2 heures pour un stylo et un plein d'essence

Edvint os avoèmes des stylos. Achteure, os avons eune imprimante. El mienne ale vient d'défuncter pi j'in o racaté eune eute.

I m'o fallu 15 mn pour déssaquer l'manicraque ed sin carton pi ed chés imballages ; d'ertirer chés fils, chés cartouques d'inque ed leu plastique ; ed tracher apreu tous chés collants ed protection dsur l'manicraque. Du brin, meume el prinse ed courant ale n'est point l'meume que l'prinse d' èmn imprimante d'avint ! J'o mis ed l'inque, des feulles pi j'o alleumé ch'stylo d'carculateur. Bé, nan !

I feut itou mette ch'disque d'ahansage dins ch'carculateur pour qu'il erconnoaiche sin stylo ! Nous vlo parti por eune mi-eure d'ahansage interdeux ! Paff, vlo eune neuvèle farnète qui s'o ouvert dsur min carculateur. I feut mette chés rétampinuis qui sont à télécarquer ! J'buque pi j'attinds coèr un quart d'eure !

Egzavier, no persidint del Coopérative « Hauts de France », i vut aidier chés gins qui oeuvent avuc 20 uros pèr moés pour leus dépinses ed carette. Mais i feut s'écrire dsur intarnet. J'y vo vir….

J'ouve ch'pothuis pi j'rimplis chés cases. J'adlive chés fernètes pi vlo ti point qu'a m'dit « Votre inscription a échoué, veuillez contacter l'administrateur » Apreu avoèr ercminché 2 à 3 foés pi avoèr téléphoné au 0 800 800 741, j'o pu infin avoèr min compte adlivé !

Priez pour mi quind j'vo imprimer ème attestation d'aiude ed carette !

Nomdézeu !