Vir troube

Eme carète pi mes branques

Apreu eune usance ed 10 énées, j’o des freus du diape èque mes branques ales s’démanglent pi que je n’puche pus conduire ème carette. J’intinds déjo chés déméprisants = « Adon, ète carète, ale est in bos ! Ch’est-ti du quène, du tillé obin du séhu ? DDR ». Eme carète ale o 4 reules, un moteur pi un volant conme z’eutes pi ale est in teule. Mais min permis d’duire, il o min rétoèr avuc des quatezius et ch’est chés branques ed mes leunettes qui sont à mitant berzillées.

Eune branque berzillée pi m’vlo décaretté !

Un calindrier, eune carte pi des boins yus

Nayu, j’o cminché à téléphoner à min oeullogisse por li dminder un rindez-vous. Wate ! Il falloait attinde pusse ed 9 moés ! N’est mie possibe ! J’ravise dins l’annuaire por déteuper min seuveur pi quoé que j’voais !... A l’rive droète d’Anmiens, chés gins is foètent seurmint des processions de Sinte Pusine vu qu’y n’o point un seul oeullogisse de ch’côté-lo del Sonme ! Is sont tertous rive gueuche !  Vo pour trécoper tout Anmiens pour vir un espécialisse.

J’o du téléphoné à 7h du matan au moés d’déchimbe à un oeullogisse que je n’connaissoais point por avoèr min rindez-vous in feuvrier.

Du brin à ses yus

Eme vlo mon min nouvieu oeullogisse aveuc eune invie d’pissiate du diape ! Adou qu’is sont chés cabinets ? Lo, eune pincarte… « Rapport à ch’qu’on o déteupé des étrons à côté del tchuvette, chés cabinets is sont freumés pour el pratique ! » Y o des gins qu’is ont vraimint bsoin ed leunettes... Est URGINT !

Un acrinquillage avuc des capleuses vo foait raviser dins toutes seurtes ed treus, vo lanche ed l’air dins vos yus à vous foaire braire pi vo ébleui avuc ses lumions. J’o min papier d’ordonnanche !

Dus poaires ed leunette por el coutanche d’eune ! J’o été vir chl'otchulisse Troubeleu pour acater mes quatezius. Du brin ! Mn’asseuranche ale est point acheuchonnée avuc Troubeleu. J’vo devoèr avinché l’ergint pis apreu erchuvoèr min rimboursemint. Adon, avuc dux poaires, je n’ai achteure pour 20 énées edvint d’raller vir min oeullogisse ! Enon ?!

Nomdézeu