A ch’martché d’Acheu, ch’picard est heureux…

Des breumes dins ses yus

“Il est 6 eures, vote gazette du 6 octobe….” qu’il o brayé ch’radio-réveil fin timpe au matan ! Un tchot café, eune trimpette ed pain, un coeup d’ieu dsur s’giffe… I falloait ête aheuré à 7 eures àch martché d’Acheu margré chés breumes. J’avoais dmindé eune tabe. Je n’o ieu 2 !!! J’avoais don del plache pour foaire min étal ed lives pi ed disques.

El pratique

El pratique ale o rademint arrivée.

“Chés gins i veultent pu parler picard! Ch’est hontabe !” qui m’dit eune gin d’Puchvillé à 9h30. “Mi, j’vo à ch’martché d’Dourlins. Bin chés marcands is n’comprintent point quind j’parle picard! Meume chés vius d’em âge, j’leu parle picard pi is m’répondtent in frincés ! A foait plaisir de vous vir ! “ Alintour dins tout ch’barnum, tertous étoètent à nous rbéyer à dviser in picard.

“Ben sié, qu’i feut acater picard !” qui disoètent chés gins tout heut in béyant mes réclames avuc ch’eslogan “Acatez picard !”.

“Ch’tchot capuchon rouge in picard ! Bé, j’vo l’acater in cadeau d’Noé à min fiu qu’il est parti à Reims."

“Des lives in picard ! J’vos acate chti-lo pour apprinde à mes élèves.Os allons démucher chés parlages du Monne et y m’feut du chti pi du picard.” qu’ale dit l’maristeuse ed Candas.

“Visiter Harponville ! Os n’savons mie ! Ch’est vous Tiodave qui feut réserver?”

Chés guénels

CREUSEZ VOS GUENELS AVANT LE 31 OCTOBRE in pincarte dsur min étal.

Pusse de 20 foés qu’j’o esplitché quoèque ch’est qu’eune guénel.

“Bé don, je n’savoais mie ! J’vo dminder à min voésin eune bétrafe à chuque pour el foère ! “ qu’ale dit eune gin d’ Senlis.

Esn' amisse ale y répond : “Bin, t’in voles eune dins chés camps, y véro mie ! “

J’o idée que ch’chuque ed bétrafe i vo eugminter in 2014 !

Nomdézeu !

Pinsez picard !  

POPAUL = Bé Néné ! Bébert il est défuncté ! Os l’ons ertruvé dins s’cave incoufté dins eune vièle couverte, mort ed sin boin somme. T’es lo ti connu Bébert qui passoait du matan dsur s’mobylette, avuc sin cageot par drière adou qu’i avoait toudis des lanchrons pour li donner à ses lapans. Meume in hiver, par moins tchinze pi un mète ed neiches, il avoait des lanchrons dins sin cageot.

NENE = Mort dins s’cave ! Quelle idée d’aller définir dins s’cave !

POPAUL = Bé don, i restoait mie pu dins s’moéson rapport à ch’toét qu’il étoait pus treué qu’eune dintèle ed Calais !

Un jor ed pleuves, il o tcheu quèques gouttes dsur s’tabe ed salle à minger. Il o don mis un bol pour récouer l’ieu. Quèques moés pus tèrd, il pleuvoait dins s’tchuisine pi il o mis eune castrole. Pi un jor, il o pleu dins sin lit, il o mis eune bachine… A forche, y avoait sitant d’gobes, d’bols, d’castroles, d’bachines dins s’moéson, qu’i n’avoait plus d’plache. Pi il o décidié d’aller vive dins s’cave…d’où qu’il est mort !

NENE = Pi il o jamoais pinsé à rmette des pannes adou qui avoait des treus dsur sin toét ?

POPAUL = Il étoait picard, li ! Pi y pinsoait picard ! Point conme ti, à pinser frincés !

Nomdézeu !

El preume du 21^ème sièque

Porche ouvert à Grébénote

Par indsous ch’porche Grébénote, un boutchet d’fleurs dsur l’boète às lettes, des pincartes in picard, des vièles cayèles, quèques bincs pi ch’drapieu picard, vlo chés guernitures de l’preume fiète ed la musique du 21^ème sièque à Harponville. 

Chés musiques

Barbara ed chés carolines ale nous o jué à coeup ed saquesofone « Tiotte Fleur » pi « El Vie in Rose ». Christian pi Yo, i sont vnus espécialemint ed l’Oèse pour nous foaire décoeuvrir des musiques del Ernaissanche. Tom, no permatchulteu, il o jué des canchons à l’djuitare. Pi Tim il o jué des musiques alectrocaustiques avuc Sam ch’Corbieu.

70 parsonnes dsur 168 habitants  (42%) qui sont vnus.  A Anmiens, à Albert, Dourlins obin Corbin, ch'est-ti miux?

Barbara au saxophone

Sam (percussion), Yolande (flûte), Christian (mandoline)

Thomas, le permaculteur, à la guitare

Ch’fu du 21 juin

El soltisse, ch’est ch’jor el pus lon ed l’énée. Un sapré jour pour Belenos, ch’diu gauloés.

Ch’est avuc un tiot fu dins l’cour ed l’cinse Grébénote qu’os o défini el fiète à musique pi à dinser mon Harponville.  

Hontabe à n’in dminder l’abolicion ed chés gins-lo de l’Nation Picarde, des gins estrémisses qu'is ont foait el fiète à Pinquigny por el soltisse ! Sint Drisse, soéyez à leu tchul !  

Nomdézeu !

Eune fiète picarde

Ch’maire il o dit oui

Ch’étoait à l’ducasse d’Harponville el 20 moé 2013…. 

Mi = Avuc ch’Corbieu, os ons invie d’foère el FIETE ED LA MUSIQUE el 21 juin à Grébénote.

Monsieu Renaud (ch’maire)  = Bié sur, pas d’problème. Os mettrons des barrières dins chés rues pour ralintir chés carettes.

Ch’café Rachelle

Ch’café Rachelle, ch’étoait un café pi itou, dins l’cour, un baraquemint in salle de bal. A ch’timps des yéyé pi de ch’Rock n Roll, chés joènes is tréseutoètent grammint dsur ch’plantcher viu, moési pi vermolu. Ch’mari Rachelle, il étoait lo !  Pindant ch’bal pi l’soérée, une planque berzillée, ch’marie Rachelle i mettoait eune neuvèle planque pi des cleus avuc un coeup d’martieu. Pi ch’étoait erparti !

Ch’café freumé,  conme Olga qu’ale ressoait à l’étchurie,  ch’Frisé pi s’fème Chantal, is sont habités dins ch’bal.

15 jours edvint l’FETE DE LA MUSIQUE 2013

Hier, j’o été foaire quèques acats à Acheux. J’voés chés cadoreux mon ch’Frisé. Is l’connoèssent, ch’est eune simpe visite (in à part mi).

Innhui, j’ai foait tertoutes chés boètes às lettes de ch’village avuc mes réclamouques.pour le 21 juin.

A apreu-none, j’apprinds l’neuvèle ! Ch’Frisé, il est mort !

Nomdézeu !

Ch’est l’fiète à mes voésins….

Des voésins à 1 tchilomète

Efant, j’restoais avuc mes parints amon el ferme avuc troés grinds tillés pardue dins chés camps. Min preume voésin, à 1 tchilomète d’à long , ch’étoait chl’épicier qui fsoait ch’tour de chés poéyis avuc sin barou carqué ed toute seurtes ed coses. Y avoait itou ch’père Boulain qui fsoait sin gardin à l’ermise Agathange, près de no moéson pi qui vnoait acater des us. In dvisant, o inrouloait chaque eu dins du papieu jornal pi o zé mettoait dins sin pénier.

Chés voésins d’min preumier logemint

Eune grinde pièche avuc un clinquetoque, un tchoin d’tchuisine , un placard pi chés barous de ch’tri postal qui passent el long del nuit edvint vos farnètes, ch’étoait min prumier logemint à mi dins ch’wartier Sint-Acheul à Anmiens. Ch’voésin d’in bos, ch’étoait une gin ed la Légion qu’il étoait rédeu ed canaris, ed coulons, d’inséparabes. El voésinne d’in heut, un coeup, ale o volu ermette de l’motchètte neuve. Eune planque de ch’plantcher décleuée, pi vlo qu’ale o décovert des drogues indsous ! Del coke…point à boère mais del pourète à rnifler !

Chés voésins d’Anmiens-Nord

Coèr pour quèques moés, j’sus dins un casernemint mon Anmiens-Nord. J’o toudis souvenanche de ch’ « boum » intindu à ch’plafond. Dus jors pus tèrd, o déchindoait min voésin ed par heut dins sin luzet. Un moés pus tèrd, j’intindoais des « Oh oui ! » ed chés cabrioles ed chés dus nouvieus joènes locataires. Qué plaisi d’ouvrir s’porte un diminche matan pi d’vir un so d’bannanes à ch’pied. Vo voésinne d’edvant, ale avo été à l’fin de ch’martché du Colvert pi ale avouot récoué des lédjeumes pi des fruits qui alloètent  daller à chés poubelles.

A défeut d’fiète avuc mes voésins d'achteure, vlo eune ducasse à mes voésins à mi!

Nomdézeu !