24 juillet 2012
2
24
/07
/juillet
/2012
19:10
Nom d’un cabartieu !
Foaire vos commindes
Ch’cabartieu i n’sait point quoé qui n’o drière sin comptoèr…
Abaché drière ch’comptoèr à erbéyer chés boutèles mitant vuides, l’amiral Kerouak vo foait l’invintaire dech qu’y o à boère…
Chés boissons cmindées, i feut dminder à Marie pour avoèr chés verres qu’ale vo zé tracher à ch’tréfonds del tchuisine. Un cabaret picard que je vous dis….
Un défilé ed tertoute el Picardie
Chés gins à Kerouak (Marie pi Mario, Laurence, Valérie pi s’mère avuc ses 2 fius), Sam ch’faiseu d’muse pi d’pipasso, Marie-Greuète (Tchulmadjet) pi ses gins, sin fiu Ch’Nard ervenu ed Bertagne, is étoètent tertous lo el 21 juyet 2012.
Un cabaret picard
Lo, muché drière eune moéson, vlo eune fameuse adrèche ed débit d’diries picardes. Si os voulez inrager chl’Amiral Kerouak, dmindez-li del frênette obin du poiré ! I dirot « Infoiré d’Tiodave ! » in vous seurvant ! Ch’est local et typique !!!!
Nomdézeu !
Published by nomdezeu
-
dans
J'étais là
22 juillet 2012
7
22
/07
/juillet
/2012
21:03
El paroé picarde
Pose d’eune seule
Os ons point foait un montage avuc des mortaises pi des tenons mais moderne.
Sam pi Flip is ont passié eune apreu-none à monter ch’bindeu d’sablière pi el seule.
Eulage del seule
Eulage ed chés colombages
Pose de ch'bindeu d'seule
Pose del seule obin sablière
Ch'bindeu d'seule pi l'seule ahotchés
Des tchestions d’paroé
Il o fallut daller dsur el Paroé Picarde pour ène n’apprinde dsur chés paroés ed mur in torchis pi d’briques.
Rindez-vous pour un estage avuc l’amiral Keraouk…
Os ons appris cho =
Del chaux aérienne obin hydreulique, du sabe ed rivière pi à lapan, del tierre…
Des boutisses pi des panneresses…
Burer eune brique…
Foaire un gobetis…
Foaire un plafond…
Foaire edz écailles ed pichon…
Faire maigue dsur cras
Nomdézeu !
Published by nomdezeu
-
dans
J'étais là
20 juillet 2012
5
20
/07
/juillet
/2012
23:28
Mes queuqueus à vue d’coeuchie
Chint noms d’chimint !
Os savoez qu’à ch’moés d’mai, os avoèmes cminché à déssaquer ch’crépi pi ch’béton qui y avoait dsur ch’solin del moéson, pi meume du béton armé !
Mais i restoait coèr ch’mur del salle à minger pi in détapissant dins l’cambe, os ons décoeuvert itou du chimint armé à l’intérieur del moéson ! Un blockhaus èque ch’est El Ferme Grébénote, un abri atomique ! L’église pi ch’timpe d’Harponville is peuvtent grouler, el Ferme Grébénote ale sro toudis dréchée !
Ouvrir chés farnètes par in bos
El pus simpe pour aérer eune moéson est d’ouvrir chés dus battants d’eune farnète. Ben à Grébénote, os ons ouvert par in bos ed chés cassis !
Ch’est Sam ch’faiseu d’muse pi ch’carpintier d’Visse sur Authie qui z’ont foait du biel euvrage. Mais j’avouos un tracassemint d’tête : Je n’vus point que chés gins is erbéyent mes queuqueus dépassant del couverte, del rue quind j’dors ! Vir chés queuqueus à Tiodave pi aladon sin tchul !... Nan mais !
Eune plaque de palette pi vlo ème pudeur rapurée !
Des murs in lévitation
Avuc du torchis, os povoèmes avoèr des murs in lévitation…. Feut biéseur edz étais pi ch’mur in torchis i tient. Chés gins qui sont vnus nos vir is étoètent avuc des yux ronds conme des sougattes à vir ch’qu’os faisoèmes. Allez don erfoère un mur in parpaings in cminchant par in heut ou au mitant !...
Nomdézeu !
Published by nomdezeu
-
dans
J'étais là
27 juin 2012
3
27
/06
/juin
/2012
22:23
Vive l’Amiral Kerouak !
L’Amiral Kerouak
Amiral Kerouak, Commindant ed chés armées navales de ch’ Vimeu, ch’est un tite important !
Os volez connoaite ch’Vimeu…. Prindez rindez-vous avuc li !
Ch’est un héros del Picardie qui connoait chés mers, el côte Picarde, chés tchottes histoères de ch’Vimeu conme el Grande (d’Histoère) pi itou toutes chés serrules vimeusiennes conme un conterbindier qu’il est.
Un Géo Trouvetou
Ch’est li qu’il o treuvé commint graissier un tour à bos !... Avuc du brin d’aronde…
Ch’brevet il est déposé sous ch’liméro 4754774*** à l’Inpi.
Ch’est li itou qu’il o invinté eune animation formidape connute dins ch’Monne Intier = ch’Concours ed Jteu d’Epinette Dins l’Pâture d’A Côté.
Des neuvèles ed Kerouak ?
Quind os ons des neuvèles ed li, ch’est toudis des neuvieustés ! D’un coeup, i rétampe un flobart ; d’un eute, il écrit un nouvieu live qui sro jamoais dépulié obin il o réchué eune tonne ed miel avuc ses catoères, eslon ses diries.
Une bièle moéson
Ch’est un tchoeur picard no Kerouak. Sins mintir, ch’est min pus grind amisse de l’histoère de m’tchulture picarde à mi ! Pi il o eune bièle moésonnée, avuc ès fame pi ses dus fius.
In dvisant d’moéson, vlo quèques fotos ed sin euvrage pour rétampir ch’pignon de s’moéson.
Nomdézeu !
Published by nomdezeu
-
dans
J'étais là
23 juin 2012
6
23
/06
/juin
/2012
13:07
Ch’tan ed chés fiètes…
Ch’tan décagné
Ch’tan il o décidié ed voloèr dinser itou.
A coeuse d’ernu pi d’timpète annonchés, grammint d’Villes ed Picardie ales n’ont point foait leu Fiète del Musique.
Un abri atonique à Anmiens
Conme os l’savez el 21 juin… ch’est l’djère ed chés musiques ! Mi, èque j’o des érelles casuelles, j’o préféré rester dins ch’wartier Sin-Leu putot qu’daller dins ch’fu del djère atonique.
Thomas (in vert) à la doudounette, Sam au bodhran pi Hervé à l'épinette
Sam Corwynn avuc une bièle rope pi eune muse à brassi (el cornemuse)
Ch'bouquinisse del rue Sint Leu il o dépinsé
gramint d'ergint pour annoncher chés concerts !!
TROIS VIDEOS DU CONCERT
Published by nomdezeu
-
dans
J'étais là
17 juin 2012
7
17
/06
/juin
/2012
15:40
Forcheville i fêtoait ses âges !
Edpus 15 jors, l'affiche ale est dsur l'pincarte
à l'intrée d'El Ferme Grébénote à Harponville !
Erbeyez ch'menu !
10 plots qui y avoait à minger in pusse de chl'Hypocras (ch'vin) !
A 6 eures d'ermontée, Laurent Devime pi el Compagnie Picaresk
is ont foait un espectaque ed cabotans picards
avuc Lafleur pi ses camarates.
Pindant ch'temps-lo, chés jonnes pi chés moins jonnes
is ringent chés ballots d'feur !
Pi au soèr, os ons bien dinsé avuc Amuséon pi leu pipasso (el cornemuse picarde) !
Vivemint 2013 pour fêter chés 1351 ans ed Forcheville !
Nomdézeu !
Published by nomdezeu
-
dans
J'étais là
22 mai 2012
2
22
/05
/mai
/2012
21:39
Des dius d’Amérique, d’Afrique, d’Inde pi d’eutes poéyis
Chés voésinnes, chés invités pi chés gins del moéson...
Delsy
Ch’est eune tchienne houvite dins s’jonesse. « Ale est si tant » qu’o porroait dire pi ch’est l’signifianche ed sin tiot nom mon chés indiens d’Amérique.
Inti
Marché, ale m’o bien milé ! Ale avoait ses yus qui dardoétent conme ch’solé. Mi que j’sus rédeu d’chés Incas, is m’avoaient bistoqué lo leu pus grind diu, ch’diu solé !
Chés vaques
Ch’est des vaques saprées èque j’o conme voésinnes !
Gao Mata ed chés Indiens, ch’est no manman à tertous, douche pi amiteuse.
Audhumla ed chés Vikings qu’ale est l’preume à avoèr norri eune gin pi meume un gayant !
Damona ed chés Gauloés qu’ale donne à chés gins el djérison pi el prospérité.
Chés érignies
Anansi, ch’est eune érignie d’Afrique qu’ale erprésinte el sagesse pi qu’ale o donné à chés gins ch’savoèr del agriculture.
Arachné, ch’est une jonne file qu’ale fésoait des toèles si bièles qu’Athéna n’étoait jalouse.
Ch’est itou l’âme d’eune gin pour chés gins d’Sibérie pi chés gins du Vietnam.
Avuc autint d’erligions pi d’dius, j’croés vraimint qu’El Ferme Grébénote ale est béni des dius conme sin grès qu’il est bénote !
Nomdézeu !
Published by nomdezeu
-
dans
J'étais là
21 mai 2012
1
21
/05
/mai
/2012
20:46
Chés hourets ed Picardie
Ch’carpintier ed Vitz
Chico, ch’carpintier de l’vallée del Authie, je l’o mérié conme erprésintant de ch’maire ed Gardincourt. Ch’est un tchoeur sitant bieu que ch’bos qu’il prind pour vos foaire vos armoères. Avuc li, chés portes is étoètent foaites à l’bout d’une minute.
Ch’garagisse de Flixecourt
Ch’Nard, ch’garagisse, il étoait lo. J’avoais point d’carette à rétampir. Mais sin savoèr pi ses soudures, ales ont été fin boènévues pour freumer el cinse avuc eune grille. Ch’contermoète, ch’étoait sin fiu ed dus ans, Robert.
Ch’wardjet d’Corhatille
A l’acouter, y o eune tortute, un tigue, un doudou pi un serpint dins m’ferme pi alintour ! C’est-ti un zoo qu’i feut que j’foèche ?! Evnu ed Quiérache, ch’wardjet il o passié eune après-none à miler, raviser chés liux pi foaire des cartchuls ed Vint d’Ieu pour nous aidier à ahanser chés batimints.
Sint Bricard, priez pour li !
Bié seur qu’il étoait lo ! Chl’Amiral Kerouak i l’étoait vnu conme ambassadeur de ch’Vimeu. I l’avoait récoué quèques cadnos pi serrules « made in Vimeu » pi pour mi, ch’est un bonheur ed vir des freumetures picardes à no moéson.
Marie Maisnières
Ale étoait partoute ! Marie à ringer du bos, Marie à coper des branques, Marie à lavinder…
J’y ai meume dmindé consèl pour monter l’boète à lette rapport àch qu’ale est factrice.
A chés élections 2012 ed député dins ch’Vimeu, j’vous donne min avis = VOTEZ Marie Maisnières !
Nomdézeu !
Published by nomdezeu
-
dans
J'étais là
20 mai 2012
7
20
/05
/mai
/2012
19:13
Del civilisation picarde à Grébénote
Pour bien connoaite no parlage pi no tchulture, feut comprinde ed preume el civilisation pi el filosofie del Picardie. Eune gin dsur chl’arnitoèle ale o écrit un coeup : « La civilisation sans la Picardie, ce serait aussi absurde qu’un poisson sans vélo ! » Ch’est eune vérité èque chés gins ichi is ont à tchoeur pi El Ferme Grébénote ale vut apporter ed grindes idées à chés civilisations.
Des cabernes à pannes
Dins no ferme, os n’ons point d’caberne à lapans mais des cabernes à pannes !
I feut leu donner de l’ieu, un molé d’mousse pi d’lichen pi os avoez eune calée d’tchottes pannes in moins qu’érien !
Un martieu à ferrer chés lapans
Os étoèmes à foaire chés ferrules del grille d’intrée pi os avoèmes bien du mau à treuver ch’martieu qu’il falloait. Adon os ons caché apreu un martieu pour mette des fers à chés lapans. C’est un martieu espécial qu’il est bien muché dins toutes chés ferrailles d’une cinse !
Des fers à gvo, j’in ai à l’gronnée dins l’cinse mais si os avoez à vo moaison un fer à lapan, je vous l’acate !
Des visses à feur
Si os volez foaire eune paroé dins eune gringe, foaites edz écolomies ! Montez un mur in ballots d’feur pi au mitan, montez eune porte. El pus durte à treuver, ch’est des visses à feur pour fixer l’incadremint dins chés ballots…obin des cleus, ch’est aladon !...
Nomdézeu !
Published by nomdezeu
-
dans
J'étais là
12 mai 2012
6
12
/05
/mai
/2012
19:30
Une sorte de portes ouvertes
Des éfants d’Harponville -1
Os avoèmes cminché à dégonner el grinde porte quind ch’malheur i l’est arrivé. Eune dijaine d’éfants jouètent à ch’timpe quind j’voés qu’is s’étoètent rassimblés tertous à ch’pied del grange. Quoé qui s’passe ? Un oésillon qui l’étoait tcheu d’sin nid !
« Adou qu’ale est sa manman » qui dit l’un in lvant ses yus in l’air.
« Feut l’ermonter dins sin nid » dit l’eute in erbéyant jusse indsous ch’toét.
El grinde porte - 1
Avuc min cousin, os ons bien ieu du mau à défoaire chés portes. Ales avoètent un poéds d’voleu ! Eune foés dégonnées, os les ont mis dsur l’ermorque pi ringer conte un mur dins chl’hangar.
Des éfants d’Harponville - 2
Pindint ch’timps-lo, is étoètent tertous alintour de ch’pauve moéneu qui devoét avoèr des freus du diabe. « Os allez li foère peur ! Allez putôt li cacher eune boète pi du coton pour qu’il euche coeud ! » Quoé qu’j’avoais point dit lo ! Ch’est eune organisation militaire qui s’ahanse ! Eune tiotte fille qui part in courant à s’moéson pour el boète pi un fiu avec sin vélou qui r’monte ahite ahite el grinde rue pour ch’coton !
El grinde porte – 2
Un coeup d’grillage cleué à l’intrée de l’cinse pi os attindro el smaine prochaine pour foère eune neuvèle porte.
Des éfants d’Harponville – 3
Il est 4 eures d’ermontée, èj tchitte el Ferme Grébénote sins porte pi j’arrête ème carette à ch’timpe adou qu’tertous chés éfants is sont coèr lo. Ch’est eune gayole à moénieu qu’ale atcheuille ch’paure lazare. Du blé, de l’ieu, del paille frèque. Cha vo ête un drame si y défuncte.
Histoère ed portes ouvertes
El grind porte de m’grind-mère ale est à rado dins chl’hangar pi mi j’sus fin héru d’vir des nazus d’Harponville qu’is ont l’porte de leu tchoeur grind baillée pour un titiot moénieu !
Nomdézeu !
Published by nomdezeu
-
dans
J'étais là
