch'Monne ? J'o des doutances...

Nomdézeu !

Partager cet article

Repost 0
Published by nomdezeu
commenter cet article

commentaires