40 mars - Nuit Debout Amiens

Tchot mot de ch'déroulemint del Nuit Etampie du sanmedi 9 d'avri 2016.

Assimblée Citoéyenne qui vient el diminche 10 d'avril 2016 à 5 eures d'ermontée à ch'kiosque edvint ch'tribunal

12h30 – Quèques citoyéns erssources pour ahansemint del nuit étampie pi rapinser dsur quoé qu'os pouvons étnir à ch'comminchemint del preume Nuit Etampie rapport à ch'manicraque présint, prêté obin preumis pi des gins edvant nos erjoinde. Tchestions alintour de ch'tan pi etnir toute el nuit. Merchi à eux autes pi leus ingagemints !

14h – Ramonchèlmint de ch' manicraque léger pi intamure ed chés activités pour foaire vir no présince pi nos batalles pi ahansemint technique del seurtie de ch'manicraque lourd (sono)

14h30 – houppe à ch'micro por el Nuit Etampie pi étramage ed réclames. Participation ed chés « Etampis » à l'manifestation conte el loé d'ouvrage.

17h – Freumeture del cirtchulation edvint el Moéson del Tchulture.

17h 30 – Intamure del assimblée générale citoéyenne dsur el plache del moéson del tchulture in attindant el mise in plache del sono.

18h … - Pleuves : os décidons ed porsuire l'assimblée eddins el moéson del tchulture pour erprinde chés liux publics. Os povons ermerchier l'atcheuil ed chés gins del MACU qu'is n'étoètent point conte no présince.

19h30 – Ertour ed l'assimblée dsur el plache avuc el sonorisation pi un micro. Merchi !

20h – L'erchinée est fin prête à nos atcheuillir dusqu'à l'défin del nuit. Grillades ed vianne pi lédjeumes, pains, soupes, watieux, salades, boéchons rapporté pèr chés citoéyens pi ahansé pèr eune moésson d'argint. Vinte à prix libe pour récouer des doupes pour Nuit Etampie pi chés bsoins qui vienntent. Merchi à chés cabaretiers !

20h30 – Diries pi Musique

21h – Comminchemint de chl'atelier dirie après tchestionnemint d'houpage placardemint tindu pèr eune corde inter chés abes dsur el plache. Euvrages tchittés dsur plache à l'fin del nuit pour traches.
« Nos désirs font désordre ! », « J'ai 10 ans et je suis debout ! », « On fait la révolution alors ? »,
« La lutte c'est classe...contre classe ! », « Régression des droits, vive le roi ! », ….

21h- 02 h : Musique : groupe les « Tornades Sandwich » (tortuwarak britchet),
puis insemble ed tambours.

00h – Espectaques ed fu

Tout el long del nuit étampie, des artisses ed toute seurte, dinse, jonglage, diabolo
Un live dor étoait lo pi a récoué vos idées pi témoégnages.

Eune lisse ed contact est in plache pi chés neuvèles ales s'front pèr boète mail del Nuit Etampie pi dsur Tchulmadjet
: nuitdeboutamiens@gmail.com mais également sur la page facebook www.facebook.com/NuitdeboutAmiens/

Ed bieux imtamages pi des diries tout el long del nuit. Os écangeons inter nous eutes, apprindons à nos connoaite, raloyéons.

Chés cadoreux nous ont laissé trintchilles pi nous ont milé sins ête lo tout l'temps. Aladon, el Nuit Etampie n'est point déclarée mon l'préfecture mais eune gin avoait préviendu un syndicat ed cadoreux ed no présince pi du sins ed no rassimblemint.
 

Os ermerchions tertous chés participants à l'preume Nuit Etampie Anmiens avuc tout ch'que chatchun a foait pi apporté.

Os ermerchions grammint l'UD CGT pour ch'prêt ed coses prumières, générateur, barnum, poéds, tabe pi el présince ed chés mimbes de ch'syndicat avuc nous eutes.

Os ermerchions l'achuchonage ed chés intermitants pi casuels, l'aube neuvèle pour leu présince, perticipation pi aiude.
 

Os sonmes d'avis que ch'rindez-vous étoait eune réussite. El parole s'est délibérée pi el coeuse ed chatchun. Os soétons vir ch'mouvmint-lo s'étreumer pi qu'a dure dins ch'temps pi itou dins grammint d'liux del ville. Os invitons tertous citoéyens à nos erjoinde pi à résister avuc nous eutes.
 

N'hésitez pas à nous contacter dans le cas où ce résumé vous paraîtrait incomplet.
Nuit et Jour debout !

Nomdézeu !