La coupe d'Harponville

Tchestion d'manille

El diminche ed Pâques à Harponville, y o eune tradition qu'ale est vièlle ed pus trinte ans, ch'est ch'concours ed manille. Dins l'temps, on rintrait dins chés breumes d'el salle des fiètes avec des sintimints ed toubac pi d'frites qui vous rimplichoait vos peumons in dux niflées. Achteure, ch'est aboli…. ed fumaquer eddins, point chés frites !

Hier, ch'étoait coèr un chint ed jueux qui étoaitent coèr à ch'rindez-vous. Pi os allez dire d'avinche èque cha n'étoait èque des viux ! Ben, os vous berlurez rudmint… Pusse de l'mitant étoaitent des joènes ed moins d'30 ans.

Un joène ed 20 ans rinte dins l'salle pi annonche à l'volée : « Ben i foait point coeud ! » comme cho,  tout in parlage picard. J'li répond in picard pi nous vlo à dviser ed ballon poing. Point ed chés matches obin ed chés règues mais de ch'site internet que ch'ballon i n'o point pour annoncher chés matches, chés intrainemints pi toute. Os étoèmes à l'heure du picard pi du ballon poing 2.0 conme ch'wèpe !

Mi, je n'jue point mais j'aime bien vnir minger eune frite-seucisse à ch'concours ed manille. J'vo m'assir près de ch'bar pi lo à couté d'mi, un groupe cminche à juer à cartes. Ch'étoait des metteux d'fu car is juètent à ch'treu du tchul à l'plache de l'manille ! In face ed mi, dux joènes vienntent s'assir pi vlo ti point qu'os passons 2 eures à dviser de l'lanke picarde pi j'in sus coèr émotionné ed les intinde dire qu'is ont invie ed raparler picard.

J'vous disoais que l'mitant de l'salle, ch'étoait des joènes. Bé, fidjurez-vous qu' ej n'o point vu un seul qu'il étoait ahotché à sin téléphone portabe à foaire du Guerjoleu (Twitter) obin du Tchulmadjet (Facebook) de toute el soérée !

Nomdézeu !