Résistance 13 novembre 2015 en Picardie- Nord Pas de Calais

Samedi matin, j'avoais mal deurmi. Avuc chés attintats à Péris pi foaire eune dirie à chés Etats Généraux du picard, je n'savoais pus quoé busier. J'étoais saisi. Il o fallu èque j'arrive à l'Citadelle d'Arro pi sin mur des fusillés pour comprinde toute. Résistance !!!!!

Résistance contre la désespérance et la désillusion

Pour no région chti-picarde, i feut ed l'éducation pi de l'tchulture, chl'euvrage i viendro à l'suite.
Eune interprinse, eune fabrique, eune boutique viendro toudis dins eune région adou qu'ale put déteuper aisémint des gins qualifiés. El tchulture ed no région, ch'est du patrimoène : ed cathédrales, ed catieux, ed béffros ; ch'est itou del tchulture : avuc del musique pi de l'cornemuse picarde, des gayants, des cabotans d'Lille pi d'Anmiens, du téyate. Ch'est coèr un couet qui robollit avuc des fius pi des tchots fius d'italiens, ed bertons, ed polonais, ed belges, ed maghrébiens pi d'eutes qu'is ont amnés du vertillant à no tchulture. El freu ed chés horzains, ch'est point pour nous eutes. Quind o buque à l'porte d'un chti-picard, chl'alambic ed café il est toujours à cauffer pour atcheuillir chés gins.

Résistance contre le linguicide en France

Ch'est affreux d'in ête achteure à voloèr combatte nos propes éfants, cheux qui veultent abolir no parlage. Apreu ch'Sénat, qu'il o voté conte pour en point in débatte, avuc chés Etats Généraux du Picard, o apprind qu'il feut batte conte chés politiques (Ch'est du patois) pi conte chés idées à chés jonnes. Eune lanke défuncte tous les 15 jors dins ch'Monne. Pour no parlage chti-picard, i feut s'batte conte chés dirigeux tchultureux qui veultent del « grinde tchulture » mais qui n'ont mis soin de l'tchulture ed poéyis. Mais itou conte nos éfants, qui pinsent èque ch'est « point bieu ». Alorsse èque ch'est une canche ! Un éfant chti-picard, il est déjo bilingue (picard - français) edvant d'aller à l'école apprinde ed l'inglais, ed l'allemind obin ed l'espagnol ! Si don os dvise picard à un éfant dins sin ber, dins ses boyeux d'chervelle, ch'busincrillage il est tout prêt pour terduire d'une lanque à l'eute pour apprinde d'eutes langues. Biodiversité écologique = biodiversité culturelle

Résistance contre le fanatisme

Des barbusiers qui foètent el terreur in France…. Os avons connu dins no région chti-picarde des djères d'erligion. Pourtant, des timpes protestants os in avons ; des mostchés os in avons ; des églises catholiques pi eutes chrétiennes os in avons ; des synagoques os in avons ; des plaches d'erligion gauloèse os in avons pi d'eutes. A Harponville, vers 1800, chés protestants pi chés catholiques is ont partagé in deux, avuc un mur, dins l'église pour foaire chatchun sin culte dins un bâtimint insanne. Sur no terre chti-picarde, combien d'horzains australiens, inglais pi autes sont morts à l'djère 14/18 ? Combien ed tombes chrétiennes, juives, mahométantes qu'o n'o dins nos chimtières militaires ?

En départements 02-59-60-62-80, future région Nord-Pas de Calais – Picardie, os sonmes en tri-résistance !!!!

Os sonmes pétète citoyen, frincés obin républitchain, ch'est l'heure ed preume d'ête humain.

« Qui connaît un mot picard, n'est pas votre ami par hasard ! »

 Nomdézeu !