Avuc chés gins ed l'atelier ed picard ed Varennes, os avons ahansé eune esposition ed mots picards dins l'salle des fiètes pour el réderie de ch'preume ed Moai. Os ons ahotché tertou chés mots sanmedi.
Innhui diminche matan, y o ieu quasimint un drame !
Ch'perzidint del réderie il étoait à foaire coeuffer ch'café pour chés gins quind il o vu s'fème erbéyant ch'mur pi trannant ed tout sin corps ! Ch'est-ti des convulsions ? Il o été vir, quasimint in foésant ch'liméro ed chés pompiers pour ed l'aiude. Mais ch'étoait point des convulsions...
Es fème ale avoait li l'pincarte du « lave-linge » avuc martché dsur « batteuse à loques » pi ale étoait à rire à fafoué !
Eune dame edvant l'pincarte ed chés guénels = « Bé, titchotte, j'in feusoais mais je n'savoais mie ch'nom ! »
Eune grind-mère avuc s'canne à sin tchot-fiu avuc s'castchète dsur sin front : « Romain, viens voir ! » Pi tous deux à erbéyer chés pincartes pi distchuter insanne pindant 10 minutes. Du bonheur pour mi !
Un papa, un éfant ed 8 ans = « Papa, Grenouille » - « Non, c'est écrit Guernoule, c'est du picard. »
Ch'est-ti un plaisi ed vir eune tchotte fille ravisant un pèr un chés mots pincartés.
Des mots picards lis, dits, j'in o intindu tout l'long del jornée.
Pusse ed 200 visiteus à l'esposition pi des « adé » à masse !
