Eune verlée à Montdidyi…

^{Ch'est qu'il en falloait eune !} 

_{A Anmiens, quind o foait un molé ed musique, tertous el connoaiche. Chéquile ed Tournée Générale ! Achteure qu'ale est à Montdidyi, a fsoait quasimint 2 ans èque j'intindoais el litanie-lo :}

_{« Bon, quand qu'os allez vnir à Montdidyi ème vir ? »}

_{Pi surtoute, el gatte ! J'avoais mis dsur intarnet des réderies à vinde pi Chéquile ale o été ébeudie d'une vièle gatte avuc des bleuses fleurs d'ème grind-mère. « Qué bièle gatte ! Je l'vu pour mi ! ».}

_{I falloait foère el livraison...}

Chés boutiques ed Montdidyi

_{Pour vir des guénels pi des plantes cacheuses ed mouques, y o ch'fleurisse à couté del mairerie.}

_{Mon Lili, tchot café d' El Cigale, est fameux pour ses concerts ed musique.}

_{In plein mitan de l'boutique, un étal ed lives ed langue, tchulture pi histoère bien picard ! Ch'est l'Moéson del Presse.}

_{Boère un café… Feut aller à ch'café « Le Bourgogne ». Ch'est simpe mais erbéyez bien chés stucs ed fleurs drière ch'comptoèr.}

_{Acater du boin vin obin des bières picardes, ch'est à l'cave qui feut aller… El Tiotte Cave.}

_{A ch'Gardin Parmentier, feut aller au fond à gueuche pour aller acater un bocau d' aricouts ed Soéssons avuc du piment, ch'est fameux in apéritif !}

Montdidyi, chés molumints

_{Impossibe ed vir toute in eune jornée !}

_{Mais hérusemint Anne-Marie de ch'Cerque Maurice Blanchard, ale avoait chés clés ed quèques molumints.}

_{Os avons vu el Mairerie.}

Mairie de Montdidier = Pignon en pas de moineaux, Beffroi, Appareillage de double briques

Les Jacquemarts de Montdidier

_{Pi l'églisse de Sint Sépulcre}

Eglise du Saint Sépulcre à Montdidier

Mise au tombeau avec des sculptures du 16ème siècle de l'Ecole Picarde

_{Pi y avoait coèr à vir l'estatue Parmentier, ch'gardin japonais, el Salle du Roy, l’Église Saint Pierre, chés troès Doms, pi toute pi toute... !}

_{Os avons fini no voéyage avuc el réderie in plein mitan de ch' cinter-ville sins avoèr prind l'timps d'aller vir chl'esposition ed cartes postales à l'salle des fiètes pi minger du sauret à chl'harengade.}

_{Pour décoeuvrir Montdidyi, ses liux, ses molumints, ses artisses pi foère un boin séjour, y o un mot de passe ! Buquez à l'porte d'eune moéson pi dites « Caron » ! Ch'est simpe !}

_Nomdézeu !

Eune librairie à l'campagne

Des breumes dins ch'tan pi dins ses yus

^{Quoé qui feut point foère pour aller vinde un live in picard à chés gins in diminche !}

^{J'avoais décanillé avint ch'solé pour daller tnir un étal à Ch'Martché de ch'Terroèr d'Acheux.}

^{J'arrive dins ch'barnum pi lo, ch'est chés leumières qu'ales étoètent point décanillées. Une prise ed courant pus tèrd, ch'néon de ch'barnum i terluisoait. Ch'estand il étoait étampi in eune eure.}

Eune librairie à l'campagne

^{Ch'est déjo rère in ville mais à l'campagne, ch'est un miraque ! Des contes, des bindes à dessin, des lives dsur chés hortillonnages, des rimes. Y avoait ed toute déballé dsur chés tabes. A l'ombe de ch'drapieu picard, y avoait itou des réclames pour des verlées ed village, des cours ed picard pi à ch'rabout del tabe, eune muchosa pi eune épinette picardes.}

El pratique de ch'martché

^{Ales sont arrivées vers 11h d'avint-none mes pratiques senlisiennes. Chaque énnée, ch'est adité, ales vienntent acater un ou dus lives in picard pour eusses ou leus éfints. Pi à ch'départ, j'intinds toudis « à l'énnée preuchaine ! »}

^{Eune gin qui resse achteure in Bertagne vient m'vir : « J'avos agincé min tchul d'esmanne pour vnir in Picardie à coeuse que j'sus Picarde. J'o vu ch'martché dsur vo site intarnet pi me vlo ! » Ale m'acate dus lives pi j'li baille un collant « Mi, ej sus Picard ! ». Ale annonche sitôt : « J'vo l'mette dsur m'carette pour bisquer chés Bertons pi leu montrer qu'os avons eune lanke pi eune tchulture itou dins ch' nord ! »}

^{Bon, ben si chés rouches bonnets is débarqu'tent in Picardie, os seurons eddou qu'a vient !}

^Nomdézeu !

PS : Merchi gramint à Mme Lemaire pi ch'Comité des Fêtes d'Acheux pour leu atchueil !

Verlée d'Arro avuc des picards

Avisse ed timpête

A fsoait quèques moés qu'os avoèmes ahansé cho avuc chés carabins de ch'cours de picard ed l'IUTA : foère eune verlée à Arro à coeuse qu'os ons foait l'étude ed tesques in chti tout l'long ed l'énnée.

Du matin, à mitan décanillé avuc min café, j'erbéye chés neuvèles dsur intarnet.... Quoé que j'voés ! Du tan abonimabe, des Fins du Monne, des tortuwaraks, des vints à défriser eune berbis, des pleuves à gros yus qui s'annonchtent à l' Météo. Os n'vons point annuler... Quoé foère ?

Ouf, ch' est seulemint après 6 eures d'ermontée... Os érons l'timps ed foère no visite...

Arrivé timpe à Arro, on vo boère un tchot jus. El patronne ale nous dit : « N'vous foaites point d'mau, ichi os avons un micro-climat ! ». Nous vlo rassuré...

Ed Verdun à ch'Beffroé

Coupole du choeur de la Cathédrale d'Arras - (C) Crédit Photo Dumont 2014

Rindez-vous à ch'Cours ed Verdun avuc es borne del Voie Sacrée pi s'tiète de ch'viu molumint aux morts d'Arro. Un coup dz'iu à ch'erfuge ed l'Abbie Mont Sint Eloé pi direc à l'Cathédrale...

Dz'estatues vnues du Panthéon ed Péris, des r'liques ed Sints à foéson, un titiot christ récoué dins chés ruines de 14/18... Ch'est fin bieu !

Arrivé mon del Grinde Plache, os rinte dins un tiot café indsous chés arcades. Pi ch'patron fin fier ed nous atcheuillir à coeuse qu'il est ed Feutchières dins l'Sonme !

(c) Crédit photo Dumont 2014

Pi nos eutes, tourisses d'Anmiens, qui milent in l'air chés moésons de l'Grinde Plache, de l'Taillerie pi del Plache ed chés Héros avuc sin beffroé.

El Candèle pi l'Citadelle

Seurti ed chés plaches, os allons vir ch'téyate, el moéson Robespierre pi l'églisse ND des Ardents.

El Sinte Candèle - (C) Crédit photo Dumont 2014

Avuc un molé d'ieu touillé avuc de l'chire ed candèle, os pouvoez djérir d'eune maladie à ch'Mitan d'Age ! Apreu quèques pos, on rinte dins l'Citadelle...Os sommes émotionnés dvint chés noms ed soldats défunctés in 14/18 dins l'capelle Sint Louis mais ch'est foque eune frouette par rapport ch'mur ed chés 200 fusillés ed 39/45 par in bos de l'Citadelle.

(C) Crédit photo Dumont 2014

O finit par ch'timpe protestant d'Arro pi os ratourne à nos carettes...

Chés veudoèses pi chés draches à délaque is étoètent dins nos tiètes mais point dins chés ciux !!!

Nomdézeu !

Mettre du picard dans la tête des gens...

Des gins d'Harponville fin picards...

Eune erchon dsur chés politesses picardes

El 19 d'avri 2014, os étoèmes 10 à chl'atelier ed picard.

Il est 17h. Parsonne !

17h01 = Eune gin à pied pi un gin qui vient avuc s'moto à quate reules

17h05 = 10 parsonnes perzintes pour chl'atelier

Un momint de grind bonheur !

Marie-Jo, chés gins de l'Ferme d'el Grinde Djeule, Helene Destroy, Jasmine...

Ch'maire d'Harponville a assisté à tout l'atelier de picard !

On a débordé de plus d'une demie-heure !

« J'o jamoais été à l'école d'Harponville » qui dit min voésin d'rue originaire de Pas de Calais.

Bref.... Du Bonheur !!!!

Apreu chl'atelier...

El jornalisse de ch'Courrier Picard, ale attindoait à l'Salle ed chés fiètes ! Ale o vu parsonne !

J'o erchu itou un émile el lindmain d'un gin d'Harponvillle qui dit « Ch'français, ch'est du picard gadrouillé ! »

Jusse du bonheur !

Nomdézeu !

Quind chés portes ales ervindictent leus retraites !

Quind eune huche ale pète les gonds !

Diminche darnier, je vnoais ed freumer l’porte pi avuc ème feutchille, j’étoais in route pour ch’gardin pour mi coeuper des lanchrons à no lapan. D’un coeup, Sam ch’Corbieu il houpe = “Tio, os ons un problème !” Pire èque “Youstonne, os ons un problème !” Quoé qui s’passe don?

Ch’étoait no porte qu’ale avoait berzillé sin gond d’in heut!

L’ertraite à pusse ed 150 ans.

El porte-lo, je l’o toudis connu. Ch’est un modèle ed 50 ; point ed 1950 mais ed 1850 ! Il étoait timps pour ale ed prinde s’ertraite pi ale nous l’o bien ervindiqué !

Pindant quèques jors, seurtir del moaison, ch’étoait passier pèr l’étchurie…

El nouvièle porte

Ch’est une porte un molé maniérée qu’ale o erprind l’offiche.

Ale vient d’Artchèves. Os connoéssoez seurmint ch’poéyis-lo. Ch’est lo èque chés madjètes ales rintent dins vos moésons sitôt vos portes interbaillées ! Pourvu que je n’in ertreuve point eune dins min lit !

Nomdézeu !