2 heures de bonheur à Bouzencourt lez Hamel

Ch’blason pi des gardins

J’avoais rindez-vous avuc ch’maire ed Le Hamel pour ingénier   eune balade dins chés marais ed Bouzencourt pour el 4 mai 2012 .

Eune moéson à côté del fameuse églisse, un coeup ed seurnette pi j’rinte…

Un blason del Picardie qui s’étampe dsur el cminée !

« Ca ne vous gêne pas si on prend les chiens ? » Bé non !

Un tchot jus avuc du chuque roux, chés tchiens dins l’carette pi on prind el Rue du Marais.

Lo, èj déteupe un camp ahansé in gardins d’ouvrieu. Chés consèleus municipals i n’y croyètent point… pi vlo èque chés aires ales sont pleines !! Pi y faro ragrindir !

Ch’cabaret Frumence

Au bout d’un tchul d’so, eune batisse à vinde. Ch’est l’guinguette ed Bouzencourt ! Eune moéson à l’abandon edpus chés énnées 80 mais à bonheur à vir ! J’ai des sintiboins ed canchons, ed musique, ed rires qui afflatent mes érelles rien qu’à l’erbéyer ! Croésez vos doégts ed main pi d’pied pour qu’a fuche à nouvieu un cabaret !

El Vierge ed Bouzencourt

El mairerie a n’avot point assez d’acatoères pour acater eune vierge dins chés réderies ed nos tchoins adon eune verlée au Portugal pi ch’est eune vierge ed Fatima qu’ale est lo dins l’capelle ed Bouzencourt.

Chés marais ed Bouzencourt

Du brin à chés carolines ! Un marais véridique sins abes, conme avint …

Infesté d’abes, ch’étoait un nid à bibaches. Achteure, ch’est l’berche ed chés langues ed vaque, ed chés rosieus pi ed chés tétarts. Rinconte avuc des jonnes qui mette du bos dins eune carriole : « Du bois, ça réchauffe quatre fois ! le couper, le charger, le décharger et le brûler »  

Eliott pi Vidocq

Chés tchiens is étoètent fin hérus ! Eliott i l’étoait tout l’timps dins l’ieu. Vidocq, os l’ons quasimint pardu près del « Seigneurie » edvint qui nos déssaque un chevreuil. Des canèrds, des cignes, des yeuves, is n’avoètent plein leus musieus à nifler !

J’agglave ed soé !

Apreu 2 eures à varonner dins chés marais, os étoèmes agglavés d’soé. Ertour à l’moéson de ch’maire… pi lo point ed caca-coula, ed jus d’orange mais du chide qui m’o perposé, ch’maire ! Ch’maire ed Le Hamel, il est picard que j’vo dis !

Nomdézeu !

DISCOURS DE MANDAT D'UN LAFLEURISE

Selon les derniers sondages

Ej vu ermercier tertous chés académiens qu'is ont ieu fiate à mi ! Ch'est un grind honneur pour mi d'avoèr min nom dins chés chuqueulafleurisés. J'in sus coèr tout émotionné....

Remerciements

Merchi gramint à =

Mr Renaud, ch'maire d'Harponville, qui m'o foait connoaite TERTOUS à l'âge ed 20 ans.

Laurent Devime qui l'o mis ème main, min tcheude pi min bros intier dins chés espectacles picards.

Eme grind-mère qu'ale dvisoait picard pi coèr toudis in 2007.

Pi tertoutes chés gins qui m'ont aidié pour ch'parlage pi l'tchulture picardes.

Ch'prix-lo, i s'ro bin visibe inter ch'calindrier ed chés Postes pi l'télé sur el traite picarde ed no moéson !

Des sondages incertains

Des maudiseus is ditent que ch'est des jornalisses qui éroètent ch'prix ed Lafleur ed Chuque 2012 à l'plache ed mi !!

Je n'pu mie magineu èque des cabales jornaleu-politiques is ieuchent pu imporviner chés cahuètes de nos braves académiciens !

Si ch'est véridique, ch'est un bel hommage à Sabine pi Bernard, des picards ed jornalisse, qu'is ont à tchoeur no parlage, no tchulture pi no poéyis !!!

 Nomdézeu !

NB = C'est le premier avril !!!

Ervnu d’eune série à Sint Leu, j’o foait eune verlée à un liu cavéoute d’Anmiens.

J’imagineu vir toute seurte de mawaises gins. Eme carette plachée, quèques pos in défilé dins des colidors pi à gueuche un atcheuil in canapé. Ch’est don lo l’Accueil Froid Salon de Coiffure ?! Del musique d’achteure pi des joènes !!! Vlo-ti don chés bas-fonds d’Anmiens !?

Un liu cavéoute que j’vous dis !!! Soin ! Os sonmes in 2012 ! Is ont point oblié ch’lumion del porte ed seurtie, chés éteigneus pi ch’est rédeu d’vir eune gin vnir ramasser chés gobes vuides à msure tout l’long del soérée. Del cavéoute à l’seuce 2012…

Del boène musique, des gins qu’is baltent, qu’is acoutent, d’eutes qui dvistent à ch’comptoèr avuc eune bière à prix d’amisse.

Et dire èque ch’est des éfants ed gins del langue pi del tchulture picardes qu’is m’ont parlé de ch’liu-chi !

Ch’darnier coeup qu’o m’o parlé d’un liu cavéoute ed musique à Anmiens, ch’étoait coèr à coeuse ed gins matchés ed parlage picard, un liu ed chés Indiens Picards qu’os appelle achteure « La Lune des Pirates ».

Si chés éfants ed picardisant is continutent comme cho, os érons pusse ed 100 lius pour chés artisses alintour d’Anmiens !

Un atcheuil froéd comme o, j’in vu tous les jours !

Nomdézeu !

Innhui, Jean Caron i m’o dmindé de vnir àch’Cinte Tchulturel Léo Lagrange à Anmiens pour dviser ed chés canchons picardes avuc des parints pi leus éfants. Os ons d’abord parlé ed chés surpitchés rapport à l’mienne Tiodave.

Os ons déteupé chés canchons frincèses del Picardie conme Amant de Saint Jean, Réveillez-vous Picards ou coèr Roses de Picardie. Pi apreu, j’leu ai amoutré el canchon « Le lion est mort ce soir » que j’o terdui in « Cheg gvo est mort pèr nuit ». Ils l’ont treuvé rétuse pi on l’o canté tertous insanne. Point tchestion d’oblier « Madame Duvivier ». Eune canchon à canter pi itou à danser ! Is ont vite apprinds chés pos tout in apprenant chés paroles. Des espécialisses quasimint !

Pi pour treuver pi déteuper des mots picards, ch’étoait un festival !

D’un gvo os ons passié à chés vaques, chés vieus pi chés vius avec des cayèles ou des cadots. Chés jonnes is étoètent ébeudis d’intinde chés mots picards qu’os avons pour chl’arnitoèle. Pi « lol » sero biétôt rimplaché par « ddr » (défuncté d’rire) sur chés preuchains émiles ou chés tecstos ed chés jonnes.

Chés gins fin hérus d’intinde pi ed décoeuvrir du parlage picard mais il déjo l’eure ed finir.

« Tiodave, edmain, ch’est chés ages à manman, cmint que je pu li canter ?! »

Un boin âge à ti z’eute, Un boin âge à ti z’eute, manman,Un boin âge à ti z’eute….

TRADUCTION EN FRANCAIS

Nomdézeu !

Ses « blancs » qu’on n’aime pas

Sins cartchulateur

Edpus Sanmedi, j’étoais sins cartchulateur. Adon impossibe de m’vir dsur intarnet…

Ch’étoait un blanc ed Tiodave dsur ch’wèpe.

Des blanques neiches à l’télé

Jusse pour dire adé à des gins défunctés qu’is étoètent fameux à l’télé à leu fachon =

Gérard Rinaldi ed Chés Charlots pi Marc et Sophie 

Didier Destal, chl’epsycologue del preume émission ed téléréalité « Loft Story »

Jacques Francini, ch’clone ed « La Piste aux Etoiles »

Pierre Tornade, ch’capitaine Dumont de « La 7^ème Compagnie »

Michel Duchaussoy qu’il o jué Abraracourcix dans ch’flim «Astérix et Obélix : Au service de sa Majesté » qui seurtiro au ciléma in octobe 2012.

Des blanques âmes

J’in sus coèr émotionné… Des éfants avuc coèr du lait à leu naze qui défunctent dins un acsidint d’eutocar in Suisse. Un blanc d’silinche qu’os ons intindu innhui à 11 eures du matin in Belgique… Mes pinsées pi amitiés à nos amisses flaminds ed Heverlee pi ed Lommel.

Vrede aan hen

Nomdézeu !