Grinde réderie ed posses edmain à Anthènes…
El télé à Nikos, Nana pi Demis ale sro freumée à minuit.
Os allez pinser èque Tiodave il erbéye trop l’télé pi qu’achteure i vo débaler el vie ed chés fameuses gins dsur sin blog. Chés gins d’Grèce is sont des misères du diape pi Tiodave, li, i s’otchupe ed l’eure èque Nana Mouskouri, Demis Roussos obin Nikos Aliagas is freumtent leu télé ! Ch’est hontabe !
Rapinser à l’Chonq
In 1992, ch’étoait eune abomination ! Freumer eune caine ed télé in France ! N’est mie pinsabe ! El Chonq, ch’étoait eune caine moderne avuc des Patrick Sabatier pi Sébastien, Thierry Ardisson, Philippe Bouvard, Nagui, Morandini pi gramint d’eutes.
Innhui, el Grèce ale o décidié d’freumer ces caines ed télé publique.
Adé chés France 2, France 3, France 4, France O grecques !
Pus d’télé grecque…
L’télé défunctée, quoé qui vont foaire chés Grecs au soèr ? Boère un ouzo à ch’café du village… D’trop quèr ! pi d’abord, ch’café il est freumé. Aller vir un flim à ch’ciléma… D’trop quèr ! pi d’abord, ch’ciléma il est freumé. Resse pus qu’à aller s’jouquer… pi conme o dit : « Qui dort dine ». Bé don, vlo meume edz écolomies dsur sin minger !