Résurrection en Picardie = Une barque gauloise et un tramway amiénois

Je m’sins Samara Gnatos.

Abugnata, Hakuna matata !!

Ayé ! Tiodave il o ses boéyeux d’chervèle in pâté ed pattes à mouqueron ! qu’is diront chés déméprisants. I parle in gauloés touillé avuc du kiswahili ! Ben non, point core…

Abugnata, c’est ch’nom d’ eune barque gauloèse rétampie qu’is ont foait chés rédeus d’Ambianis.

Hakuna matata, in parlage kiswahili, a s ’terduit in frincés pèr « Sans problème ! ».

Pi diminche 24 march 2013, ch’est hakuna matata qu’Abugnata ale o ermonté el rivière Samara pour s’rinde à Samara à l’Cauchie Tirincourt.

Ch’tram d’ertour à Anmiens

Yo chint ans, dins chés rues ed Sint Leu pi des Troés Cailleus à Anmiens, ch’tramoués i s’fsoait sin euvrage dins l’ville. 100 énnées pus tèrd, l’idée (dins ch’Courrier Picard du 27/03/2013) ale avinche et os in sonmes à tracher ch’nom ed chés trams !

Eune idée ed Samarien

Abugnata, ch’est « el fille del rivière » in gauloés. Ch’est un batieu qui seurvoait à transbaler des marcandises tout du long ed Samara.

Ch’tramoué i vo transbalé gramint d’gins dins Samarobriva qu’os appelle achteure Anmiens.

Jusse eune idée à Tiodave, VOGIGNATA « el fille à transporter » pour donner un tchot nom à ch’tram d’Anmiens.

Nomdézeu !