Harpon-quèque cose…
L’histoère ed sin poéyis
A feurche ed foaire des verlées dins chés tchots poéyis, ej sais d’où cacher pi tracher dins chés lives pi chés papiers pour déteuper eune date, un molumint pi l’histoère d’un poéyis. Ed min poéyis, Harponville, je nn’o grammint à raconter, infin presque…
A n’est point aisé d’aller vir pi déchiffler chés manuscrit pi chés parchemins ed chés archives ed Départemint pi d’Nation. Alorss os ons tertous idée d’aller vir chés lives ed chés notaires, chés maristers, chés tchurés pi chés notabes qui z’ont terscrit tout cho. Pi vlo chés berlures !
Chés sagneurs d’Harponville
Treuver el litanie ed chés sagneurs d’Harponville est simpe. O rbéyez chés lives de l’Société des Antiquaires de Picardie pi os avoez chés noms pi chés tites. Ben, du brin que j’ vous dis !
Prouville, sr d’Harponville ? Nan !
Grouches, sr d’Harponville ? Nan pu !
Doncoeur, sr d’Harponville ? Mie possibe !
Ben pi Raincheval, cho est asseuré ! Ben j’o des doutances que j’vo dis !
A se dminder si d’Hespel, il étoait sagneur d’Harponville à l’Révolution !
Eme liste asseurée pi véridique ed chés sagneurs d’Harponville, ale est vuide !
Ch’est écrit « Harpon » pi quèque cose
Harponlieu, ch’est un fief qu’il est achteure dsur el conmeune ed Grouches-Luchuel.
Harponlieu, ch’est itou un fief inter Dourges pi Ostricourt par dsur Arro.
Harponval, ch’étoait un prieuré à couté ed Moreuil.
A ch’sièque d’avint ch’darin, o n’ovoait oblié chés liux-lo. Pi à l’minute, qu’o lisoez « Harpon » dsur un viu parchemin, ch’terscriveu i pinsoait à Harponville ! N’est mie possibe qui ieuche pu avoèr d’eute « Harpon quèque cose » dins l’Histoère !
M’vlo bin inchpé ! Si o avoez l’preufe asseurée pi véridique d’un sagneur d’Harponville, j’vu bien avoèr ch’nom !
Blason d'Harponville = (c) dessin de Jacques Dulphy - Ch'Lanchron
