Un single chèque ed pusse…

Eune grinde neuvèle !

Judi 31 jinvier, tous chés picards is n’in pouvoètent pus…. Attinde el grinde neuvèle qui vo canger el vie ed chés gins d’Amiens, d’Adville pi d’eutes poéyis …

Pi d’un coeup, ch’est foait ! David Beckham i vo juer à ch’ PSG  avuc un salaire ed 800 000 uros pèr moés ! Ch’est eune boène neuvèle, énon ?

Apreu PSG, ch’PSJ

Mossieu Tamim ben Hamad Al Thani qu’os êtes cheikh, os pouvoez-ti foère un eute chèque?

El Qatar Investment Authority (QIA) qu’ale o des accatoères pour poéyer David Beckham quasimint 10 miyons d’uros pèr énée, ale peut-ti in mette d’eutes « David Beckham » in Picardie ?  

Avuc 8 « David Beckham » (80 000 000 d’uros pèr an), os pouvoètes rétampir l’église Sint Jacques d’Adville (15 000 000 uros) pi os pouvoètes racater l’interprinse GoodYear d’Anmiens (65 000 000 uros). Pi lo, os n’in treuverez des jonnes d’Anmiens pi d’Adville qui vous front eune étchipe ed fotballe qu’ale s’appellero PSJ « Pneu Sint Jacques » !

Nomdézeu !

Des gins ed tertous nos poéyis

Ch’est d’hasard èque  j’o tché merdi 13 novimbe 2012 sur el deuzième caine « France 2 ». Tchumadjet pi d’eutes, is l’avoètent annonché edpus quèques jors. Des picards, is alloètent passier à l’télé !

Nos amisses d’Occitanie pi d’Mars !

Chés Celtes avuc leus kilts is sont vnus ed  Mars ! Pon l’planète mais un titiot poéyis du départemint del Loère. Chés Celkilts is ont donné un sapré coeup d’cachoère à Brahms.

Vir ichi Celkilt.

Chl’occitan afflatoait avuc doucheur el musique à Verdi aveuc ch’troubadour ed Joanda.

Vir ichi Joanda.

Nos gins picards

Ch’pus jonne, ch’est MattRach. Ch’est un picardo-chti ed  Gommegnies près ed Bavay. Avuc je n’sais pon combien d’doégts, i vous décatouille dsur s’djuitare alectrique un air ed musique  décavlée ed Rossini.

Vir ichi MattRach.

Pi Zic Zazou, 30 énées qui sont fameux in Picardie pi zzé vlo chés gaignants ! Et dire qu’is ont foait Carmen ed Bizet avuc edz  aleumelles ed soé, des tuyeus pi meume des castroles pi des boutèles ed bière !

Vir ichi Zic Zazou.

Eune pinsée pour Meurice.

Qui doét-ti n'ête fier no défuncté Meurice Hoël èque sin fiu avuc Zic Zazou i gaingne ch’concours ! Pi qué tristesse qu’il o ieu hier avuc ch’Courrier Picard d'apprinde qu’ el Ferme d’Antan à Creuse ale vot freumer à l’fin de l’énée…

Nomdézeu !

Anmiens, un cant d’soèle

Ch’est biétot un camp d’soèle de musique qui vo n’avoèr à Anmiens.

L’atcheuil froéd

Ch’est l’tout darin liu ed concerts pi d’musiques d’Anmiens. Is sont in train d’escofier un papar d’un an d’âge ! Quièche qu’os allez m’dire ?! Ben la K…. !!! Je n’dis point ch’nom mais chés tchultureux is ont donné ch’surpitchet-lo à l’mairerie d’Anmiens.

Is sont arrivés timpe un matan que ch’café i l’étoait coèr in train d’couler dins l’minute. Des gins del mairerie, des pompiers pi d’eutes del conmission d’sétchurité, is ont ravisé chés coins pi chés racoins de ch’liu pi is ont dit «O freume ! ». Ch’est-ti qui minquoait un roulieu ed PQ dins chés cabinets, ch’est-ti qu’eune gin del mairerie ale est venue à un concert pi qu’os li ons seuvi eune bière avuc un trop molé d’mousse ? Je n’sais point, chés gins ed l’Atcheuil Froéd is savtent point….

Ch’grind wazoo

Ch’grind wazoo, ch’est un débit fameux pour chés musiques d’achteure. Gramint d’joènes pi viux musiqueux el connoaissent. Pour z’eutes, ch’est ch’ridieu d’fer peinturé par in bos del rue Vulfran Warmé à Anmiens. Sin cabartieu il o bien du mau edpus quèques temps à poéyer tout ch’qu’il o à poéyer pi il o quasimint idée ed freumer !

Pis un Grind Wazoo, ch’est pon un fénikse ; i vo pétète point ernaite ed ses chindes !

Pour les aidier

L’Atcheuil Froéd i foait eune signuralerie dsur chl’arnitoèle. ICHI !

Allez boère un coeup pi deux à ch’Grind Wazoo !

Bé, j’y rapinse ! Fidjurez-vous que ch’Grind Wazoo, il est jusse à coté ed chés fossoéyeux… Ch’est-ti eune prédission ?!

Nomdézeu !

PS (euh pardon !!! désolé !) AE pour Apreu-écrivure != Juste un rêve, que les artistes de Picardie pensent à mettre quelques mots de picard dans leurs prochaines productions ! Solidarité Culturelle Picarde !

Relisez mon article sur l'ACCUEIL FROID de mars 2012

Chés moésons posse-modernisses

Chés moésons d’avint
Os connoaissez chés moésons in briques de l’djerre ed quatore avuc leu style art déco.
Os connaissez ch’estyle moderne qu’o voét dins ch’cinter-ville d’Anmiens obin d’Adville, chés moésons Phénix pi Bouygues ou coèr avuc chés immeubes ed banliue. Ben tout cho, ch’est du viu ! Ch’est du patermone !

Chés moésons d’achteure

Os avoez seurmint ermartché edpus 20 énées que chés neuvèles batisses ales sont espéciales. Des colonnes, des frontons, des yus d’ bus, des voussures à chés farnètes pi d’eutes…

Meume si el moéson ale est commode pi « fonctionnelle » comme is ditent, i n’o achteure des guernitures d’architecture qui seurvent à rien pour foaire tnir el moéson.

Ch’est cho èch posse-modernisme !

A coeuse de chés baraques baroques

Chés améritchains is sont formidapes ! Apreu el djerre de quarinte, is ont ertiré chés cours d’Histoère ed l’Architecture ed quasimint tertoutes chés écoles d’architecture in Amérique ! Feut foère du moderne…

Hérusemint, Robert Venturi il o ieu idée ed foère un estage in Italie dins chés énées chinquante pi il o tché rédeu ed chés moésons baroques.

Chés batisses posse-modernisses

Allez vir Berlin pi chés nouvieux immeubes edpus 1980, l’Institut de ch’Monne Arape, l’Pyramide du Louves à Péris.

Ravisez chés gatchères ed fabrique rétampies.

A Anmiens, chés neuvèles moésons par in bos del cathédrale

A Plachy-Buyon, chés neuvèles moésons obin à Bresle ou coèr à Lamotte-Warfusée.

Tout cho, je l’o décoeuvert avuc ch’live « Les architectures postmodernes » ed Diane Ghirardo èque j’o li tout l’long de ch’moédeut.

Nomdézeu !