Overblog Suivre ce blog
Administration Créer mon blog
23 juin 2012 6 23 /06 /juin /2012 13:07

Ch’tan ed chés fiètes…

 

Ch’tan décagné

Ch’tan il o décidié ed voloèr dinser itou.

A coeuse d’ernu pi d’timpète annonchés, grammint d’Villes ed Picardie ales n’ont point foait leu Fiète del Musique.

 

Un abri atonique à Anmiens

Conme os l’savez el 21 juin… ch’est l’djère ed chés musiques ! Mi, èque j’o des érelles casuelles, j’o préféré rester dins ch’wartier Sin-Leu putot qu’daller dins ch’fu del djère atonique.

 

http://farm6.staticflickr.com/5444/7425003060_50617a9c09.jpgThomas (in vert) à la doudounette, Sam au bodhran pi Hervé à l'épinette

 

 

 

 

http://farm9.staticflickr.com/8163/7425003424_114348c216.jpgSam Corwynn avuc une bièle rope pi eune muse à brassi (el cornemuse)

 

 

 

http://farm8.staticflickr.com/7128/7425003890_0126f49dc5.jpgCh'bouquinisse del rue Sint Leu il o dépinsé

gramint d'ergint pour annoncher chés concerts !!

 

 

TROIS VIDEOS DU CONCERT

 

 

 

 

 

 

 


 

 

 

 


Repost 0
Published by nomdezeu - dans J'étais là
commenter cet article
18 juin 2012 1 18 /06 /juin /2012 00:01

A coûte d’erfoaire une moéson !

 

http://farm8.staticflickr.com/7244/7389577536_3cb5ffefd2.jpgJ’o besoin ed 2000 briques !

J’intinds déjo chés gins romionner ! Tiodave, ch’est un dépinsieu !

Avuc 2 milliards d’anchiens francs, i veut-i foère eune réforme gouvernemintale pour ahanser des ambassades ed Picardie dins tous chés poyéis du Monne ?

Avuc 2 millions ed francs, i veut-i erfoaire ch’catieu d’Harponville avuc du marbe pi des dorures ?

Avuc 305 000 uros, i vut-i bâtir une moéson ed 300 mètes carré  avuc eune puchine?

 

Des briques rouches

Ch’est 2000 briques rouches qu’i m’feut…

Ch’seulin del moéson d’El Ferme Grébénote il est à erfoaire. Pi j’o bsoin ed gramint d’briques rouches à défeut d’avoèr quèques briques in doupes pour n’acater des neuves.

Mais si tous chés liseus ed chés artiques ed Nomdézeu is m’donnent el vièle brique qu’ale est abindonnée à ch’pied d’leu moéson obin àch fond de ch’gardin, j’éro d’quoé foaire un catieu à Harponville !

 

Nomdézeu !

 


 

Vous avez 100, 500, 1000 briques « anciennes » à me proposer…

Vous savez où en trouver…

Envoyez un mail à grebenote@gmail.com

 

En m’aidant, vous participez à la création

d’un lieu qui veut se consacrer à la langue et la culture picardes…

Repost 0
Published by nomdezeu - dans Cassemint d'tête
commenter cet article
17 juin 2012 7 17 /06 /juin /2012 15:40

Forcheville i fêtoait ses âges !

 

http://farm6.staticflickr.com/5445/7386246986_9124ed1caa_b.jpgEdpus 15 jors, l'affiche ale est dsur l'pincarte

à l'intrée d'El Ferme Grébénote à Harponville !

Erbeyez ch'menu !

10 plots qui y avoait à minger in pusse de chl'Hypocras (ch'vin) !

 

 

http://farm8.staticflickr.com/7085/7386248826_257d598c7e.jpgA 6 eures d'ermontée, Laurent Devime pi el Compagnie Picaresk

is ont foait un espectaque ed cabotans picards

avuc Lafleur pi ses camarates.

 

 

http://farm9.staticflickr.com/8149/7386249362_5c48022761.jpg

http://farm9.staticflickr.com/8005/7386248134_5a588e9a1c.jpg

 

Pindant ch'temps-lo, chés jonnes pi chés moins jonnes

is ringent chés ballots d'feur !

 

http://farm9.staticflickr.com/8158/7386247530_f6445232b9.jpg

 

Pi au soèr, os ons bien dinsé avuc Amuséon pi leu pipasso (el cornemuse picarde) !

 

Vivemint 2013 pour fêter chés 1351 ans ed Forcheville !

 

Nomdézeu !

Repost 0
Published by nomdezeu - dans J'étais là
commenter cet article
15 juin 2012 5 15 /06 /juin /2012 22:40

Os cantons picard !

 

Une cornemuse picarde au quartier Saint Leu d'Amiens

http://a2.sphotos.ak.fbcdn.net/hphotos-ak-ash3/s480x480/554811_3783449818401_581036879_n.jpg

 

 

Des chansons picardes à la Cathédrale d'Amiens

http://a8.sphotos.ak.fbcdn.net/hphotos-ak-ash3/545398_3787139630644_795105513_n.jpg

Repost 0
Published by nomdezeu - dans A venir
commenter cet article
14 juin 2012 4 14 /06 /juin /2012 23:50

Cirtchulez, y o rien à vir !

 

http://grebenote.com/cinse/wp-content/uploads/2011/07/Vignette-marais.jpgUn fameu catieu

Lo, à quèques tchilomètes d’Anmiens, y o un catieu qui dort. Avuc chés darnières froédures d’hiver, chés remparts de ch’catieu d’Pinquigny i sont casuels. Pi chés Antiquaires ed Picardie qui in sont preupriétaires is ont du abolir à tertous d’y rintrer. Adé chés tourisses pi chés fiètes mitanageuses

 

El route d’Anmiens à Advile

Ch’étoait lo à mi-route qu’y avoait un office de tourisme pour vous foaire vir chés catieus ed Belloy pi d’Ferrières, l’Abbie du Gard pi ch’clotcher ed Bourdon. Avuc l’aiude de ch’Consèl Général del Somme, is ont déménagé dins l’moéson d’écluse à Ailly. Adé chl’office dsur el vièle route…

 

Un chabot avuc eune candèle

Dins l’temps, o prenoait un chabot avuc eune candèle pour vir adou qu’eune gin ale s’étoait neuyée. Pi lo que ch’chabot i couloait, ch’est lo qu’y avoait ch’cadave. Innhui, ch’chabot il est in train d’couler à l'écluse d'Ailly…

 

Biétot, ch’est avuc eune ânme vuide pi triste que j’passero dins ch’poéyis d’chés Vidames d’Anmiens

 


Nomdézeu !

Repost 0
Published by nomdezeu - dans Revue de presse
commenter cet article
13 juin 2012 3 13 /06 /juin /2012 22:12

Panneau_pluie.JPGDu tan socialisse

Des pleuves, un vint d’Sybire… Meume ch’tan, il o prins des idées socialisses pi d’Urope ed l’Est ! Quind Mimolet i l’o ermonté Chés Camps à Lysée, trimpé avuc ses quate-yus inbreumés, pour daller ralleumer el flambe à ch’Soldat Inconnu el tchinze mai, ch’étoait eune annonche météo !

 

Une glache berzillée

N’éyez point d’freus ! Os n’sonmes point à avoèr des gelées à glache ! A min travail, j’o voulu aller acater eune boutèle d’ieu pour mi boère avuc min briquet. J’o prins ème carette pi y avoait un molé d’buée dsur chés glaches. J’o peuché ch’pitinton pour boaissier m’farnète pi j’o intindu un déclaquemint. Min cassis, il étoait in cronque ! Hérusemint, j’o pu l’ermonter.

 

Ch’compteur d’ieu

Je n’étoais épeuré d’avinche. Avuc des hivers conme os ons eu, bé bien èque chés tuyeux d’ieu del Ferme Grébénote is sont clatchés pi que j’vo avoèr des débits astrolomiques !

El facture est arrivée… 7 uros à poéyer

 

« Allo, ch’ Trésor Public ? J’pux ti vos poéyer in liquidités. »

 

Nomdézeu !

Repost 0
Published by nomdezeu - dans Cassemint d'tête
commenter cet article
10 juin 2012 7 10 /06 /juin /2012 23:00

Avoèr des doupes

 

http://farm8.staticflickr.com/7211/7173934541_f1e2909953.jpgA n’a rien eu

Edpus èque j’o eune moéson à rétampir à Harponville, j’cache apreu des doupes pour foère chés euvrages. J’o été, verdi, à l’permaninche ed l’Anah à Albert mais pusse ed 15 parsonnes qu’ales attindoètent pour l’un canger eune farnète, l’eute avoèr eune neuvèle coeudière. Du brin, j’alloais mie attinde un apreu-none intier pour avoèr quate sous !

 

Ch’compte in suisse

Os savez que chés vius y avoètent l’habitude ed mette leus écolomies interdus chés drops dins l’armoère. Ch’est don lo èque j’o caché. A foait que j’o déteupé des chintaines de drops à n’in erfoère èch chapiteau de ch’cirque Barnum, des tchulottes tricotées in laine mais point d’billets ni meume un tchot papier avuc un liméro d’compte in suisse. Ah, sié, eune pièche ed 5 francs dins eune poque !

 

Chés lingots d’or

Y n’avoait qu’eune seule pièche èque j’avos point été vir : ch’four à pain ! Ch’est lo, est certain ! Ch’est lo qui sont chés lingots d’or ! Os ons démurailler tout ch’dalage edvint el tchotte porte. Des démétures, eune machine à coeude pi  el porte ouverte, des arnitoèles dins tout ch’colidor ! Eme lampe ed poque dins ème main qui tranne… quèques pos … pi un four à pain quasi tout neu mais vuide !

 

El réderie

Vingt diapes, je vos vinde tout ch’cafernau-lo à l’réderie ! J’o mis tous chés verres, chés gattes, chés bibuseries in étal pi je m’sus assis dins min cadot d’campinge tout l’jornée ed diminche ! Mais j’avoais un tracassemint dins m’tiète… j’oblie quèque cose…. Ch’est quasimint à 6 eures d’ermontée èque j’y o pinsé. El réderie avoait tout sin étal dins l’étabe à vaques à Harponville mais j’avoais oblié chés réclames pour annoncher avuc ed z’affiches pi dins chés jornals chl’évènemint ! Hérusemint Gisèle qui passoait dins chés rues, ale o vnu boère un café sinan j’avoais point d’visiteus à l’réderie ed Grébénote !

 

Nomdézeu !

Repost 0
Published by nomdezeu - dans Cassemint d'tête
commenter cet article
6 juin 2012 3 06 /06 /juin /2012 22:24

Des artisses qui sont nés

 

Tiodave téyatreu

Quièche qui s'raminteuve de ch'Gerfaut de l'télé?

Ch'est portant li Laurent le Doyen qu'il o yeu l'idée d'ahanser un estage ed téyate à Albert adou que s'fème Zélia ale étoait native. Un estage avec pusse de 20 parsonnes pi ed boènes souvenanches...

Pi apreu, os ons foait l'achuchon "les Enfants Terribles" avuc edz'amisses.

Ch'est lo que j'o jué min reule de "Léandre" ed Goldoni edvint 600 espectateus à ch'Téyate du Jeu de Paume à Albert !

 

Des pécavies tchulturelles

Ch'estage il o foait des invies pi des pécavies à quèques-uns.

 

http://www.chitcatt.com/ckfinder/userfiles/images/chitcatt-1.jpgChitcatt = Quièche qui s'raminteuve Eric, vindeu ed téléfone portabe? Ch'est achteure un grind humorisse! Pi l'Montée d'Rire ale est fameuse !

 

Christèle = Quièche qui l'o connu dins eune pièche ed boulevard in robe longue obin avuc eune habillure ed pirate dins Peter Pan ? Ch'est achteure el dirigeuse d'eune interprinse ed fiètes Projaide 3D.

 

Emilie = Ch'étoait une jonne file polite dins nos pièches ed téyate. Ch'est achteure eune grimeuse à l'télé Direct 8 !

 

Tiodave = Ch'est mi avuc mes lanque pi tchulture picardes !

 

Fin fier que j'sus ed chés gins-lo qu'is ont sui leus invies !

 

El suite pétète ?

Ch'fiu ed min cousin, il o foait sin espètaque ed danse à ch'Téyate du Jeu de Paume.

Fin fier, il o annonché à m'mère = "Y o 30 parsonnes qui vont vnir !"

Ch'est pusse ed 400 espectateus qui étoètent lo !

La Vidéo sur Facebook

 

 Nomdézeu !

 

 

Repost 0
Published by nomdezeu - dans Revue de presse
commenter cet article
3 juin 2012 7 03 /06 /juin /2012 21:37

ManmanEl fiète des manmans

 

Des fleurs par l’farnète

El souvenanche de chés preumes fiètes des mères, ch’est à l’école avuc des euvrages ed nazu conme chés fameus colliers ed vitlous pinturés ! Pi ch’est coèr itou min bieu boutchet d’fleurs balé par l’farnète par ème grind-mère ! « Des sous dépinsés à rien » !

 

El Fiète à Manman

Nos manmans, os z'ons quère ! Cmint leu rinde hommage ? A l’mort de min père, ème manman à mi ale étoait inchpée sins permis d’carette. Pus moéyin de s’déplacher… Je li o acaté un vélou pour daller à Harponville. Ses lèrmes ed boènheur ales ont graissié el caine de ch’bicycle….

 

Pétain de s'mère

1941, ch’est l’Fiète des Mères erconnue par Pétain ! C’est eune fiète que je n’pus point incorser ! Manman ale n’o point erchu d’bistoquage edpus gramint d’énées rapport à Pétain. Un artique dins ch’Courrier Picard dsur mi, des gins qui parlent ed mi pi el pinsée que j’vo biétot rester à Harponville, ch’est des risettes que j’voés souvint dsur l’brogne ed Manman achteure, fin fière de sin fiu !

 

Nomdézeu !

Repost 0
Published by nomdezeu - dans Cassemint d'tête
commenter cet article
30 mai 2012 3 30 /05 /mai /2012 20:33

Suire chés neuvèles...

 

http://farm8.staticflickr.com/7083/7297074226_eb038a10a0.jpgChés fans de ch'blog

 

Os êtes gramint à lire mes écrivures dsur Nomdézeu pi j'vous ermerchie vraimint.

Mais os êtes-ti abonnés à l'Gazette Grébénote? C'est gratuit !

Invoyéez un émile à grebenote@gmail.com pi os rchuvrez el Gazette ! Ch'est eune lirie d'eune page qu'ale est dépuliée tous les moés.

 

El Gazette ed Juin ICHI

 

Os rprindez bien un molé d'picard ?

 

 Nomdézeu !

Repost 0
Published by nomdezeu - dans Revue de presse
commenter cet article