Soin à n’point fanflaner, luronner, vadrouiller, varonner!
Tiodave, tu dvises ed trop picard !
« Fonflane »… Quoé qu’a vut dire ?C’est un nom de liu d’Eutie.
J’sus in route à écrire un live dsur chés noms d’liu de ch’ Canton d’Acheu, ch’ti à couté ed Corbin.
Est simpe à terduire, que j’pinse… « Fonflane » ch’est fanflaner in picard qu’a s’terduit in frincés par « se promener, se balader, ne rien faire » que j’pinse.
Pi j’fanflane dsur intarnet… Impossibe ed vir el signifianche in frincés pi coèr miu in picard !
Fanflaner, coèr un mot picard èque j’o cru èque ch’étoait ed « langue française » !
C’est à croère que j’sus ed trop picard !
Chés cots qui fanflanent…
Hier, Ch’Berlou, un cot qui tranne aladon dins chés rues, il est vnu à Grébénote. Ch’est un cat à mitan avule pi qu’il est fin amoureux del catte Mamie qu’ale tranne dins nos granges. Il étoait dins un état abominabe ! Tchéqu’un l’avoait frappé ! Il o eune balafe au mitan d’sin front pi èse brogne inflée. Quèques flattes pi il o erparti …
Titi, no cat, Gribouille Von Puscifer, il est ervnu moneu aujourd’hui. I boète de s’patte avint ! D’où qu’il o fanflané ? Os n’sait point !
Fanflaner, ch’est dinjreu !
