Voitures, merci de polluer !

Ed chés feumées d'carette...

El qualité germaine

Nan, je n'vo point foaire chl'éloge à Germaine, une vaque de m'grind-mère ! El qualité germaine (Deutsche Qualität), ch'est rapport à chés carettes Volkwagen.

Vlo ti point qu'is ont ingénié un busincrillage pour ertcheusser chés contrôles ed gaz ed pot d'écappemint. Ch'est hontabe, apreu os vons dire èque ch'est l'pet ed chés vaques qui foait des maouais sintimints !

Vo carette germaine

Os savoez-ti que vo moteur diesel il est germain ? Ch'est un ingénieu germain, Rudolf Diesel qui l'o invinté. O déteupe achteure que ch'est un moteur impoésonneu avuc ses maouais gaz.

Ch'governemint, jusse edvint el conférinche COP21, il o annonché que ch'diesel il alloait eugminter d'un chintime du lite in 2016 pi qu'el essince ale alloait boaissier d'un chintime du lite.

Ch'est aladon 30 uros pèr énée ed pusse à poéyer pour un diesel. Mais pouquoé qu'chés gins y prindent des carettes diesel? Pour aller oeuvrer fin loin ed leus moésons ! Pi si qu'os rapprochoèmes chés fabriques pi chés ouvrages ed d'où qu'is ressent chés gins à l'plache ed tout ramonchler dins chés villes ?!

Eme carette

Innhui, j'o du passier ch'controle ed pollution de m' vièle carette. Eune Peugeot 309 Essince ed 250 000 tchilomètes. J'avoais des freus du diape qu'ale fuche erfuser à l'egzamin.

Pi nan, ch'est fin bien ! Pi meume ed trop ! Ale est à 0.19% ed maouais gaz. Alorsse que ch'moteur pour bien torner, i dvroait ête à 0.32% ! Allez, comprinde cho !

Nomdézeu !