2 heures de bonheur à Bouzencourt lez Hamel

Ch’blason pi des gardins

J’avoais rindez-vous avuc ch’maire ed Le Hamel pour ingénier   eune balade dins chés marais ed Bouzencourt pour el 4 mai 2012 .

Eune moéson à côté del fameuse églisse, un coeup ed seurnette pi j’rinte…

Un blason del Picardie qui s’étampe dsur el cminée !

« Ca ne vous gêne pas si on prend les chiens ? » Bé non !

Un tchot jus avuc du chuque roux, chés tchiens dins l’carette pi on prind el Rue du Marais.

Lo, èj déteupe un camp ahansé in gardins d’ouvrieu. Chés consèleus municipals i n’y croyètent point… pi vlo èque chés aires ales sont pleines !! Pi y faro ragrindir !

Ch’cabaret Frumence

Au bout d’un tchul d’so, eune batisse à vinde. Ch’est l’guinguette ed Bouzencourt ! Eune moéson à l’abandon edpus chés énnées 80 mais à bonheur à vir ! J’ai des sintiboins ed canchons, ed musique, ed rires qui afflatent mes érelles rien qu’à l’erbéyer ! Croésez vos doégts ed main pi d’pied pour qu’a fuche à nouvieu un cabaret !

El Vierge ed Bouzencourt

El mairerie a n’avot point assez d’acatoères pour acater eune vierge dins chés réderies ed nos tchoins adon eune verlée au Portugal pi ch’est eune vierge ed Fatima qu’ale est lo dins l’capelle ed Bouzencourt.

Chés marais ed Bouzencourt

Du brin à chés carolines ! Un marais véridique sins abes, conme avint …

Infesté d’abes, ch’étoait un nid à bibaches. Achteure, ch’est l’berche ed chés langues ed vaque, ed chés rosieus pi ed chés tétarts. Rinconte avuc des jonnes qui mette du bos dins eune carriole : « Du bois, ça réchauffe quatre fois ! le couper, le charger, le décharger et le brûler »  

Eliott pi Vidocq

Chés tchiens is étoètent fin hérus ! Eliott i l’étoait tout l’timps dins l’ieu. Vidocq, os l’ons quasimint pardu près del « Seigneurie » edvint qui nos déssaque un chevreuil. Des canèrds, des cignes, des yeuves, is n’avoètent plein leus musieus à nifler !

J’agglave ed soé !

Apreu 2 eures à varonner dins chés marais, os étoèmes agglavés d’soé. Ertour à l’moéson de ch’maire… pi lo point ed caca-coula, ed jus d’orange mais du chide qui m’o perposé, ch’maire ! Ch’maire ed Le Hamel, il est picard que j’vo dis !

Nomdézeu !

Des terrorisses picards

Os n’avoez seurmint intindu parler èque ch’étoait el Smaine del Francofonie. Il falloait avoèr soin de sin parlage frincés. Point d’mots inglais ou coèr pire des mots ed patoés !!!

Bin des malaprins, des joènes à castchette, des meurdreus parlagistiques, is ont ieu l’aplomb d’foère un attintat ed parlage picard dins ch’wartier Sint Leu d’Anmiens en soérée.

Maeva Bar, ch’est un café del rue Sint Leu fin trantchille pi ed boène pratique. Vers 5 eures d’ermontée, un messache sur Tchulmadjet : Concert improvisé picard Happy Hour à 18h au Maeva Bar. Chés terrorisses is annonchtent leu attintat !

Chés preumiers is étoètent deux : un trafiqueu ed musique picarde pi un intégrisse picard in cadot à reules….

Pi lo des coses hontabes que je n’pus point vos raconter rapport à chés éfants qui porroètent lire min mot d’billet. Vlo chés fotos !

Is ont ervindiqué leu attintat rapport à chés mots picards défunctés à coeuse del politique parlagistique del France ! El virie ichi

No jornalisse ed Nomdézeu TV, il o pu prinde eune foto ed chés mimbes de ch’réseau terrorisse ed Sint Leu qu’is s'ramonchèltent souvint amon d’eune boutique ed lives « Book in the machine ». Un nom inglais qui s’affiche in plein mitan del rue Sint Leu !

Pi vlo el virie de chl’attintat. Béyez chés pauves gins estomatchés ed terreur pi  chl’Hotel-Diu d’Anmiens démazingué par el violenche de ch’carnage !

Nomdézeu !

Innhui, j'o abattu avuc min cousin ed Monteuban un abe qui avoait el pécavie de vouloèr afflater ch'toét del moéson avuc ses branques. A dus (min cousin pi mi), os ons foait  ed no miu. Ch'viu pouillier de m'grind-mère, il l'o fondu avuc chés darinnes branques tchaittes edsur.

A 3 eures d'ermontée, Douèr pi sin camarate del Fondacion Dech Patrimoène, is étoètent lo pour m'donner des consèls pour rétampir el moéson, chés granges pi toute. Pour chés espécialisses-lo, y feut démonter tout ch'crépi pi ch'chimint. Foaire séquir el resse à l'air libe pi apreu dminder à un artisan d'erfoaire el seule pi ch'seulin sins avoèr à démonter tout ch'torchis.

A preume vue, mi pi chés conselleus, os sonmes d'accordage =

Chés granges, ales sont d'apreu 1840 avuc el tcheuriosité d'avoèr des bos in frène décovert ed torchis.

El moéson ale est d'avint 1820 avuc sin four à pain pi l'porte de s'n étchurie qu'ale vo dins l'cambe.

Pour avincher, i feurot ed l'aiude!...

Ti, pétète ?!

Nomdézeu !

A feusoait gramint d’énées èque j’y rapinsoais à daller foaire eune verlée mon Marius !

Ch’est Thomas dech CPIE pi itou boin camarate qui m’o donné rindez-vous là-bos. Eune foés, el plache del carette treuvée, un récoeuffemint vo prind vo tchoeur. Ch’drapieu picard, fier conme Artaban, qu’i s’étampe à vos yus dins chés rues edvint chl’estaminet. Ch’est déjo del diversité signeulétique !

Os n’avoez point l’timps ed démette vo paletot qu’èch moaite des lius, Luc Decroix, vos foait eune pognée d’main franque pi amiteuse pi vos soète el boènevnue.

« Os voulez-ti un chucolat bien coeud ou eune gobe ed jus ? ».

Sié que j’réponds in coésissant un café. Pi qué fameu café ! Du picard ! Du vrai ! Chti-lo avuc del chicorée ! Qué bonheur ! Del diversité djustative….

Nom dé diu ! Nom des jux ! N’in vlo ti des gronnées d’jux ed toute seurte. Ch’ju d’dames il est meume ahotché àch plafond avuc ses pions. Un émotionnemint d’un coeup, lo… à gueuche de ch’bar, un gant foait ed tchuir pi d’bos avuc sin tamis. Ch’jus d’tamis qu’il o telmint d’mau à s’rétampir, il o s’plache ed souvenanche. Del diversité jueuse…

Os étoèmes lo pour chés « Eco-évènements » pi dviser ed nos espériences. Des faiseus d’festival, des gardineus, des cinsiers bio pi d’eutes, os étoèmes tertous lo pour rapinser à avoèr soin ed nos adjets.

Cmint qu’on ahanse chés cocarettages ?

Adou qu’o met chés eules ed friture ?

Mi, je n’foais pus ed réclamouques !

Des gattes in porchlaine dins un concert ed musique d’achteure ! N’est mie possibe por el sétchurité !

Del diversité ed chés fiètes…

Durant ch’diner, a dvise, a berdèle. Ed l’Oèse, ed Rouen, ed Bertagne, o vnons de grammint d’poéyis rapport à nos travails.

Ch’drapieu-lo edvint chl’estaminet, ch’est qué poyéis ?

Une réderie, ch’est eune brocante ?

« Is veultent quoi ? » Quoé qu’a veut dire ?

Pi Tiodave qu’il est lo terduiseu conme toudis

Del diversité d’chés lankes pi d’chés tchultures…

Ech CAT ed Gézaincourt, il est fameux !

Chl’aéro qu’os prindez pour vos vagances, chés egvilles ed montage… ch’est eux !

Ch’est itou 700 tonnes ed compost per énée pour vos gardins !

Del diversité des oeuvrages pi d’leus gins…

Diversité ed bétail, ed verdure, chl’artique-lo il est écrit in picard pour eune diversité itou tchulturelle. Soin à vos adjets !

Nomdézeu !

TRADUCTION EN FRANCAIS