Cousin d’Amiens Nord

Ete del famille de ch' Nord d’Anmiens

El Moéson du Nautilus

Os sonmes avint l’an 2000. Et vlo ti point que je m’in vo habiter in plein mitan d’Amiens-Nord.

L’Opac m’ perpose un casernemint à couté ed Fafet- Brossolette (un wartier caud d’Anmiens)

« Os êtes-ti asseuré ed vouloèr habiter lo ? »

« Ben, sié ! qué problème ? »

« Ben, chés caterlangues is ditent èque ch’est pon un wartier pour des boènes gins. »

Vlo 15 énnées èque j’habite lo ! J’doés ête « eune maouaise gins » ?

Min surpitchet picard

Min surnom, j’y avoais gramint rapinsé. Ch’étoait Daoud, min tchot nom. Je l’avoais décidié pi chertifié ! Pi vlo ti point qu’un matchté d’brin d’bros d’loque d’amisse ed Yannick del’rue Brosselette à Anmiens,  i m’houppe à coeup ed « Tiodave ».

J’o du m' débatte mais rien à foaire, ch’étoait « Tiodave » min surpitchet qu’il étoait achteure !

J’sus cousin !

Au jour d’inhui, j’o été dsur l’plache du Colvert pour foaire quèques acats. Quind j’erviens à m’carette, y n’o un joène à castchète qu’il est adossé dsur.

Ej li dis « Pardon… »

Ch’joène = « Désolé, mon cousin ! »

Un « cousin » in Magrébie, ch’est la famille ! Os povez ête « cousin » si os êtes amisses obin voésins ! Ch’est un mot fort amiteux !

J’sus fin héru d’ête « cousin » !

Vive les septentrio-samarobriviens !

Nomdézeu !