Ch’Dur pi ch’Mo du Courrier Picard existent vraiment !

Je l’savoais déjo pour Lafleur !

Lafleur à Harponville

J’étoais tout nazu. Ch’étoait l’Abe ed Noé dins l’salle des fiètes de ch’poéyis. Chés Cabotans d’Anmiens i avoètent dréché leus planques ed téyate à l’plache de l’scène. Qué pièche èque ch’étoait ? Je m’in ramintuve pon. J’avos des yus ébeudis d'vir cho. Pi à un momint de ch’espectaque, vlo ti point qui tchait des neiches dins ch’téyate ! Mi, nazu, j’erbéye par chés cassis del salle des fiètes… pi quoé je voés ! I tchait des neiges itou déhors !!! Edpus ch’timps-lo, n’allez point m’dire èque Lafleur ch’est eune invincion !  

Léopold pi Mimile

J’o apprins par Tchulmadjet èque Léopold Devismes, un grind écriveu picard, il vient d’avoèr 100 ans. Fin héru, j’invoé un émile ed « boin age à ti » à Ch’Lanchron pour leu dire ed foaire passier min message par Mimile Boétalette, ch’facteur bien connu de ch’Dur pi ch’Mo, à Léopold rapport à ch’que j’o point èsn adrèche. Pi quoé j’o erchu inhui !.... Un émile ed Mimile !!!

Min boin David

J'ai bien rchu t'lette. Et pi vu qu'éj su facteur, j'ai tè l'preume à savoér éq j'én n'avoais éne din m'boéte, vu qu'ch'est mi qu'éj l'ai lanchèe ddin !

Ch’est tout Mimile cho !

Pour ch’resse de ch’message i m’parle qu’y avoait gramint d’gins à chés ages à Léopold pi meume chés jornalisses ed Frince Troés qui vo li foaire un erportage !

A l’fin ed sin émile à Mimile, i signure :

Bon, mi j'in vo, j'ai min détriage éd lettes à foaire pour édmain, et pi m'sacoche à chirer.

Amiteusmint à ti,

Mimile Boétalette, imploéyè des Postes

Incroéyabe ! O put dviser avuc ch’Dur, ch’Mo pi tertous chés eutes gins ed Molimont pi ed Durchicourt ! Achteure,vlo qu'j’o l’émile à Mimile !

Nomdézeu !