Mon découvert bancaire après le 21 décembre 2012

Mossieu ch’dirigeu de m’banque,

Os savoez que ch’verdi 21 déchimbe 2012, ch’étoait el Fin de ch’Monne.

Conme mi, os ravisez chés gazettes pour savoèr ch’CAC 40 pi des neuvèles del Bourse pi mi pour chés eutes neuvèles. Os n’sonmes pus à l’époque d’acouter chés quaterlangues de nos villages. Y o achteure chés gazettes, ch’transistor, ch’posse ed télé pi a m’sure intarnet qui ditent des neuvèles véridiques.

Comme el Fin de ch’Monne ale vnoait, j’o ieu idée de m’foaire plaisi pi tant pis pour chés dépinses ! J’sro défuncté conme min banquier pi cha n’cangero mie rien ! Adon….

J’o été à ch’restaurint edpus 10 jours matan, midi, soèr pi j’o racaté ch’restaurint =  2 miyons

J’o cmindé ène carette avuc un conducteur pindant 10 jours = 800 000 uros

J’o acaté ène moéson à Néchin in Belgique rapport à l’mode d’achteure ed Depardiu = 2 miyons

Pi d’eutes acats que je m’in raminteuve pus !!

Total de ch’débit dsur min compte ed banque au 21/12/12 = 10 myons

Euh, pardon, ch’est mie de d’feute mais de l’feute à chés gazettes !

Cha iro-ti pour estchuse pour n’pon à avoèr à rimbourser toute d’un coeup ?

Avuc l’eugmintation de ch’smic à 0,03 % au preumier jinvier 2013, j’o pu èque 155 énées d’ergint à vous rinde putot èque 155 énées avint l’eugmintation !?

Nomdézeu !