6 mars 2012
2
06
/03
/mars
/2012
23:23
Une langue disparaît tous les 15 jours
El tour ed Babel ale est in train d'fonde. Chés èspécialisses ed parlage is l’ditent tertous. El mitan (50%) ed chés parlures de ch’Monne vo défincter d’ichi 2050. Eune lanque qu’ale est pon rintabe écolomiquemint, ale vo à l’huche !
Meume in France, achteure, il est trop d'tard pour intinde eune gin dviser in lanque sifflée des Pyrénées ou coèr in judéo-provençal.
EL GRINDE PARADE ED CHES NATIONS PICARDES
J’o l’reuve que tertous chés « gins picards » is erconnaichent del Nation Picarde (avuc leu parlage, leu patoés, leu culture, leus traditions). A quind qu’o véro eune grinde parade ed chés Poéyis Picards Tertous Insanne (conme à Lorient pour chés Poéyis Bertons) dsur ch’Mail à Anmiens, dsur l’Plache des Héros à Arro, rue Brûle Maison à Lille ou coèr su l’Grand’Place ed Tournai ?!!! Je l’véro-ti de min vivant ? Ej n’in brais d’avinche d’émotionnemint de vir cho ! Chés canteus, chés diseus, chés cabotans, chés gayants, tertoutes chés gins qui foaitent du parlage chti obin picard rasannés dins eune grinde parade pour tertous ! Por no Nation Picarde amiteuse avuc èse main dsur sin tchoeur ed fier-tchul d’Picard obin de Chti.
A défeut d’cavalcade
El 31 mars 2012, ch’est eune Manifestation nationale des langues régionales.
Os put moutrer èse picardité in dallant à =
A Longueau (80) pour ch’espectaque « Laboureurs de Terre, Laboureurs de Mer » d’Amuséon avuc chés contes in picard ed Jean-Marie François.
A Ons-en-Bray (60) pour l’Assimblée Générale ed Tertous pi pour l’Académie des Lafleurs
Des coeuchures pi des aulx à chés fernètes !
Pi porquoé point eune coeuchure à vo fernète pour rappeler à chés imbléyeus d’politique que ch’coeup d’pied ed Lafleur il est toudis prêt !
Obin ed l’al pi meume eune tresse d’als à vos cassis pour amoutrer qu’os êtes conte d’abolir chés viannes à l’al del castrolomie ed nos bieus poéyis ed Grinde Picardie !
Envoyez les photos de vos chaussures et aulx à vos fenêtres!
Nom des aulx !
Published by nomdezeu
-
dans
A venir
4 mars 2012
7
04
/03
/mars
/2012
16:30
2 cabales à foaire pour ête éli
Tiodave inforché
Comme tertous j’o min ouvrage el long del smaine. Pi apreu, el soèr ou à ch’tchul del smanne, j’o coèr min interprinse à pinser pi aladon à mi. A quand qu’os érons des jors à 48 eures ? Ed l’ouvrage, a n’minque point pi adon j’sus inforché. J’intinds déjo vos étonnemints : « Bé, Tiodave, i doét avoèr des salaires du diape ! ».
Seulmint chés picardisants is vos l’diront : « Edpus quind qu’os sonmes poaiyés pour écrire, dire pi foaire du picard !? ».
500 à ratrucher
J’sus achteure candidat pour ête éli Lafleur ed Chuque 2012 avuc l’Académie des Lafleurs.
El cabale ale est durte pi caterneuse.
Pi vlo que j’foait itou cabale pour ête Talents d’Entreprise 2012. Avuc El Ferme Grébénote, j’sus à rimplir chés papiers pour ête candidat. C’est gramint complitché rapport àch qu’o m’dminde min programme pour chés 3 énées qui viennent ! J’vos-ti ratrucher chés 500 eures dins min arméno d’minisse por aboutir ème perzintation à chés Talents d’Entreprise 2012 ?!
Merci de soutenir Tiodave par un petit message d’encouragement !
Nomdézeu !
Published by nomdezeu
-
dans
A venir
3 mars 2012
6
03
/03
/mars
/2012
18:50
Eune cabale porite
Académie ed chés Lafleurs 2012
Os savoez que j'foais cabale pour ête éli Lafleur ed Chuque 2012. J'o déjo foait eune lette fin amiteuse à ch'perzidint. Avuc min camarate, Amiral du Vimeu, os ons ingénié l'imporvignage de ch'Poéyis d'Bray. Ch'étoait pour du rire dins l'esprit del ACADEMIE DES LAFLEURS.
Min cartchulateur invrimé
Vlo achteure qu'edpus quèques jors, min cartchulateur est invrimé. Impossibe d'invoéyer un émile avuc eune pièche aloéyée. Impossibe ed lire un PDF. Pi des monts d'eutes... Hérusemint, un jueu d'esport picard avuc un nom qui sert à coude, i perpose ed vir min manicraque et de l'rétampir.
J'atchuse...
J'atchuse el cabale d'ête chicanoère, imbléyeuse pi d'pantomine!
J'atchuse mes concurrints ed tracher àl' division inter chés voteus !
J'atchuse des gins malaprinds d'avoèr invrimé min cartchulateur pour que j' puche pus foère cabale !
Mes gins pi amisses du peupe, ch'est eune attaque hontabe qui vos dminder pétète pusse ed 2 smannes pour rétampir min manicraque pi comme d'hasard jusse edvint le 31 mars !
Nomdézeu !
Published by nomdezeu
-
dans
Cassemint d'tête
29 février 2012
3
29
/02
/février
/2012
15:55
El fin du moés tous les 4 ans
Cartchuls complitchés
Os avons déjo assez de nos acatoères à cartchuler. Ch’29 févrieu, i vient in pusse déturber nos vies. Allez vir el signifiance ed « Année bissextile » dsur Wèplocédie. Ch’est des cartchuls du diape pour savoèr quale énée vo ête bissète !
Eustérité = Un jor ed pusse, des routes ed moins !
Ch’est innhui avuc chés syndicalisses qui foètent grève pour qu’o étreume autermint chés richesses. Tan pisse pour vous eutes si os avez ieu l’idée de voloèr passier par el zeune ed fabriques d’Anmien-Nord ….
El Candèle dech sapeur
Ch’est eune gazette fin rédeuse qu’ale est dépuliée tous chés 29 février ! Innhui, ch’est ch’liméro 9. Pour ch’supplément « La Bougie du Sapeur – Dimanche », o pourrez l’acater el 29 février 2032 à coeuse qu’a sro ch’prochain 29 février qui tchéro un diminche !
L’ieu ale baisse !
N’erbéyez point vo facture d’ieu ! Ch’est del Sonme qu’il est tchestion. Fjidurez-vous que ch’Courrier Picard i nous dit que l’ieu ale bache inter Cappy pi Froissy. Soé-disant qu’y n’o un treu dins ch’lit del Sonme !
Il étoait point trop tôt, Nithard !
Ritchier ed Cintule pi Berthe ed Laon is doètent s’ertorner dins leus luzets ! Os ons ertreuvé chés oches à Nithard pardus in 1989 (Courrier Picard). Abbé ed Sint-Ritchier, ch’étoait ch’tiot-fiu à Charlemagne pi rédigeu de ch’preume teske in frincés !
Nomdézeu !
Published by nomdezeu
-
dans
Revue de presse
29 février 2012
3
29
/02
/février
/2012
10:49
El Muse à Brassi
Du Jazz ! Biéseur qu’a vo jaser. Ch’est eune fiète qui vo foaire berdler chés gins pour el foaire connoaite !
Du Médiéval ! Djuilleume, ch’métchin, il éroait pétète invité sin amisse Enguerrand à ch’concert ?
Du Métal ! Avuc chés sérrules pi chés clinches qu’on vo ouvrir pi freumer del églisse, de l’salle des fiètes, chés Harcignoles is vont n’intinde du métal !
Du Baroque ! Des drôles, des fameux, des layous… Os vons vir ed toute !
Electro ! Binde d’ocleus ! Minqueroait pu qu’o qu’is n’euchent point l’alectricité à Harcigny por chés concerts pi chés séries !
Du Gothique ! Je n’croés point qu’el églisse ale est gothique conme chés cathédrales, mais ch’est quind meume eune fin bièle églisse pi coèr pusse ed Quiérache !
Ed toute fachon, el boène Muse qui brassero tertoutes chés musiques avuc chés instruments picards, ale sro lo à Harcigny el 30 juin pi el 1 juillet !
Allez vir Atelier de Corwynn pour chés informations…
Nomdézeu !
Published by nomdezeu
-
dans
A venir
29 février 2012
3
29
/02
/février
/2012
09:34
El ducasse ed chés musiqueus picards
Vnir acouter el musique d’Harcigny.
Viendez d’avinche à l’fiète pi ed preume allez varonner dins ch’poéyi.
Chés rues, ch’est déjo del musique.
Rue du sous-bois, ch’est-ti des noèrmerles, des moénieus, edz orssignos qui cantent dins chés branques ed frène, ed carme obin ed quène balées par ch’vint ?
Rue de Braye, ch’est-ti des brairies ou des nazus gadrouillant leus galoches dins des flaques ed brais ou d’beus ?
Rue Plomion, ch’est-ti el flatte d’eune pleume qu’os intindrez ?
Rue Balleux, ch’est-ti des joènes balant à l’mélodie d’un violonneu ou d’un accordéonneu ?
Rue de la Fontaine, ch’est-ti l’rieulemint del font qu’os intindrez ou chés quaterlangues lavurant leus drops ?
Pi Rue Principale, intindez-vous el pleume de ch’maire grattant un nouvieu mot d’billet in picard pour ch’ Démocrate ed l’Aisne ?
Allez vir Atelier de Corwynn pour chés informations…
Nomdézeu !
Published by nomdezeu
-
dans
A venir
26 février 2012
7
26
/02
/février
/2012
00:01
Innhui, j'o abattu avuc min cousin ed Monteuban un abe qui avoait el pécavie de vouloèr afflater ch'toét del moéson avuc ses branques. A dus (min cousin pi mi), os ons foait ed no miu. Ch'viu pouillier de m'grind-mère, il l'o fondu avuc chés darinnes branques tchaittes edsur.
A 3 eures d'ermontée, Douèr pi sin camarate del Fondacion Dech Patrimoène, is étoètent lo pour m'donner des consèls pour rétampir el moéson, chés granges pi toute. Pour chés espécialisses-lo, y feut démonter tout ch'crépi pi ch'chimint. Foaire séquir el resse à l'air libe pi apreu dminder à un artisan d'erfoaire el seule pi ch'seulin sins avoèr à démonter tout ch'torchis.
A preume vue, mi pi chés conselleus, os sonmes d'accordage =
Chés granges, ales sont d'apreu 1840 avuc el tcheuriosité d'avoèr des bos in frène décovert ed torchis.
El moéson ale est d'avint 1820 avuc sin four à pain pi l'porte de s'n étchurie qu'ale vo dins l'cambe.
Pour avincher, i feurot ed l'aiude!...
Ti, pétète ?!
Nomdézeu !
Published by nomdezeu
-
dans
J'étais là
24 février 2012
5
24
/02
/février
/2012
20:23
PHOTO de l'étchipe ed Picardie
à l'Crosse à l'Tonne à Blaton el 22 février 2012.
Avuc Julie ène fin bièle Sandrine, Adrien Helminiak,
eune fille qui boét del bière àl pipette
pi Eric, un boin buqueu ed cajon pi d'cholette
Adrien nous dit sur ch'Tchulmadjet =
eh bien voilà... nous sommes bien rentrés en Picardie après un séjour en Wallonie Picarde inoubliable. On a canté, crié "choleeeeete",
buké chés tonnes, pi balé quèques Jupiler, Moinette, etc...
avec nos amisse Chés Caracoles.
Du bieu temps, bref eune fin bièle jornée d'crossage!
Merchi ed Tiodave d'avoèr erprésinter el Picardie
eune foés ed pusse à l'Croche àl' Tonne !
Merchi Adrien !
A quind qu'os érons des jus d'crosse in Picardie ?!
Nomdézeu !
Published by nomdezeu
-
dans
Revue de presse
24 février 2012
5
24
/02
/février
/2012
18:14
Vir miu
5 énées sins vir clair
Conme je vous disoais dins un mot d’billet passié, j’o eu bien du mau à povoèr canger ed leunettes. Mieupe quasimint conme eune teupe, j’avoais bien conscienche que j’erbéyoais troube des foés. J’o bien tinté d’canger mes besicles mais chl’otchulisse i n’voulait point rapport à min papier d’ordonnanche qu’il étoait viu ed pusse de 3 énées.
Vir clair innhui
Innhui, j’o été acater mes nouvieus quatezius. J’o l’bleusevue d’vir conme un pichon rouche dins un aquoérieume. Chl’oeulogisse, i m’avoait prévenu qu’a cangeroait. Manqueroait-pu èque j’o itou el mémoère de ch’pichon rouge qu’ale est soé-disant ed 3 esgondes obin ed 3 moés eslon chés savants.
Vir plus clair dins chés neuvèles
Avuc mes nouvièles leunettes, j’o idée que j’vo vir plus clair dins chés neuvèles d’achteure.
Por el Syrie, os vons avuc l’ONU définde ch’peupe conte un dictateu, énon ?
El Grèce, ale est rétampie, énon ?
Chtilo qui n’berdèle point pi qu’il o déjo erchu ch’preume prix à Cannes, à chés Golden Globes, à chés BAFTA inglais pi pétète à chés Césars frincés pi chés Anschaires améritchains, ch’est bien-li qui vo ête éli Perzidint del République in 2012 ?! Enon ?
J’o bien vu ?!
Sinan feut que j’artourne mon min oeulogisse pour foaire ed nouvieus quatezius !
Nomdézeu !
Published by nomdezeu
-
dans
Cassemint d'tête
24 février 2012
5
24
/02
/février
/2012
17:08
Published by nomdezeu
-
dans
Revue de presse
