Etre professeur de picard

Apprindez l’inglais, ch’est pus aisé ! (pour mi)

Ch’cours ed picard ed l’IUTA

Edpus 2006, j’o rimplaché Meurice, ch’espécialisse ed canchons picardes, pour animer ch’cours ed picard de chl’Institut Euniverchitaire Tertous d’Age (IUTA). Ch’est un rude labeur. Chés carabins qui vienntent in disant « Je n’sais pon paler picard » pi in fait, ch’est des intégrisses ed parlage picard ! Feut point s’berlurer sur l’signifianche ou l’terduirie d’un mot !

Vu qui n’o point d’dipleume à l’fin de l’énée, is sont grammint à n’ervenir l’énée qui suite.

Un prougramme d’apprintissage de 6 ans !

Adon chés élèves i ervientent d’une énée à l’eute. I feut don que j’cange mes tesques pi mes erchons chaque énée… A foait qu’edpus 2006, j’o 6 énées ed tesques, d’erchons in picard pour apprinde ch’parlage.  

Un live pour apprinde ch’picard

Tiodave… T’es-ti babache ?! T’os qu’à prinde ch’live d’apprintissage de ch’ picard pi rajeuter edz egzercisses à lurlure ! Sié, biéseur ! Mais ch’live-lo i n’o point été ingényé ! Chés erchons de vocabulaire, ed grammaire, d’ortografe, ch’est à mi ed zé ahanser.

Apprinde eune lanke à l’école

Vlo dus jours, j’o vu dsur intarnet un live asteu pour apprinde chés parlages horzins à chés nazus = « Enseigner une langue étrangère à l’école » dépulié par Hachette Education. Vlo l’réponse à min martyr ! 17 de ch’moés d’Eut 2012 èque j’aros min colis amon Grébénote ! J’attinds cho avuc impatienche !

Nomdézeu !