Overblog Suivre ce blog
Administration Créer mon blog
30 avril 2012 1 30 /04 /avril /2012 21:33

Un foyer culturel

 

Ces gens de la Culture

 

http://farm9.staticflickr.com/8157/6983475666_0d244ec5c9_b.jpgCh’est un fameu canteu dech wartier Sint Meurice d’Anmiens qu’il étoait lo tout l’journée. Djano, il o foait gramint d’ouvrage. Ch’étoait un inforché capabe de donner des coeups d’masse dins ch’ mur in torchis à foaire fonde el moéson !

 

 

 


 

Ch’Cinte Léo Lagrange d’Anmiens, il étoait itou lo ! Mélanie, dirigeuse in esgond ale étoait grimouche avuc ch’tan ed pleuves qui s’annonchoait pour sanmedi. Mais chés euvrages à l’Ferme Grébénote, cha li o donné un coeup d’cachoère. Avuc sin homme pi ses 2 éfants is sont vnus.

http://farm8.staticflickr.com/7053/7129570703_ba24edbf25_b.jpgSin grind fiu il o meume foait un erportage photo = ch’tracteur Eicher, l’porte inter l’étchurie pi l’cambe, el bassine pour foaire el vaisselle dsur ch’poêle.

 

Ch’est un luthier ed Bourgogne, ed Quiérache, à vous d’vir… Sam, il étoait ch’moète d’euvrage long del jornée. Os ons défini l’soérée avuc sa muse à brassi pi èse épinette.

 

Pour vous foaire vir des langues ed vaques, des dytiques, Tom DSG il étoait lo. Eune fameuse gin rédeu d’verdure pi un canteu à démucher.

 

Os l’appelle achteure Henry Jay… Ch’bouquinisse del rue Sint Leu. El pus tchiotte librairie ed Picardie ! Il o canté des canchons à li in inglais mais si os allez l’vir, il éro toudis un viu live in picard à vous vinde.

 

Nomdézeu !

Repost 0
Published by nomdezeu - dans J'étais là
commenter cet article
30 avril 2012 1 30 /04 /avril /2012 19:46

Ralleumer le feu du picard

 

Un honneur harponvillois

Pour eune grinde journée d’euvrage à Harponville, ch’preume à m’atcheuillir, ch’étoait point ch’maire obin ch’tchuré de ch’village, mais un jonne in quad, un boin fiu d’Harponville qui m’foait l’honneur d’ête lo. Il avoait tchitté ses musiques hard-core pour vive avuc nous-eutes un grind momint picard.

 

Burin pi martieu

http://farm9.staticflickr.com/8164/6982958574_1d168ce68f_b.jpg

Défoaire ch’crépi à coeup d’burin pi d’martieu avuc Djano, Chico, Sam, Dimitri, Thomas.

Avuc l’arrivée de l’Amiral Kerouak, Marie pi leu fiu, ch’béton edvant ch’solin is nous o démuché des surprinses qu’os aiment point. Mais Eric, un espécialisse du torchis, est arrivé pour nous rassurer. Erfoaire ch’solin, canger l’seule pi ch’est rétampi pour 100 ans.

 

 

 

Des freumions

http://farm8.staticflickr.com/7213/6982979454_91541b3576_z.jpgCh’étoait eune freumière !

Adou qu’o met chés pannes ? – T’os eune soé ? – J’erfoai-ti du café ? – T’os eune bèrouète ?

Des milliasses de tchestions qui m’ont m’dmindé chés gins qui voloètent m’aidier.

Au mitant d’apreu-none, ch’étoait pusse ed tchinze gins qui étoètent lo dins l’cour del cinse.

 

 

 

 

 

 

No soérée picarde

http://farm8.staticflickr.com/7176/6982990780_2872b21da9.jpgDu pâté, del soupe, des cornichons, del bière, du vin, du chide pi des amisses avuc eune caleur à foaire invier d’jalousté ch’poêle qui voloait nous récauffer.

Des rires, des histoères pi des canchons espéciales pour mi…Des canchons in inglais pi évidemmint « Ch’est des boins fius » à canter tertous insanne.

 

Bet’Rave ed Chuque 2012

Dins eune ed chés canchons espéciales pour mi, is m’ont traité ed Poulidor ! A foait dus foés que j’sus esgond à chés Lafleurs de Chuque. Mais l’Ordre del Bet’Rave A Chuque (l’O’BRAC) is m’o distindjé d’un dipleume ed Bet’Rave A Chuque pi sin trophée, eune trouelle inbrenné d’torchis pi d’chaux.

 

Eune quemada picarde

Eune quemada, eune brulure in espagnol, ch’est eune cérémonie adou qu’os boét del goutte inflambée pour décaniller chés adjets pi avoèr leu aiude. Ch’preume coeup dins l’moéson, os ons prins des viux verres mais is ont clatché avec ch’fu qui avoait eddins pi l’goutte inflambée ale couloait dins ch’platieu in inox. Ch’tchoeur à Djano, il o foait qu’un tour : Os vons moérir ! Pi os ons prins ch’platieu, d’eutes verres pi os ons été au mitan del cour. Tertous in cherque avuc el coeudron d’goutte inflambée au mitan, Bran il o seurvi des verres ed goutte coeude à tertous. Ch’resse ed goutte inflambée il l’o répindu dins l’cour. A fsoait des bièles flammes bleuses.

 

Eune date proleptique dech futur calindrier picard !

 

Nomdézeu !

Repost 0
Published by nomdezeu - dans J'étais là
commenter cet article
27 avril 2012 5 27 /04 /avril /2012 19:16

Des sous dépinsés à rien !

 

Marie d’Harponville

http://grebenote.com/cinse/wp-content/uploads/2011/06/m%C3%A9m%C3%A9.jpgJe l’intinds déjo : « Os volez foute tout à terre ! Ch’crépi il est bien conme il est lo. »

M’grind-mère ale n’o jamoais volu mette l’ieu dins s’moéson, ch’est dépinser des sous à rien….

Alors magineu un molé si j’avoais du li dire qu’os alloèmes défoaire ch’crépi pi ch’cimint qui foait porrir chés colombages del moéson ! Ch’est ch’qu’os allons foère avuc edz amisses àch tchul dé smainne qui vient.

 

Des gins d’Picardie

Is vont vnir de ch’Vimeu, du Ponthiu, d’Anmiens, ed Quiérache… pi meume des gins qui dvistent pon picard ! Ch’est du tan du bon diu qui nos attind mais point du bieu. Du brin, os frons avuc…

Ch’fu i s’ro ralleumé avuc sin alambic ed café dsur… pour nous récauffer.

Pi min tchoeur i s’ro coeud avuc sitant d’amisses pour m’aidier.

 

Quémada pour chés adjets

Ch’est point catholique tout cho, ni protestint,… Bé nan, ch’est avoèr fiate in tertous chés dius ! Ch’est eune série ed canchons, ed rires, ed cacoules, ed diries qui nous attind pour définir el journée. Pi aladon os frons eune quémada ! Un verre ed goutte inflambée à chés adjets pi chés esprits del moéson pour zé décaniller pi nous aidier.

 

Nomdézeu !

Repost 0
Published by nomdezeu - dans Cassemint d'tête
commenter cet article
22 avril 2012 7 22 /04 /avril /2012 18:04

J’ai fait un nouveau rêve

 

Ch’pardouf  #3

 

Os intind grammint sons d’cloque avuc chés persidintielles à voter. Lo, ch’étoait du son, du pardouf d’achteure qu’os ons intindu à Moéson del Tchulture d’Anmiens el 21 d’avri 2012.

Chés élèves del classe dalectrocaustique de ch’conservatoère is feusoètent leu festival avuc l’achuchon -19 db.

 

Eune gin fameuse, Léandre

 

Si os étoètes lo, os l’avoez vu 5 foés ! Léande avuc sin violoncelle, Léande à sin manicraque pi coèr, pi coèr…

Chés cabotans is étoètent étou lo. Katerini Antonakaki nous o foait un bieu gardin.

Qué bonheur d’intinde des cants roumains avuc Greta !

 

Du picard à la MCA d’Amiens !

 

O dit souvint qu’y o des reuves qui s’foètent janmoés… Mi, j'o foait un nouvieu reuve, min New Dream, je l’o vétchu hier. Sam à l’doudounette pi à l’muse à brassi, Tim à l’wywernn, Thomas pour chés danses. Ch’étoait un bieu momint ! Por vous dire, je n’étoais émotionné pi j’in ai brais. Sié Tiodave i brait à msure…

 

 


 

 

 

 

 

Nomdézeu !

Repost 0
Published by nomdezeu - dans J'étais là
commenter cet article
20 avril 2012 5 20 /04 /avril /2012 19:29

Vive les faluchards !

 

http://upload.wikimedia.org/wikipedia/commons/0/06/Faluche_sq.gifCantelirie à ch’wartier Sint Leu

Judi 19 d’avri, y avoait eune cantelirie à ch’Maeva Bar dins l’rue Sint Leu. Leurint, ch’ patron i nos avoait prévenu « Y feut qu’o soéyète lo ! ». O l’connoait ch’Leurint… si y dit cho, os n'avoez qu’à suire sinan ch’est des coeups d’cachoère !!! Os arrivons à 9 eures du soèr avuc min achuchonné d’Sam. Os ons foait dus canteliries dont Roxanne ed Poliche.

 

Faluchard, eune espèce in dinger

Dans chés énées 90 à Anmiens, os rincontoèmes des faluches dins tous chés rues. Cheux ed Socio, ed Lettes, ed Droét, ed Métçinne, ed Farmarçrie…

L’cantelirie ale étoait ahansée par chés carabins d’scienche. Eune seule faluche apercevabe dins tous chés joènes qui étoètent lo !

 

Règues d’un faluchard èslon chés souvenanches à Tiodave

Vlo mes souvenanches ed règues mais ales ont pétète cangé edpus !

 

Edvint l’faluche =

Esquélette = si chés gambes ales sont ouvertes, ch’est un hétérosexuel / si chés gambes sont croésées, ch’est un homosexuel.

Etoèle edvint l’faluche = Ennée réussite

 

Dsur l’faluche =

Os treuverez un ruban bicolore pour dire el fatchulté adou qu’il est ch’carabin.

Chés poéyis qu’il o visité, ses loésirs à li

 

Drière l’faluche = Chu avuc quouo il o foait sin baptème. (Souvint un bouchon ed champagne)  

 

Ch’potager = Eddins l’faluche, y o l’vie secsuelle de ch’ carabin.

Eune carotte por « el cose »

Un porion por un birouléquage

Un navieu por un intchulage

Eune betterave por eune mutoélèquerie

SOIN  A TI !!! Si os ravisez ch’potager d’un carabin sins qui vous os donné l’droét, os devoez vos appériez avuc li !

 

Un faluchard dins chés rues

Un carabin avuc s’faluche dsur s’tiète doét chucher ed l’alcool. Si i vut boère un café, un jus d'orange obin eune limonate, i doét s’défuler !

 

Nomdézeu !

Repost 0
Published by nomdezeu - dans J'étais là
commenter cet article
18 avril 2012 3 18 /04 /avril /2012 22:57

ça bourdonne !

 

http://www.jardinsdenoe.org/bibliotheque/Newsletter/images/Lettre%20info%2027%20-%20septembre%202011/La%20ruche%20qui%20dit%20oui.jpgEune catoère à Harponville

Quind os arrivoètes jusse apreu avoèr torner à l’Hayette, y avoait déjo eune pincarte: « El catoère qui dit sié, ch’est tout drot ! » Chés és is étoètent fin aimabes ed nous amoutrer ch’ecmin ! Os trécope ch’grébénote pi nous vlo in heut de ch’village. Vingt diapes, ch’parquinge del salle des fiètes il est plein pi l’cour del école étou ! On rinte dins l’salle pi lo quasimint conme eune rinconte ed cabale persidincièle, du monne, du monne !

 

Un moète-marqué à Harponville

Os avoez connu seurmint dins nos villages, ch’comminal qui passoait avuc sin barou pour raforer chés gins. Miu qu’eune AMAP qu’ale vind des lédjeumes, os eurez d’toute à l’catoère qui dit sié ! Des lédjeumes, du miel (ch’est eune catoère quind meume), des chuques, des jocquots, des poulets pi des canèrds dodutlés à tchuire dins vo four, des pichons, edz équerviches, du chide, del bière pi meume des conserves ! Un moète-marqué que j’vo dit !

 

Tchulmadjet  @ Harponville

Miu èque Tchulmadjet obin Guerlojerie, ch’est eune rinconte ed pusse ed 60 gins amiteuses, ed voésins, d’amisses pi d’accointanches. « A vo ti ? – Ch’tchot, il o grindi ! – Alors, t’os acaté eune neuvèle carette ? ». Un liu pour dviser, berdler, prinde des neuvèles pi rincontrer des gins in pusse d’acater des boènes coses à s’pourléquer vos lippes. Eune rassouvenanche ed chés martchés d’antan !

 

Vive chés mouques à mié qui dittent sié !

 

Nomdézeu !

Repost 0
Published by nomdezeu - dans J'étais là
commenter cet article
15 avril 2012 7 15 /04 /avril /2012 20:50

A ch’pied du mur…

 

Os étoèmes troés de l'Hayette à nétier edvint l’moéson. Des pots d’fleurs in terre tchuite, in plastique…

Y avoait meume un viu pot à fu qui seurvoait à mette quate pinsées pi dus soucis. Un bac à carbon muché drière quèques bidons. Pi lo, des pots d’fleurs in polystyrène !!!

 

Du vint d’amont

http://a2.sphotos.ak.fbcdn.net/hphotos-ak-snc7/295794_1976202081330_1131446513_31710120_4929906_n.jpgAvuc eune froédure ed vint qui y avoait innhui, tout marin il euroait tchitter ahotcher sin caban à l’patère. Mais ch’est avuc un vint d’amont à rinverser un flobart que chl’Amiral Kerouak , commindant des forces navales du Vimeu, il o imbartché tertoute s’famile pour eune espédition in Corbioés ! Sins compas, à trécoper des poéyis inconnus d’li, à prinde des cmins d’hayures meurdrissoèrs, il étoait vnu m’incorager !!!

 

Prinde un ris

Ch’est l’preume foés que j’vouos l’Amiral prinde un ris avuc l’timpète ed rapinsemint picard qui seuffloait dins ses boyeus d’chervelle in erbéyant chés granges in torchis. L’moéson, ch’étoait l’abordage pi des injures à foaire rouchir ch’Capitaine Hadock in ravisant l’grindeur de chl’hangar. Mario, sin fiu, il étoait fin héru d’vir tout o. Pi Marie ale m’o foait un grind plaisi à barrer.

 

Eune tonne ed peumes pi un pressoèr

Sié, i m’o dit qui viendro à l’fin du moés d’avri pour m’aidier. Mais i feut du chide ! Ch’est quasimint eune tonne ed peumes pi un pressoèr qui m’faro pour atcheuillir conme i feut eune si grinde parsonne del tchulture picarde ! Mais cha s'ro du bonheur à n'ête fier, conme un picard !

 

Nomdézeu !

Repost 0
Published by nomdezeu - dans J'étais là
commenter cet article
14 avril 2012 6 14 /04 /avril /2012 17:31

Réglez vos sonotones !

 

Ch' pardouf picard #3

 

http://amiens.fr/fileadmin/user_upload/musicaa/Rencontres_Electroacoustiques_2012_.jpgSi os n'povez pus incorser chés musiques pi chés canchons picardes traditionnelles, vlo eune ducasse qu'os allez aimer !

L'alectrocaustique, c'est l'musique d'achteure ! Avuc chés cartchulateurs pi chés manicraques d'innhui, o foait des sons pi du pardouf qu'o n'peut pon magineu ! Chés élèves de l'classe d'alectrocaustique dirigeu par André Dion àch Conservatoère d'Anmiens is in foètent à leu mode !

 

Ch'programme il est lo !

Mi, j'y sro pi d'avinche, j'o invie d'acouter pi d'vir =

- Le chant des particules , pièce visuelle et sonore de Francis Derussy et de Tristan Alexandre

- La danse des algues au rythme de la mer, pièce électroacoustique de Serge Bouc

- Live Son / Image, 2 pièces mixtes pour vidéo et violoncelle. Vidéo : Head Wood. Violoncelle : Léandre Vaucher

- Jardin, performance de théâtre sonore de Katerini Antonakaki

- Seb2, pièce électroacoustique de Sébastien Berneaux sur les onomatopées

 

Des instruments picards alectrocaustiques !

A sro à 6 eures d'ermontée obin à 10 eures du soèr mais ème tchuriosité a m'faro attinde.


Apreu pusse ed 30 énées ed silinche, y éro del musique picarde à l'Moéson del Tchulture d'Anmiens !!!!


AIRS PICARDS REVISITES avec Sam Corwynn (pipasso, muse à fou et muse à brassi), Tim Drelon (doudounette) et Thomas SG (danse)

 

 Nomdézeu !

Repost 0
Published by nomdezeu - dans A venir
commenter cet article
13 avril 2012 5 13 /04 /avril /2012 00:57

Un bieu reportage dsur ch’parlage picard à vir pi à ravir…

 

Photo-Video-Serial-Crieur.jpg

 

ICI POUR VIR ICHI


Repost 0
Published by nomdezeu - dans Revue de presse
commenter cet article
7 avril 2012 6 07 /04 /avril /2012 01:35

2 heures de bonheur à Bouzencourt lez Hamel

 

http://farm8.staticflickr.com/7108/6906072086_fd2e99cbef_b.jpgCh’blason pi des gardins

 

J’avoais rindez-vous avuc ch’maire ed Le Hamel pour ingénier   eune balade dins chés marais ed Bouzencourt pour el 4 mai 2012 .

Eune moéson à côté del fameuse églisse, un coeup ed seurnette pi j’rinte…

Un blason del Picardie qui s’étampe dsur el cminée !

« Ca ne vous gêne pas si on prend les chiens ? » Bé non !

Un tchot jus avuc du chuque roux, chés tchiens dins l’carette pi on prind el Rue du Marais.

Lo, èj déteupe un camp ahansé in gardins d’ouvrieu. Chés consèleus municipals i n’y croyètent point… pi vlo èque chés aires ales sont pleines !! Pi y faro ragrindir !

 

Ch’cabaret Frumence

Au bout d’un tchul d’so, eune batisse à vinde. Ch’est l’guinguette ed Bouzencourt ! Eune moéson à l’abandon edpus chés énnées 80 mais à bonheur à vir ! J’ai des sintiboins ed canchons, ed musique, ed rires qui afflatent mes érelles rien qu’à l’erbéyer ! Croésez vos doégts ed main pi d’pied pour qu’a fuche à nouvieu un cabaret !

 

El Vierge ed Bouzencourt

El mairerie a n’avot point assez d’acatoères pour acater eune vierge dins chés réderies ed nos tchoins adon eune verlée au Portugal pi ch’est eune vierge ed Fatima qu’ale est lo dins l’capelle ed Bouzencourt.

 

Chés marais ed Bouzencourt

Du brin à chés carolines ! Un marais véridique sins abes, conme avint …

Infesté d’abes, ch’étoait un nid à bibaches. Achteure, ch’est l’berche ed chés langues ed vaque, ed chés rosieus pi ed chés tétarts. Rinconte avuc des jonnes qui mette du bos dins eune carriole : « Du bois, ça réchauffe quatre fois ! le couper, le charger, le décharger et le brûler »  

 

Eliott pi Vidocq

Chés tchiens is étoètent fin hérus ! Eliott i l’étoait tout l’timps dins l’ieu. Vidocq, os l’ons quasimint pardu près del « Seigneurie » edvint qui nos déssaque un chevreuil. Des canèrds, des cignes, des yeuves, is n’avoètent plein leus musieus à nifler !

 

J’agglave ed soé !

Apreu 2 eures à varonner dins chés marais, os étoèmes agglavés d’soé. Ertour à l’moéson de ch’maire… pi lo point ed caca-coula, ed jus d’orange mais du chide qui m’o perposé, ch’maire ! Ch’maire ed Le Hamel, il est picard que j’vo dis !

 

Nomdézeu !

Repost 0
Published by nomdezeu - dans J'étais là
commenter cet article