Overblog Suivre ce blog
Administration Créer mon blog
29 mai 2012 2 29 /05 /mai /2012 22:16

http://farm8.staticflickr.com/7083/7297074226_eb038a10a0.jpgSié, a n'est qu'eune planque ed bistincoin dsur un mur ed torchis.

Mais ch'est un pannieu pour affiquer FOQUE chés fiètes pi événemints de chés langue pi tchulture picardes pi tchimis pi qui l'est lo pour vous eutes ! 

Eune foto de ch'pannieu ale s'ro adité mise dsur  El Ferme Grébénote

 

Jusse eune boète às lettes =

EL FERME GREBENOTE

3 rue de Varennes

80560 HARPONVILLE


TRADUCTION EN FRANCAIS ICI

Repost 0
Published by nomdezeu - dans A venir
commenter cet article
28 mai 2012 1 28 /05 /mai /2012 20:52

El preumière foés qu'des fotos del fiète d'Harponville sont dépuliés dsur intarnet!

 

Un liu pour chés nazus

Ch'est dins l'cour de l'anchienne école que chés manèges is foaitent leus étals.

 

http://farm8.staticflickr.com/7091/7288922016_417afa3db2.jpg

Ch'rogaillou avint que chés nazus is arrivtent !

 


 

http://farm8.staticflickr.com/7105/7288920616_6b8526d451.jpg

Ch'tir = Chés nazus qui reuvtent ed gaigner eune bibuserie !

 

 

 

http://farm8.staticflickr.com/7076/7289051018_399b531106.jpg

Ch'luthier d'Harponville qu'il o gaigné un réveil à ch'tir !

 

 

Eune plache pour chés sports picards

Dsur l'plache du "Jeu de Tamis", ch'est eune tradition à l'fiète d'Harponville d'avoèr du Ballon Poing !

 

http://farm9.staticflickr.com/8021/7288923262_f2f09c6359.jpg

El buvette = Ch'Maire d'Harponville, un rédeu ed Ballon Poing

 


 

http://farm9.staticflickr.com/8144/7288924526_8ce46f5f11.jpg

Mac Delmotte ed Talmas, un balloneu pi ch'escrétaire de l'Académie d'chés Lafleurs

 

 

Lundi d'Pintecoute à Harponville

Ch'est un jour sapré à Harponville avuc chl'apéritif !

 

http://farm8.staticflickr.com/7097/7288926160_7e9259b24a.jpg

A berdèle, a dvise pi aladon on boét un coeup...

 

 

Nomdézeu !

Repost 0
Published by nomdezeu - dans Revue de presse
commenter cet article
28 mai 2012 1 28 /05 /mai /2012 20:25

Commincher à ête cinsier

 

http://farm8.staticflickr.com/7231/7288578840_820f8696ea.jpgUn gayant paviole à l’cinse

N’allez pas magineu un paviole avuc des ailes ed 2 mètes ! Ch’est eune race ed lapan gayant.

Ch’corbieu il o cho dins s’cahuète : minger du lapan !

Mais avint qui puche s’pourléquer avuc du lapan às prunieus, i faut apprinde à zzé norrir…chés lapans pon chés prunieux !

 

Foaire des semis

Quind qu’os sonmes dins eune cinse avuc du terrain, sin plaisir ch’est d’foère du gardinage. Pi un boin gardineu i foait ed preume des semis. Ch’est eune neuvèle pécavie ed no corbieu !

Des semis ed capucines, d’œillets d’Inde pi d’poète, ed soucis, ed reine-margrite….pi chés carottes, chés peumetères, chés porions os irons z’acater à ch’moète-marqué !

 

Trifouiller

Achteure que ch’corbieu il est à Harponville, il o volut ahanser èsn ouchine. Pi quoé d’miux que d’ecmincher à trifouiller à 10 eures du soèr au mitant del tchuisine el diminche del fiète de ch’village !

 

Adon no boin cinsier, il o vissié chés graines ed fleur, plinter ch’lapan dins un pot pi mis ses étagères dins ch’clapier….. I débute que j’vo dis !

 

Hérusemint qu’os sonmes allés à chl’apéritif du lindi del fiète ! I l’o bu que de l’ieu à Nisette avuc coèr un coeup, rinchette, surinchète pi gloria. Ch’est-ti qu’il o erchu des boins consèls ed chés cinsiers d’Harponville à chl’apéritif ou qu’il avoait ch’coeup mais in rintrant chés graines ales étoètent dins chés pots d’fleur, ch’lapan dins sin clapier pi chés étagères dins l’ouchine de ch’corbieu !

 

Nomdézeu !

Repost 0
Published by nomdezeu - dans Cassemint d'tête
commenter cet article
27 mai 2012 7 27 /05 /mai /2012 00:51

IMAGE PROJETDes abes qui défunctent

 

Chés comptes à Grébénote

El pratique à erlancher pour chés factures qui m’doètent.

Chés carques seuciales à cartchuler pi poéyer.

Chés comptes à foaire pi n’avoèr eune trache papieu.

A foait 10 feules ed papier !

 

Erfoaire sin rétoèr

Nan, je n’vo point erfoaire ème djiffe pi min rétoèr ! Ch’est l’façade d’el moéson qui feut erfoaire ! El déclaration d’euvrages, ch’est des plans, des fotos, des esplications pi toute ! Tout cho in 3 foés !

A foait 60 feules de papier !

 

Pi coèr des papiers !

L’énée darnière, j’avoais 4 pages à rimplir pour déclareu mes impôts.

Cht ‘énée-chi, j’o 15 feules à rimplir à coeuse que j’o achteure in pusse El Ferme Grébénote pi eune moéson à Harponville !

A foait 15 feules de papier !

 

85 feules gadrouillées à des écrivures ! Sins compter chés timbes ed poste !

 

Nomdézeu !

Repost 0
Published by nomdezeu - dans Cassemint d'tête
commenter cet article
23 mai 2012 3 23 /05 /mai /2012 23:31

http://farm5.static.flickr.com/4122/4801552808_5f3cdb03e8.jpgUn corbieu picard

 

Ch’étoait un corbieu asseulé in Picardie

Un barde gauloés dins s’cahute toute décatie

Quasimint druide qu’il étoait ! Nomdézeu ! Pardi !

Du bos il in connoaissait chés âges, chés batis.

 

Ch’est eune arnitoèle pi coèr l’accointanche d’un ours

Je l’o vu jusse rincontrer pour dviser de ch’ picard

Il o fallut eune pierre fitchée pour m’rinde boubourse

Pi avoèr fiate in l’amour à un âge si tard !

 

Il o déteupé chés musiques picardes avuc mi

Pi un pipasso, un grinche-pot, eune épinette

Itou el tchulture pi l’lanque picarde pi tchimi

Des amisses à bros ouverts pi des surinchètes

 

Lo fallut eune pécavie ed Cleude ed Quiérache

Pi qui s’in voèche mon ch’poéyis d’Nicole ed Vervins

Jusse l’timps qu’eune muse à brassi quiérachienne ale s'foache

Lo, à Harcigny, ch’étoait l’Ouchine ed Corwynn

 

 

Eune porcrie conme ouchine pi un liu à l’avant

A Grébénote, no corbieu i s’ro dins du v’lours !

 

Traduction gratuite en français disponible sur simple demande à grebenote@gmail.com

 

Nomdézeu !

Repost 0
Published by nomdezeu - dans A venir
commenter cet article
22 mai 2012 2 22 /05 /mai /2012 21:39

Des dius d’Amérique, d’Afrique, d’Inde pi d’eutes poéyis

 

Chés voésinnes, chés invités pi chés gins del moéson...

 

http://farm8.staticflickr.com/7231/7251146300_be8f11854c.jpgDelsy

Ch’est eune tchienne houvite dins s’jonesse. « Ale est si tant » qu’o porroait dire pi ch’est l’signifianche ed sin tiot nom mon chés indiens d’Amérique.

 

http://farm8.staticflickr.com/7081/7251145522_9c27d093a8_b.jpgInti

Marché, ale m’o bien milé ! Ale avoait ses yus qui dardoétent conme ch’solé. Mi que j’sus rédeu d’chés Incas, is m’avoaient bistoqué lo leu pus grind diu, ch’diu solé !

 

 


http://farm8.staticflickr.com/7232/7251146908_711d047da3.jpgChés vaques

Ch’est des vaques saprées èque j’o conme voésinnes !

Gao Mata ed chés Indiens, ch’est no manman à tertous, douche pi amiteuse.

Audhumla ed chés Vikings qu’ale est l’preume à avoèr norri eune gin pi meume un gayant !

Damona ed chés Gauloés qu’ale donne à chés gins el djérison pi el prospérité.

 

http://farm8.staticflickr.com/7077/7251144398_817fac679b_z.jpgChés érignies

Anansi, ch’est eune érignie d’Afrique qu’ale erprésinte el sagesse pi qu’ale o donné à chés gins ch’savoèr del agriculture.

Arachné, ch’est une jonne file qu’ale fésoait des toèles si bièles qu’Athéna n’étoait jalouse.

Ch’est itou l’âme d’eune gin pour chés gins d’Sibérie pi chés gins du Vietnam.

 

Avuc autint d’erligions pi d’dius, j’croés vraimint qu’El Ferme Grébénote ale est béni des dius conme sin grès qu’il est bénote !

 

Nomdézeu !

Repost 0
Published by nomdezeu - dans J'étais là
commenter cet article
21 mai 2012 1 21 /05 /mai /2012 20:46

http://farm6.staticflickr.com/5322/7243798588_cbe77dd32c.jpgChés hourets ed Picardie

 

Ch’carpintier ed Vitz

Chico, ch’carpintier de l’vallée del Authie, je l’o mérié conme erprésintant de ch’maire ed Gardincourt. Ch’est un tchoeur sitant bieu que ch’bos qu’il prind pour vos foaire vos armoères. Avuc li, chés portes is étoètent foaites à l’bout d’une minute.

 

Ch’garagisse de Flixecourt

Ch’Nard, ch’garagisse, il étoait lo. J’avoais point d’carette à rétampir. Mais sin savoèr pi ses soudures, ales ont été fin boènévues pour freumer el cinse avuc eune grille. Ch’contermoète, ch’étoait sin fiu ed dus ans, Robert.

 

Ch’wardjet d’Corhatille

A l’acouter, y o eune tortute, un tigue, un doudou pi un serpint dins m’ferme pi alintour ! C’est-ti un zoo qu’i feut que j’foèche ?! Evnu ed Quiérache, ch’wardjet il o passié eune après-none à miler, raviser chés liux pi foaire des cartchuls ed Vint d’Ieu pour nous aidier à ahanser chés batimints.  

 

Sint Bricard, priez pour li !

Bié seur qu’il étoait lo ! Chl’Amiral Kerouak i l’étoait vnu conme ambassadeur de ch’Vimeu. I l’avoait récoué quèques cadnos pi serrules « made in Vimeu » pi pour mi, ch’est un bonheur ed vir des freumetures picardes à no moéson.

 

Marie Maisnières

Ale étoait partoute ! Marie à ringer du bos, Marie à coper des branques, Marie à lavinder

J’y ai meume dmindé consèl pour monter l’boète à lette rapport àch qu’ale est factrice.

A chés élections 2012 ed député dins ch’Vimeu, j’vous donne min avis = VOTEZ Marie Maisnières !  

 

Nomdézeu !

Repost 0
Published by nomdezeu - dans J'étais là
commenter cet article
20 mai 2012 7 20 /05 /mai /2012 19:13

Del civilisation picarde à Grébénote

 

Pour bien connoaite no parlage pi no tchulture, feut comprinde ed preume el civilisation pi el filosofie del Picardie. Eune gin dsur chl’arnitoèle ale o écrit un coeup : « La civilisation sans la Picardie, ce serait aussi absurde qu’un  poisson sans vélo ! » Ch’est eune vérité èque chés gins ichi is ont à tchoeur pi El Ferme Grébénote ale vut apporter ed grindes idées à chés civilisations.

 

http://farm8.staticflickr.com/7211/7235011636_bbbab2547f.jpgDes cabernes à pannes

Dins no ferme, os n’ons point d’caberne à lapans mais des cabernes à pannes !

I feut leu donner de l’ieu, un molé d’mousse pi d’lichen pi os avoez eune calée d’tchottes pannes in moins qu’érien !

 

Un martieu à ferrer chés lapans

Os étoèmes à foaire chés ferrules del grille d’intrée pi os avoèmes bien du mau à treuver ch’martieu qu’il falloait. Adon os ons caché apreu un martieu pour mette des fers à chés lapans. C’est un martieu espécial qu’il est bien muché dins toutes chés ferrailles d’une cinse !

Des fers à gvo, j’in ai à l’gronnée dins l’cinse mais si os avoez à vo moaison un fer à lapan,  je vous l’acate !

 

Des visses à feur

Si os volez foaire eune paroé dins eune gringe, foaites edz écolomies ! Montez un mur in ballots d’feur pi au mitan, montez eune porte. El pus durte à treuver, ch’est des visses à feur pour fixer l’incadremint dins chés ballots…obin des cleus, ch’est aladon !...

 

Nomdézeu !

Repost 0
Published by nomdezeu - dans J'étais là
commenter cet article
17 mai 2012 4 17 /05 /mai /2012 20:50

Grébénote invahi d'espécialisses !

 

http://farm8.staticflickr.com/7241/7183105472_1b03947ae0.jpgFreumer chés huis

El grinde porte dégonnée, is feut achteure freumer chés huis del cinse Grébénote.

Ch’est ch'qu’os allons foaire sanmedi qui vient. N’allez point pinser à eune pécavie titionainnesque del freumeture ed chés frontières ! Et jusse que je vux point que l’catte de ch’voésin ale vienne caler dins l’grange obin qu’un nazu i vienne s’trondler dsur eune fourque obin eune ferraille.

 

Exode du Vimeu

L’Amiral Kerouak i sro lo avuc sin safran pi Mario. J’o eune pinsée à li, Kerouak, qu’il o du s’infitcher dins tout ch’cafernau d’sin garage pour aller déteuper quèques sérules pi cadnos qu’il avoait ermisés.

Ch’Nard i sro itou lo avec s’famile. Ch’Nard, ch’est ch’fiu à l’Amiral. On put dire que ch’est un sous marin. Des démépriseus is ditent qu’il est rédeu ed chés ieus troubes à Nisette mais pour rétampir eune carette toute décatie, il est capabe d’rintrer dins un moteur dusqu’à gville pour treuver l’panne !

 

Des gins espécialisses !

Chico ch’carpintier i sro itou lo. El traite picarde qu’il o foait à Mme Vasseur, ale est d’eune bieuté qu’o n’in parle coèr dins tertoute l’vallée del Authie !

 

Thierry, ch’wardjet i vinro itou. Ch’est un grind espécialisse de ch’Vint d’Ieu. I vinro décaniller chés mawais esprits du liu pi les démette ed lo.

 

Pi feut compter itou dsur Sam qui l’o des idées à foéson pour ahanser pi rétampir el cinse.

 

Des gins formidapes !

 

Nomdézeu !

Repost 0
Published by nomdezeu - dans A venir
commenter cet article
17 mai 2012 4 17 /05 /mai /2012 11:57

LOGO-MODEM.JPG

Tiodave, député suite

 

Ch’coeup d’téléfone ed diminche

Diminche, j’avoais erchu un coeup d’téléfone de ch’parti à Barou pour m’foère élire député dins ch’Vimeu à muche tin pot d’min accord. Allez vir chl’artique pus bos.

Quoé qu’ils leus aient passié par leu caboche pour qu’is appeltent un David à Anmiens alorsse qu’is voloètent dviser à un David qu’il est ch’maire d’Equerbotin !

 

El lette ed mercrédi

J’pinsoais èque ch’étoait fini pi vlo qu’a r’cminche ! J’o erchu mercrédi-chi ène lette de ch’escrétaire à Barou conme quoé j’sus bien coési pour chés élections d’député ! El lette ale est à m’adrèche d’Anmiens !

 

Une nuit à n’point deurmir

Ch’est point qu’j’avoais des cassemints d’tête pour savoèr cmint foère ème cabale dins ch’Vimeu. Mais putôt quièche aviser qu’is ont coèr foait eune berlure par un Judi d’Ascension ?!

J’o traché dsur chl’arnitoèle pi j’o treuvé ch’blog à David.

 

Tiodave dépité

Ch’pus jonne maire ed France éli dins l’Sonme, a foait plaisi. J’alloais li invoéyer un émile pour li dire el berlure pi quoé que j’voais dsur sin blog à l'eute David =

« J’o voté ch’tchot nain ! » pi « J’vux point d’horzins pi d'étringers qui votent chés maires. »

 

Freuville sins cleu pi serrule

Pierre Briez, un histeurien d'Adville écrivoait in 1857: "un horloger allemand arriva un soir à Escarbotin, dans un hameau de trente feux à peine et s'y fixa. L'horloge, objet de luxe, était à l'index de nos campagnes et pour utiliser sa lime, l'étranger fit une serrure. Le château voisin l'acheta et il en commença une autre... Cet homme et ce village furent le point géométrique d'où partit le rayon industriel du Vimeu"


Cmint qu’is éroaitent foait à Equerbotin si un allemind (adon un horzin) n’étoait point vnu leu apprinde el serrulerie ? Pi y feut croère itou que ch’catieu d’Fressenneville il o brûlé pour érien.

 

Si y feut prévenir l’eute David del berlure, a n’sro point mi !

 

Nomdézeu !

Repost 0
Published by nomdezeu - dans Cassemint d'tête
commenter cet article