Eune gin in France
Charlotte, né native ed Gardincourt in 1936, ale o achteure 78 ans. Pi ale apprinds par l'télé qu’i feut achteure eune carte d’idintité pour aller voter sin maire !
Ale vo à l’mairerie vir ch’maire.
CHARLOTTE = Bojour msieu l’maire ! Qué cassemint d’tête !
CH’MAIRE = Bojour Charlotte ! Quoé qui s’passe ?
CHARLOTTE = Je ne peux pus voter pour vous eutes !
CH’MAIRE = Cmint don ? T’es vo voté pour chés malaprins qui veultent ème plache ! Tu vux èque chés partageux is dilapitent chés sous del commeune !
CHARLOTTE = Mais nan ! Je vous dis èque j’peux pus voter !
CH’MAIRE = Raconte don ! Mi j’y comprinds rin !
CHARLOTTE = Bin y feut bien eune pièche d’idintité achteure pour voter ?
CH’MAIRE = Sié, ch’est avéré ! T’os qu’à prinde el vièle qu’ale est périmée ?
CHARLOTTE = Je n’o jamoais ieu ed carte d’idintité…
CH’MAIRE = Meume pindint l’djerre ed 40 èque ch’étoait obligatoère !?
CHARLOTTE = J’étoais tchotte file à ch’momint-lo. N’allez point m’viusir pusse èque min âge !
CH’MAIRE = Pi apreu, t’es lo jamoais dmindé ?
CHARLOTTE = Pour quoé foère ? Avuc min paure Oscar, min défuncté d’mari, os n’avoèmes point edz accatoères pour daller trécoper el France pi aller vir chés poéyis horzins. Nos 4 hectares ed terre, nos dix vaques pi chés glènes pi chés lapans a seuffisoait pour nous vive.
CH’MAIRE = N’est mie possibe ! Attinds, os allons vir quoé qui feut conme papieux pour voter…
Ch’maire i vot dsur intarnet pi i trache….
CH’MAIRE = Alorss point d’carte d’idintité… Ch’passeport, i n’est mie tchestion…Ch’permis d’conduire !!! El Dux Gvos à Oscar, tu l’prinds-ti ?
CHARLOTTE = Avuc Oscar, j’avouos point l’droét ed conduire Perruque pi Nénette, chés dux gvos qu’os avoèmes edvint d’acater un tracteur ! Alorss el carette pi ch’permis d’conduire, pinsez-don ! Ale est ramuchée dins l’cartrie, no carète, à viusir conme mi !
CH’MAIRE = Ch’permis d’cache… Nan… Ah sié ! I feuroait quind meume déclarer un jor ch’fusique à tin grind-père qu’il o tiré chés uhlans à l’djerre ed 70 !
CHARLOTTE = A compte cho ? Si j’ramène ch’fusique, j’o l’droét d’vote ?
CH’MAIRE = Crédiu, nan ! Sinan os vons croère èque tu vux foère un attintat terrorisse à chés élections !
CHARLOTTE = Adon, quoé que j’foais à chés élections ed mairerie 2014 ?
CH’MAIRE = T’attinds ! Os érons t’prinde pour daller à l’mairerie !
CHARLOTTE = Pour d’aller voter ???
CH’MAIRE = Charlotte, t’o pus l’droét d’vote ! Té viendros pour chés résultats !
Une honorable dame de 78 ans dans un petit village rural de la France qui n’a jamais eu de carte d’identité, pas de passeport, pas de permis de conduire ni de permis de chasse n’a plus le droit de voter !!!
Combien sont-elles (ou ils) en France ?
