NOMDEZEU

17 juillet 2012 2 17 /07 /juillet /2012 13:08

Question de vidanges

Vuider, ponde pi baler

Del carette

Diminche soèr, j'o jté tertoutes chés boutelles d'ieu vuides que j'avoais dins m'carette. Feut dire èque lindi je l'o mné à ch'garagisse pour el vidange d'eule.

Ed chés ordures

Diminche coèr, j'o mis 6 sos d'poubelle à z'ordures, du brin que j'o vuidé ed chés armoères del moéson. Pi lindi, ch'étoait ch'tour de quate sos gannes cheux pour chés boutelles (del carette) pi chés vius cartons moésis balés del moéson. Pi innhui, j'o balé ch'sieu à coéchons dsur ch'tas d'compost drière el moéson pisqu'os avons point d'pourchiau dins l'cinse...

Ed ponde

Sié, lindi 16 juyet, el lapinne ale o pondu ! Biésur, os sonmes pas à Pâques pi os ons pon ieu des us ! Mais au parfond del caberne, y o eune toupe de poèls qui ermue...

Pi os allez m'dire in parlant d'ponde... sins cabinets, adou qu'o put s'aponner pi ponde dins l'cinse. Ben dins l'étchurie, os ons mis el vièle cayèle perchée de m'tayonne avuc un sieu indsous. Eune pognie d'soéyure, vo grinde obin tchotte commission pi point d'sintimints ni d'mouques... Des toélettes sèques qu'is appeltent cho. J'o balé ch'sieu à brin innhui drière el moéson dsur ch'compost.

Pi j'viens baler min darnier verre d'apéro dins m'gargatte à l'fin de chl'artique-lo !

Nomdézeu !

Repost 0

Published by nomdezeu - dans Cassemint d'tête
commenter cet article

15 juillet 2012 7 15 /07 /juillet /2012 00:42

14 juillet 2012

Foque un jour

Ch’meudit jor

Ch’est un jor meudit pour mi… Sié, je n’sus pon républitchain ! A m’foait gramint plaisi d’apprinde èque Bieuvais is foaitent ch’fu d’artifu el 25 de ch’moé d’eut à coeuse de ch’tan ! Rindez-vous compte, Bieuvais qui foait el fiète nationale frincèse el lindemain de ch’jor del fiète nationale picarde !

Un boin age

Ch’ Maeva Bar à ch’wartier Sint Leu d’Anmiens, il o 1 an ch’13 juyet 2012. Ch’est don lo que j’o foait ducasse. Des joènes de 15 ans qui foaitent del boène musique, eune version rock ed Loir et Cher pi un boutchet de fleurs ed Grébénote.

Mi-vagances

J’sus achteure à l’mitan ed mes vagances. J’o point été bizir dsur chés bains d’mer ed Sint Wary obin à Fort-Mahon. J’o passié min temps à détriller chés tiloirs ed Grébénote pour ringer el moéson.

Nomdézeu !

Repost 0

Published by nomdezeu - dans Revue de presse
commenter cet article

11 juillet 2012 3 11 /07 /juillet /2012 21:04

Une journée arrosée

Eune jornée d'ieu

Dipleumée

El tracheuse d'histoère d'Harponville, ale o ieu sin dipleume por ête cinsière ! Avuc Hélène,Vincent pi Sam ch'corbieu, os ons point attindu chés résultats. Il étoait minuit passié d'eune eure qu'os étoèmes déjo à arroser ch'dipleume à coeups d'gloria à ch'presbytère !

Buée pi lavindrie...

J'avoais point invie seurtir pi rasseurtir pour ringer mes réderies dins chl'hangar avuc ch'tan grimouche pi chés pleuves.

15°C qui faisoait dins l'moéson du matan ! Il o fallu que j'ralleume ch'fu in plein moé d'juyet ! Eune bassine d'ieu pi l'bouyoère edsur ch'fu, pi nous vlo parti pour eune buée d'torchons pi eune lavindrie ed quèques verres, tasses pi gattes...

Chés noques

Avuc sitant d'bâtimints, ch'est un tracassemint du diabe avuc chés pleuves.

Dins chl'hangar, a piche !... C'est à coeuse d'un raccord inter chl'hangard pi el vièle grange in torchis qu'il est mal foait. Eune tole pi a coule dins chl'hangard in attindant...

Eme noque drière el moéson ale vo fin bien. J'o foait un couyou avuc un coeup d'louchet pi incroéyabe, un bétail il o décidié d'foaire el seurtie d'sin terrier au bout ! Bé bien que j'vo devoèr poéyer des dégâts d’inondation ed moéson à sin assurance !

Nomdézeu !

Repost 0

Published by nomdezeu - dans Cassemint d'tête
commenter cet article

9 juillet 2012 1 09 /07 /juillet /2012 19:46

Mes vacances à la campagne

Prinde sin temps...

Verdi 6 juyet 2012

Coèr infiqué dins min casernemint à Anmiens, j'o essayé d'foaire chés comptes d' El Ferme Grébénote. Impossibe ! Je m'berlure, 1+1 = 3 pi d'eutes !

5 eures d'ermontée, je prinds ème carette pour daller foaire el verlée ed Bonnay.... Mais des imbarachemints de l'route ed Dourlins dusqu'à Etévé (avuc leus meudits routagaillous) quasimint ène miyeure pour tchitter Anmiens. J'sus arrivé in rtard à l'visite !

A l'fin del visite, eune eute imbuscade, pus héruse chelle-lo, un anniversaire... A 10 eures du soèr, j'étoais infin à Harponville.

Sanmedi 7 juyet 2012

J'o détrillé ch'cafernau qu'y avoait dins un meube dins l'tchuisine = des outieus, du "Mir Rose" tout neu, des coeuchures moésites pi du brin... A l'fin d'apreu-none, un tchot tour dins l'cinse, eune pognie d'nielles ed Damas, ed soucis pi d'magrittes pi min boutchet il étoait fait pour mette dsur ch'fameu meube.

Au soèr, mes comptes d'El Ferme Grébénote is étoètent foait d'eune affilée.

Diminche 8 juyet 2012

Ch'jour du Sagneur, o n'foait rien mais i n'o ch'erpos d'famile...

D'ertour, os avons rincontré el fille Zabèle pi je li o donné min ju de poterie Mako in plate. Ale étoait fin héruse !

Apreu, j'o cminché à ahanser min cours de picard pour el énée euniverchitaire qui vient.

A vèpe, Sam ch'corbieu, il o alleumé un barbacouet avuc eune jante de reule pi eune vièle grille d'eune tchuisinière Godin.

I fosoait nuit quind avuc l'ieu récoeuffée dsur ch'barbacouet, j'o foait ème toélette du diminche avuc eune bassine pi du savlon.

Lindi 9 juyet 2012

J'o vuidié ch'meube Sint Hubert de l'salle à minger. Des verres à l'chintaine pi des gattes du meume nombe !

Sam, li, y défaisoait ch'cimint de chés murs pi i miloait si chés colombages is étoètent coèr boins.

Eme mère, ale o vnu vir chés voésins pi boère eune chitronnate. Eune bérouète, eune feuchille pi ale o coeupé des herpes dins chés rues.

Il est 9 eures du soèr. Sam il est coèr à défoaire chés gravats ed sin euvrage.... Tchéqu'un put-ti li dire qu'il est temps d'erposer ?

Nomdézeu !

Repost 0

Published by nomdezeu - dans Cassemint d'tête
commenter cet article

2 juillet 2012 1 02 /07 /juillet /2012 22:18

Les cornemuses picardes Harcigny 1er juillet 2012

Chés instrumints du diape !

Déjouqué à coeups d'pipasso !

Apreu des fiètes conme os ons ieu sanmedi soèr à l'églisse d'Harcigny, sin tiot plaisi du diminche matan, ch'est d'resser incouvté dins sin lit. Du brin !... A 11 eures du matan, quasimint in pleine nuit, vlo ti point que chés pipassos is ercminchoètent à braire!

Ch'Pipasso Grinche Binde, cliquez ichi

Des musiques ed drones pi d'droles

Apreu-none, os ons intindu del musique espérimintale de Sam Corwynn avuc Tim de ch' Conservatoère ed Musique d'Anmiens.

Un momint incroéyabe qu'os ons vétchu avuc del musique juée par des pipassos pi un cor des Alpes.

Chouo pi ses amisses is nous ont foait un tiot bal folk.

Ch'bonus de ch' Festival

Sam il étoait in train juer dsur scène diminche pi d'un coeup inter dus morcieus =

André i crie à ch'pied del scène : Sam, quoé qu'tu vus boère? Eune bière, un pastis?

Sam : Sié, un pastis!

André : T'es sur? Pi tin camarate?

Tim : Un pastis itou

Eune minute pus tèrd, André il o berzillé ch'verre ed pastis dsur chés manicraques alectroniques. Un grind momint d'espectaque impreuvisé !

Jusse apreu avoèr jué de ch'cor des Alpes, vlo ti point Mr Lemoine qui désaque eune canne à pèque. Ch'est-ti qui vut péquer in plein mitan de ch'barnum? Nan ! El vlo à juer du cor avuc eune canne à pèque ! Sié, eune canne à pèque !....

Vlo eune foto avuc chés parsonnalités (ed gueuche à droète) =

Henri Briquet, Gilbert Beuvelet (ch'maire) pi Jean-Marie Braillon (Euniverchité picarde libe ed Quiérache)

Je ne l'o point in foto mais chl'Amiral des Forces Navales Libres du Vimeu i l'étoait lo itou !

Pi pour définir ch'Festival, os ons vu un bieu momint.

Sam pi Mario qui jutent dsur el scène!... Os connoaissez chés anges du Paradis. Mario, ch'est un ange ed Terre. Qu'il étoait ti fier conme un pape, d'avoèr jué avuc sin tambour !

Nomdézeu !

Repost 0

Published by nomdezeu - dans Revue de presse
commenter cet article

2 juillet 2012 1 02 /07 /juillet /2012 18:32

Les cornemuses picardes d'Harcigny 30 juin 2012

Chés instrumints du diape !

Harcigny

Ch’est un poéyis d’Quiérache par indsous Vervins.

Ch’village il est connu pour Djuilleume d’Harcigny, el gayole drière l’églisse pi sin bal reulant à l’ducasse.

RENCONTRES DE LA MUSE A BRASSI

30 juin – 1^er juillet 2012

Un stage pour impreuvriser

Avuc Frank pi Kika, eune dijaine ed musiqueux is ont apprins à impreuviser avuc leus voés pi leus instrumints.

VIDEO IMPROVISATION, cliquez ici

Un concert dins l'églisse Sint Martin d'Harcigny

Avuc Yo (flahute), ch’père Nortier (mindole), Sam (buquoèr) del musique del Renaissance

Cliquez ichi

Pi del Musique Baroque avuc Chouo, ch'cornemuseu pi un grind musiqueu Julien Skowron

Cliquez ichi

Pi apreu ch'erpas inter chés musiqueus pi ahanseus

NOMDEZEU !

Repost 0

Published by nomdezeu - dans Revue de presse
commenter cet article

29 juin 2012 5 29 /06 /juin /2012 16:28

Du picard à l'Université d'Amiens

Apprinde du picard...

Ch'père Eloy

Edpus grammint d'énées, Jean-Michel Eloy foait un cours ed picard pour chés carabins ed l'euniverchité avuc ch'Cinte d'Etudes Picardes. A compte pour ch'dipleume !!!

Contact = lesclap@u-picardie.fr

IUTA pi sin picard

Tiodave foait un atelier ed parlage pi d'tchulture picardes à l'IUTA.

Ch'est ouvert à TERTOUS !

Pour suire chés cours ed Tiodave =

03 22 82 89 72

secretariat-iuta@u-picardie.fr

Nomdézeu !

Repost 0

Published by nomdezeu - dans A venir
commenter cet article

27 juin 2012 3 27 /06 /juin /2012 22:23

Vive le Vimeu !

Vive l’Amiral Kerouak !

L’Amiral Kerouak

Amiral Kerouak, Commindant ed chés armées navales de ch’ Vimeu, ch’est un tite important !

Os volez connoaite ch’Vimeu…. Prindez rindez-vous avuc li !

Ch’est un héros del Picardie qui connoait chés mers, el côte Picarde, chés tchottes histoères de ch’Vimeu conme el Grande (d’Histoère) pi itou toutes chés serrules vimeusiennes conme un conterbindier qu’il est.

Un Géo Trouvetou

Ch’est li qu’il o treuvé commint graissier un tour à bos !... Avuc du brin d’aronde…

Ch’brevet il est déposé sous ch’liméro 4754774*** à l’Inpi.

Ch’est li itou qu’il o invinté eune animation formidape connute dins ch’Monne Intier = ch’Concours ed Jteu d’Epinette Dins l’Pâture d’A Côté.

Des neuvèles ed Kerouak ?

Quind os ons des neuvèles ed li, ch’est toudis des neuvieustés ! D’un coeup, i rétampe un flobart ; d’un eute, il écrit un nouvieu live qui sro jamoais dépulié obin il o réchué eune tonne ed miel avuc ses catoères, eslon ses diries.

Une bièle moéson

Ch’est un tchoeur picard no Kerouak. Sins mintir, ch’est min pus grind amisse de l’histoère de m’tchulture picarde à mi ! Pi il o eune bièle moésonnée, avuc ès fame pi ses dus fius.

In dvisant d’moéson, vlo quèques fotos ed sin euvrage pour rétampir ch’pignon de s’moéson.

Nomdézeu !

Repost 0

Published by nomdezeu - dans J'étais là
commenter cet article

27 juin 2012 3 27 /06 /juin /2012 18:48

Augmentation du Smic et du temps - 30 juin et 1 juillet 2012

Eune esgonde in pusse !

61 esgondes au moés d’juin

Os sonmes in rtard ! Ch’ Service international de la rotation terrestre et des systèmes de référence il o vu qu’os avoèmes eune esgonde d’ertard par rapport à l’Terre qu’ale fait sin tour sur ale-meume ! Ch’est don à l’darinne minute de ch’ 30 juin 2012 qu’os allons rajeuter eune esgonde. Y sro minuit à 24h 00 mn 01 s !

Du brin ! Y faro que j’travaille eune esgonde ed pusse gratis! J’vo perde 0,037 chintimes d’accatoèrs à l’fin de ch’ moés !

Dernière minute du mois de juin

Ch’SMIC il eugminte !

Ch’SMIC (S’Minger 1 tchilo d’Caviar) il eugminte ed 22 uros !

Avuc tant d’argint d’un coeup, j’vo povoèr m’poéyer eune apreu-none à ch’moédeut assis dins min cadou d’gardin à l’moéson … Ben sié, rester à n’érien foaire à s’moéson, a coute… avuc chés impots d’moéson, chés abonnemints d’téléfone, d’alectricité pi d’eutes!

Augmentation du Smic Juillet 2012

Nomdézeu !