Incroéyabe !
Chl’Académie ed chés Lafleurs 2014
Ej n’o point pu y daller. Mais ch’resteurint L’Hortellus, d’où qu’is s'rassannoètent chés Académiciens, il annonchoait « complet » dsur sin site intarnet. O m’o meume dit qu’y avoait du bieu monne…
Quoé qu’ch’est èque l’Académie ed chés Lafleurs ? C’esteune achuchon ed gins fin fiers ed leu lanque pi leu tchulture picardes qui votent à coeup d’nojettes pi d’gueugues pour Ch’Lafleur ed Chuque 2014, chti qu’il o el miu défindu el lanque pi el tchulture picardes pi Ch’Lafleur ed Brin, chti qui l’o déméprisé no lanque pi no tchulture. Tertous o povoez ête Lafleur èslon el lubie ed chés Académiciens…
Lafleur ed Chuque 2014
J’o ieu el neuvèle au matan diminche per eune jornalisse amiteuse de ch’ picard…
Ch’est un resteurint d’Anmiens qu’il l’o ch’Lafleur !
Cha n’est point un maquerade, un maquingélé mais un boin resteurint de ch’Wartier Sint-Leu d’Anmiens avuc del tchuisine picarde pi des séries ed parlage picard el duzième merdi du moés. Os avoez edviner ….
Biésur, ch’est ch’resteurint L’Hortellus qui l’o ieu el récompinse !
N’alleu point foaire dire èque ch’est à coeup ed canèrd, rinchète, surinchète pi gloria à l’fin de ch’bantchet èque chés patrons ed l’Hortellus is ont ieu ch’Lafleur… Ej n’o point l’preuve… Chés verres is ont été lavés jusse après…
Lafleur ed Brin 2014
Ch’coeup d’cotron il est vnu ! Is n’ont jamoais été sitant à ête élis Lafleur ed Brin 2014 !
Quasimint eune vingtaine ed gins qui sont élis Lafleur ed Brin cht’énnée-chi…
Ch’est tertous chés dépeutés ed no Picardie pi de Nord-Pas de Calais qu’is ont erchu leu viatique à coeuse qu’is ont voté conte el Charte ed chés Lanques Régionales. Vir chés votes à l’Assimblée Nacionale ICHI .
