Traduction "libre" en picard de l'avis municipal distribué
dans les boites aux lettres de la Commune d'Harponville.
NOMDEZEU
Ne pas être comme les autres, au fond c'est faire comme tout le monde... TIODAVE
Traduction "libre" en picard de l'avis municipal distribué
dans les boites aux lettres de la Commune d'Harponville.
Vive ch’drapieu picard
J’étoais à miler chés neuvèles dsur ch’arnitoèle quind j’voais cho = Le drapeau breton interdit aux Jeux Olympiques. « Bé don, chés Bertons qui foaitent coèr des siennes… » qu’èj m’dis à part mi. Mais l’affoère-lo n’étoait mie à ch’défilé ed chés poéyis par eune gin ed chés jueus mais pindant eune compétition, avuc un single espectateu dins chés tribunes !
Du brin pour ch’cours ed picard
Bon Tiodave, cha n’est mie grave… Bin sié !
CIO, Jeux Olympiques pi toute… J’trache dsur intarnet à n’oublier ch’cours ed picard qu’j’étoais in train d’foère.
Vlo ch’qué j’o déteupé =
Vlo ti point qu’y o des sports erconnus sins qu’is seuchtent dins chés Jux Olympiques comme ch’Bridge (un ju d’carte !), un sport ed tradition el Pelote Basque pi meume el Danse (ermuer conme un démazingué dins eune discothèque, ch’est un sport olympique !!).
Pi des nations qui sont erconnues meume si ch’est pon des poéyis = Le CIO reconnaît 205 comités nationaux, selon des critères différents de ceux définissant un État au sens du droit international. De nombreuses dépendances prennent ainsi part aux jeux sous leur propre drapeau, tel que les Bermudes, Porto Rico ou Hong Kong, alors qu'elles sont légalement parties intégrante d'un autre État. Depuis 1980, Taïwan participe sous le nom de Chine de Taipei, la République populaire de Chine refusant sa propre participation si Taïwan était présent sous le nom de République de Chine. Les Îles Marshall ont quant à elles été reconnues par le CIO le 9 février 2003. cf Wikipedia
Vivemint la Longue Paume, la Balle à la Main ou le Ballon au Poing conme jux olympiques que j’puche aller vir chés matches avuc min drapieu picard ! Pi si on m’impèque ed rintrer, je linchrai mn’anathème « Os sonmes eune nation, El Nation Picarde, edpus el 13ème sièque ! »
Coèr du sport à ch’poste !
I tchait du sport à délaque…
Edpus Roland Garros pi ses balles gannes, in passant par chés vélous de ch’Tour ed France pi pour définir Chés Jux Olympiques, o n’voét èque cho à l’télé…I tchait du sport à délaque dins vos boéyeux d’chervèle el long du jour !
El violenche ed chés sports
I n’o des gins qui vont romonier mais mi, j’ainme pon ch’esport. J’o été forché d’in foaire à l’école meume à pinser à m’pinde. Chés clercs, chés pitchoères, chés métchins, parsonne n’o comprind qu’j’ainmoais point ch’esport. Se batte (dins la vie, conte chés eutes) pour quoé foaire ?! Avoèr du mau à ses gambes, sin dou aprèu avoèr couru conme un dératé, o-ti du sins ?
Mossieu Collard ed l’Euniverchité d’Picardie il o foait eune étude rapport à cho.
Ermuer, ête téné
Si y feut ermuer à n’ête téné, allez don biner betterave, foaire chés moédeuts de m’éfanche.
Avuc Grébénote, ch’est feutcher edz’ortilles, porter des sieus d’ieu à l’moéson (pas d’ieu courante) pi d’eutes… Des maus à sin dou pi à ses gambes, je les ai sins avoèr à coeurir obin lancher des balles.
Chés sports picards
Pi chés sports picards qu’os allez m’dire, ch’est-ti eune abomination ? Chés jueus d’esports picards, is foètent cho pour leu plaisi ! Point d’tchestion d’salaires pi ed primes ! Pi à chés concours ed sports picards, ch’est eune fiète ed village d’où qu’y o del bière, des frites… Eune occasion d’avoèr ed l’animation dins chés poéyis picards… Ch’15 Eut à La Hotoé d’Anmiens, ch’est eune grinde ducasse pour ch’Ballon Poing ………. avuc des frites pi del bière !
Foque un jour
Ch’meudit jor
Ch’est un jor meudit pour mi… Sié, je n’sus pon républitchain ! A m’foait gramint plaisi d’apprinde èque Bieuvais is foaitent ch’fu d’artifu el 25 de ch’moé d’eut à coeuse de ch’tan ! Rindez-vous compte, Bieuvais qui foait el fiète nationale frincèse el lindemain de ch’jor del fiète nationale picarde !
Un boin age
Ch’ Maeva Bar à ch’wartier Sint Leu d’Anmiens, il o 1 an ch’13 juyet 2012. Ch’est don lo que j’o foait ducasse. Des joènes de 15 ans qui foaitent del boène musique, eune version rock ed Loir et Cher pi un boutchet de fleurs ed Grébénote.
Mi-vagances
J’sus achteure à l’mitan ed mes vagances. J’o point été bizir dsur chés bains d’mer ed Sint Wary obin à Fort-Mahon. J’o passié min temps à détriller chés tiloirs ed Grébénote pour ringer el moéson.
Chés instrumints du diape !
Déjouqué à coeups d'pipasso !
Apreu des fiètes conme os ons ieu sanmedi soèr à l'églisse d'Harcigny, sin tiot plaisi du diminche matan, ch'est d'resser incouvté dins sin lit. Du brin !... A 11 eures du matan, quasimint in pleine nuit, vlo ti point que chés pipassos is ercminchoètent à braire!
Ch'Pipasso Grinche Binde, cliquez ichi
Des musiques ed drones pi d'droles
Apreu-none, os ons intindu del musique espérimintale de Sam Corwynn avuc Tim de ch' Conservatoère ed Musique d'Anmiens.
Un momint incroéyabe qu'os ons vétchu avuc del musique juée par des pipassos pi un cor des Alpes.
Chouo pi ses amisses is nous ont foait un tiot bal folk.
Ch'bonus de ch' Festival
Sam il étoait in train juer dsur scène diminche pi d'un coeup inter dus morcieus =
André i crie à ch'pied del scène : Sam, quoé qu'tu vus boère? Eune bière, un pastis?
Sam : Sié, un pastis!
André : T'es sur? Pi tin camarate?
Tim : Un pastis itou
Eune minute pus tèrd, André il o berzillé ch'verre ed pastis dsur chés manicraques alectroniques. Un grind momint d'espectaque impreuvisé !
Jusse apreu avoèr jué de ch'cor des Alpes, vlo ti point Mr Lemoine qui désaque eune canne à pèque. Ch'est-ti qui vut péquer in plein mitan de ch'barnum? Nan ! El vlo à juer du cor avuc eune canne à pèque ! Sié, eune canne à pèque !....
Vlo eune foto avuc chés parsonnalités (ed gueuche à droète) =
Henri Briquet, Gilbert Beuvelet (ch'maire) pi Jean-Marie Braillon (Euniverchité picarde libe ed Quiérache)
Je ne l'o point in foto mais chl'Amiral des Forces Navales Libres du Vimeu i l'étoait lo itou !
Pi pour définir ch'Festival, os ons vu un bieu momint.
Sam pi Mario qui jutent dsur el scène!... Os connoaissez chés anges du Paradis. Mario, ch'est un ange ed Terre. Qu'il étoait ti fier conme un pape, d'avoèr jué avuc sin tambour !
Chés instrumints du diape !
Harcigny
Ch’est un poéyis d’Quiérache par indsous Vervins.
Ch’village il est connu pour Djuilleume d’Harcigny, el gayole drière l’églisse pi sin bal reulant à l’ducasse.
RENCONTRES DE LA MUSE A BRASSI
30 juin – 1er juillet 2012
Un stage pour impreuvriser
Avuc Frank pi Kika, eune dijaine ed musiqueux is ont apprins à impreuviser avuc leus voés pi leus instrumints.
VIDEO IMPROVISATION, cliquez ici
Un concert dins l'églisse Sint Martin d'Harcigny
Avuc Yo (flahute), ch’père Nortier (mindole), Sam (buquoèr) del musique del Renaissance
Pi del Musique Baroque avuc Chouo, ch'cornemuseu pi un grind musiqueu Julien Skowron
Pi apreu ch'erpas inter chés musiqueus pi ahanseus
Eune esgonde in pusse !
61 esgondes au moés d’juin
Os sonmes in rtard ! Ch’ Service international de la rotation terrestre et des systèmes de référence il o vu qu’os avoèmes eune esgonde d’ertard par rapport à l’Terre qu’ale fait sin tour sur ale-meume ! Ch’est don à l’darinne minute de ch’ 30 juin 2012 qu’os allons rajeuter eune esgonde. Y sro minuit à 24h 00 mn 01 s !
Du brin ! Y faro que j’travaille eune esgonde ed pusse gratis! J’vo perde 0,037 chintimes d’accatoèrs à l’fin de ch’ moés !
Dernière minute du mois de juin
Ch’SMIC il eugminte !
Ch’SMIC (S’Minger 1 tchilo d’Caviar) il eugminte ed 22 uros !
Avuc tant d’argint d’un coeup, j’vo povoèr m’poéyer eune apreu-none à ch’moédeut assis dins min cadou d’gardin à l’moéson … Ben sié, rester à n’érien foaire à s’moéson, a coute… avuc chés impots d’moéson, chés abonnemints d’téléfone, d’alectricité pi d’eutes!
Augmentation du Smic Juillet 2012
Cirtchulez, y o rien à vir !
Un fameu catieu
Lo, à quèques tchilomètes d’Anmiens, y o un catieu qui dort. Avuc chés darnières froédures d’hiver, chés remparts de ch’catieu d’Pinquigny i sont casuels. Pi chés Antiquaires ed Picardie qui in sont preupriétaires is ont du abolir à tertous d’y rintrer. Adé chés tourisses pi chés fiètes mitanageuses…
El route d’Anmiens à Advile
Ch’étoait lo à mi-route qu’y avoait un office de tourisme pour vous foaire vir chés catieus ed Belloy pi d’Ferrières, l’Abbie du Gard pi ch’clotcher ed Bourdon. Avuc l’aiude de ch’Consèl Général del Somme, is ont déménagé dins l’moéson d’écluse à Ailly. Adé chl’office dsur el vièle route…
Un chabot avuc eune candèle
Dins l’temps, o prenoait un chabot avuc eune candèle pour vir adou qu’eune gin ale s’étoait neuyée. Pi lo que ch’chabot i couloait, ch’est lo qu’y avoait ch’cadave. Innhui, ch’chabot il est in train d’couler à l'écluse d'Ailly…
Biétot, ch’est avuc eune ânme vuide pi triste que j’passero dins ch’poéyis d’chés Vidames d’Anmiens…
Des artisses qui sont nés
Tiodave téyatreu
Quièche qui s'raminteuve de ch'Gerfaut de l'télé?
Ch'est portant li Laurent le Doyen qu'il o yeu l'idée d'ahanser un estage ed téyate à Albert adou que s'fème Zélia ale étoait native. Un estage avec pusse de 20 parsonnes pi ed boènes souvenanches...
Pi apreu, os ons foait l'achuchon "les Enfants Terribles" avuc edz'amisses.
Ch'est lo que j'o jué min reule de "Léandre" ed Goldoni edvint 600 espectateus à ch'Téyate du Jeu de Paume à Albert !
Des pécavies tchulturelles
Ch'estage il o foait des invies pi des pécavies à quèques-uns.
Chitcatt = Quièche qui s'raminteuve Eric, vindeu ed téléfone portabe? Ch'est achteure un grind humorisse! Pi l'Montée d'Rire ale est fameuse !
Christèle = Quièche qui l'o connu dins eune pièche ed boulevard in robe longue obin avuc eune habillure ed pirate dins Peter Pan ? Ch'est achteure el dirigeuse d'eune interprinse ed fiètes Projaide 3D.
Emilie = Ch'étoait une jonne file polite dins nos pièches ed téyate. Ch'est achteure eune grimeuse à l'télé Direct 8 !
Tiodave = Ch'est mi avuc mes lanque pi tchulture picardes !
Fin fier que j'sus ed chés gins-lo qu'is ont sui leus invies !
El suite pétète ?
Ch'fiu ed min cousin, il o foait sin espètaque ed danse à ch'Téyate du Jeu de Paume.
Fin fier, il o annonché à m'mère = "Y o 30 parsonnes qui vont vnir !"
Ch'est pusse ed 400 espectateus qui étoètent lo !
Suire chés neuvèles...
Chés fans de ch'blog
Os êtes gramint à lire mes écrivures dsur Nomdézeu pi j'vous ermerchie vraimint.
Mais os êtes-ti abonnés à l'Gazette Grébénote? C'est gratuit !
Invoyéez un émile à grebenote@gmail.com pi os rchuvrez el Gazette ! Ch'est eune lirie d'eune page qu'ale est dépuliée tous les moés.
Os rprindez bien un molé d'picard ?